【享誉国际】香港入围“谈不起恋爱”城市　拍拖唔知去边好

德意志银行（Deutsche Bank's）早前发布调查，香港入围“最谈不起恋爱”城市，于全球47个城市排第20名、在亚洲排名第二，仅次东京。在香港，两个人一日的“廉价约会”大约花费863元。

调查以一日交通、set dinner和lunch、戏飞、啤酒及饮品的消费成本计算。计一计，如果两个人交通费＄40、lunch＄100、戏飞＄220、下午茶饮杯咖啡＄80、食200蚊dinner后直落饮啤酒＄150，都符合条数。

空间不足、规管过时

喺香港，拍拖真系唔知去边好。返工咁攰，放假想留喺屋企，但楼价疯狂、人工追唔上，香港就有超过75% 35岁以下青年与父母同住。想最低消费，带男女朋友返屋企hea、煮餐饭、一齐瞓个晏觉都成问题，间屋太细甚至冇自己房嘅话，只能迫住出街拍拖。

出街拍拖都可以去唔驶消费嘅地方，例如行山。唔系唔得，但个个星期拍拖都去行山，星期一攰到唔想起身，唔系长远之计；可以去公园坐，但大多公园都写明唔准踩草地、唔准瞓低、唔准带宠物、唔准玩棋类唔准打波乜乜乜，咁即系剩系去坐，有时情不自禁揽揽锡锡又会畀人影低摆上网，市区口袋公园隔离就系高楼，多车多尘.......最后都系去返商场行街睇戏食饭。

租唔起楼自己住，放假唯有去开房，但好多平价宾馆近年改做旅客生意，成日要等一两个钟先有房，兴起想开房都系想即时搞，结果又要等，乜都系土地问题。香港真冇咩地方去，于是“拍拖好去处”、“假日好去处”都会成为热门搜寻，但当大家嚟嚟去去都系去个几味，就会唔够位。开开心心准备食物去大草地野餐，去到就发现周围都系人、想影张sweet sweet靓相，背景一大堆人头；去长洲谂住静下点知仲迫过旺角、食串大鱼蛋都要大排长龙。

城市可以有好多可能性，但香港实在太多限制。拍住拖去听独立音乐，遇上HA畀警察扫场又拉又锁；拍开拖个间唐楼cafe饮杯花茶可以坐半日，好正，但因为申请唔到食牌、又唔够钱搬商厦，下个月被迫执粒；想舒舒服服踩单车，但要去到单车径咁远租架车，踩完即日还个种。

事情环环紧扣，“谈不起恋爱”唔单止物价贵，仲有太多太死太过时嘅秩序。