【温多娜手记】农历新年随时炒起 星展利是封金童玉女又大一岁！
撰文： 温多娜
出版：更新：
农历新年临近，又到咗各大银行向客仔大派利是封嘅时间。其中星展银行嘅利是封，唔单止被网民誉为“新年必抢Item”，而且仲有价有市，年年都畀人掟上讨论区及拍卖网炒卖！
猪年BB阿星阿展12岁识打扮
利市封咋嘛，有咩好抢？除咗利是封上一对金童玉女阿星、阿展够晒Cute，原来星展仲会每年帮佢地换样同买新衫，够晒新鲜感！话说阿星、阿展喺2007猪年时首次登场时仲系BB，但眨眼间嚟到下一个猪年，佢哋两个都已经12岁，唔单止大个仔大个女，仲开始识得打扮。
今年囡囡阿星戴咗个金色发箍，仲穿埋一对星展Logo嘅耳环，而囝囝阿展就特登Gel起个头向大家拜年！见咗阿星阿展咁多年，究竟佢哋代表啲咩？星展解画，其实阿星阿展代表亚洲嘅小朋友，象征亚洲嘅未来咁话。
有呢对可爱小朋友加持，难怪星展利是封每年农历新年都“争崩头”，旧年亦有唔少人摆上网卖，每包8封开价由20蚊至30蚊不等。但唔知系咪为咗打压炒风，星展今年决定公开派利是封，无论系咪客仔，都可以上佢哋Facebook专页玩游戏，只要答一条简单问题，就可以赢到新一年嘅利是封，仲有得抽奖添。
不过小编试玩后，发现原来第一轮利是封已经火速派晒，如果想抢先一睹阿星阿展嘅风采，就要留意下周一（21日）开始嘅第二轮游戏啦！