甘比秀桦厨房助自闭人士融入社会　青年宿舍冀明年推｜珍姬蜜

富豪刘銮雄（大刘）同太太刘陈凯韵（甘比）做慈善一向都不遗余力，除咗出钱，刘太更加系身体力行，不时见佢派口罩、派饭畀有需要人士，尽显善心。旧年，华人置业 （0127）将公司名下的深水埗地舖出租畀非牟利慈善机构爱‧传递（Love‧express），搞社企Cafe，并以大女秀桦命名为“秀桦厨房”，主要帮附近的基层家庭同特殊人士。刘太又透露，计划将餐厅楼上的酒店单位，改建为楼高25层嘅青年宿舍“仲学舍”，最快明年开幕。

“好多人以为秀桦厨房只系间中派饭、派物资，但其实佢喺一间非牟利嘅cafe，一星期有四日会做生意，希望更多人会知道有这间餐厅！”秀桦厨房主要请自闭症人士成为餐厅员工，“等佢哋学吓冲咖啡，多一个技能，之后可以出去工作，融入社会！”

既然叫得秀桦厨房，大女秀桦（Josephine）当然亦有“帮手”啦！刘太同小珍讲，平日Josephine会自己落嚟做“义工”。“佢落到嚟自己学冲咖啡畀人饮，仲话想自己画一幅墙俾人嚟打卡！但我叫佢揾人合作帮手，因为对佢嚟讲呢个任务太重大，始终返学都忙。”

楼上酒店改建青年宿舍“仲学舍”

一路而嚟，除咗派饭、物资呢啲一次性帮助，刘太亦希望为香港房屋问题出一分力。餐厅所在的鸭寮街86至88号，原本系一幢25层酒店，全幢面积约1.7万平方呎，据知华置打算将酒店改为青年宿舍，估计每个单位面积大约200平方呎，“秀桦厨房楼上嘅酒店单位，计划改建为楼高25层嘅青年宿舍‘仲学舍’，配合返政府嘅青年计划，希望2024年可以建成！”而具体详情有待确实。

未来再开“秀儿厨房”　选址观塘或天水围

除咗帮助自闭症人士，刘太亦希望帮助其它社会有需要人士，“迟啲想开多间“秀儿厨房”，帮吓啲单亲妈妈、青少年等。或者会喺观塘或天水围。”虽然秀儿人仔细细，但同家姐一样好有心思，“谂定”未开张嘅秀儿厨房可以卖手冲朱古力，仲即场拉咗杯朱古力出嚟请小珍饮！朱古力香浓顺滑，最甜嘅系佢嘅善心！