【温多娜手记】宝贝女牛一 叶茂林拣咗件窝心礼物 你同我都啱！
撰文： 温多娜
出版：更新：
上回讲到，叶茂林次女叶颕恩“回归”耀才（1428）做主席助理，旋即搞咗场迪士尼Halloween同乐日，让全体逾300名员工提前感受下万圣节气氛，公司上下乐也融融。
事隔无耐，耀才又“开P”！原来，今日系叶颕恩嘅“牛一”，全体员工日前就率先帮太子女搞咗个温馨又隆重嘅生日派对，有埋汽球花篮同精制生日卡，心思十足。
不过，大家最关心当然系叶茂林送咩畀宝贝女。答案话易唔易，话难唔难！叶生勤力就系人都知，估唔到佢连拣礼物都“贯彻始终”，就系一幅“成功须苦干”的字画，希望借机勉励宝贝女须坚毅不屈、锲而不舍地朝著目标进发。
的确，“成功须苦干”呢句嘢出自叶生把口，又真系几有说服力。温多娜出道浅，但睇返旧访问，白手兴家嘅叶茂林，年少时以小贩摆卖为生，买卖成衣出口配额赚第一桶金，创立耀才证券后，事事亲力亲为。所以，佢仲同阿女讲，即使有父母开路，但亦不应以“父干”态度去面对人生，做人必须要坚持“苦干”，累积无数汗水和心血才能摘取甘甜的成果。叶生，阿女听到你循循善诱，仲唔心到甜埋咩！