马时亨寄语孙儿做有品格的人　“输”为成功之母｜珍姫蜜

小珍一向都留意名人动向，近日睇到港铁前主席马时亨接受访问，应节目监制要求，想像自己参加咗朋友组织嘅“认识祖国团”，返内地半年，暂别孙仔孙女，佢会写一封咩信畀佢地？

马时亨就话，信中会寄语孙儿做个有品格嘅人，皆因一个人嘅品格比学业成绩、工作衔头及社会地位更重要，“品格是我们的根！”马时亨又话，孙仔孙女现在读书，学业竞争好激烈，可能已知道社会对佢地有不同很期望，例如跑步要跑得快、要成为班上受欢迎的人，这些“统统都会有压力”，但最重要仍然是“做个有品格的人”。马时亨喺信中直言，无需要做最高分嘅人，但永远记住要虚心学习，保持对人、对事嘅好奇心；又无需要成为跑得最快嘅人，但跌低咗一定要识得企返起身，“希望孙仔孙女要记住，坚毅走你们的路。失败是你们的丰盛的成果。”

系呢个充斥怪兽家长嘅年代，有边个父母唔想仔女考第一？小珍听完马时亨咁讲，觉得好有意思，忍唔住WhatsApp佢，再问下点应对失败？马时亨同小珍讲，一个人千祈唔好“接受失败”，因为你觉得自己失败，就唔会有动力企返起身，但人可以“认输”，输一铺要企起身再打过，“我会认输，下次谂下点解会输！”

马时亨仲话，糖王郭鹤年在其自传中曾经讲过，一个人最大嘅问题系成日都赢，唔识输，“你太成功，未试过失败，变咗‘成功乃失败之母’！”讲得兴起，马时亨仲即席改编成另一金句——“输为成功之母”，佢仲话︰“冇输过嘅人可能会刚愎自用，一铺清袋！”

今年69岁的马时亨，人生经历丰富，做过商界领袖亦做过高官，左右逢源，而家讲失败好轻松，但实情佢嘅事业都唔系一帆风顺。小珍听马时亨讲过，佢港大毕业后，入到美国大通银行担任分析员，听落风光，但有一次获公司委派至纽约长驻，曾因为与当时的上司唔夹，每日被老板责备而流下男儿泪，由于签证限制，唔可以随便转工，加上果个年代冇手机冇Whatsapp，只可以“自己一个人喺间房到喊”。好在，佢无接受失败，最后仲做埋加拿大银行首屈一指嘅银行分析员，跌低咗都企起身！