NGO推服务鼓励打工仔做义工　累积服务时数可兑换与名人见面机会

众所周知香港人唔做义工嘅三大借口：好忙、好攰、顾掂自己先啦！而喺Time Auction做过好几次义工嘅Elphie就话你知：“今时今日做义工可以帮到人之余，仲可以upgrade你嘅CV！”

开始之前等笔者简介吓Time Auction先啦，佢哋系2014年成立嘅NGO，鼓励大家做义工以义工时数换取同社会领袖见面学习嘅机会（例如盛智文、曾俊华、Sammi郑秀文等等）另外就系帮其他嘅非牟利组织去揾佢哋需要嘅义工，希望由copywriting、programming甚至fundraising嘅人可以帮手做吓大大小小嘅project。

相关文章：揾工｜见工时HR追问日后会否进修该怎答？　网民提醒：诚实就输了

CV起码加廿分

Elphie本身就识得网页制作，所以佢就喺Time Auction揾到帮长者服务为主嘅铭恩中心做网页设计。佢分享：“帮长者设计网页要考虑好多嘢，字型要大啲，elderly-friendly嘅元素要多啲。如果用家系小朋友，website就要色彩缤纷啲、有互动性嘅元素喺入面。总之就睇𩠌食饭，符合用家需求。”

Time Auction嘅Program Manager - Annissa就话：“其实依家机构揾义工卖旗、派饭盒𠮶类相对容易揾，但要揾有技能嘅义工例如consultant、fundraising、web developer等等就比较难。所以今时今日嘅义工已经唔再系‘扶阿婆过马路咁简单’！”

所以当你喺CV上面摆呢啲project，唔单只show到自己嘅能力，仲反映到自己喺工作以外嘅achievement，HR都自然对你感兴趣啲啦。

做义工≠帮人打工

Time Auction发现其实有好多香港人都钟意做义工，纯粹系好担心做义工会做埋啲唔系佢哋真正想做嘅型别。所以好多用Time Auction嘅机构都因为惊chur亲啲义工，将啲大project斩件。

例如拍一条宣传片先算，成team人可以系一个负责拍片、一个负责后制、一个负责剪片，等大家选择去做自己擅长嘅嘢之余，又可以储吓portfolio。

所以喺Time Auction上面嘅project，每个义工最多做40个钟又得，最少1个钟亦得，得咗。Elphie仲话：“好多时都系我chur返啲机构，问佢哋拎feedback，因为佢哋本身已经好多谢你肯帮佢哋手，所以有咩事都会问返你意见，真系尊重你嘅专业。”

而做义工嘅另一个好处，就系可以接触多好多范畴、industry等等。当然每个人都可以话自己唔得闲、好攰（而事实上香港打工仔都真系好忙……），但如果你帮到人之余，又可以累积人脉、整靓份CV，成件事就已经好唔同。

Time Auction感谢做义工嘅你

点解要叫做Time Auction？就系希望义工用时间去回馈社会，同时又可以收获到一啲有意义嘅学习体验。所以Time Auction嘅reward system就可以畀义工换取唔同嘅experience。

至于最多义工参与嘅就系“与社会领袖对话”，例如你可以去同郑秀文(Sammi)倾吓偈，又或者同Golden Scene嘅founder食个晚餐等等。

而Time Auction仲会同唔同嘅企业合作，等一班义工可以用工作时数去参加免费工作坊，例如你可以学点样整cocktail，甚至包你酒店staycation都得！

最后笔者想讲，今时今日做义工唔系单纯付出、奉献、体力劳动。如果你识拣最适合自己嘅义工project，你唔单只可以帮人之余，仲可以upgrade自己。当世界好似越嚟越自私自利嘅时候，希望“做义工”呢件事喺香港慢慢都会变成一个潮流同风气，好似行山、打卡一样成为大家嘅日常！

后记： 话说早排有一个NGO嘅创办人因为武肺滞留咗喺法国，返唔到嚟香港。咁可以点算呢？于是佢就即时喺Time Auction揾咗一班义工帮手，啲义工就同个founder讲自己可以commit几多个钟， 然后founder就会因应啲钟数去比tasks。后来仲有埋自己嘅WhatsApp group， 变埋做成条team呀！

相关文章：揾工｜生得靓仔靓女较易畀人请？　样貌成考虑条件原来有5大原因…

【本文获“Wantedly Hong Kong”授权转载。】