做广告竟要执牛屎、熨M巾？ 从3个故事一窥广告业生态｜行业百态
不少年轻人对广告行业有着一些幻想，认为投身其中便可把天马行空的想法带到现实。有这种想法不一定是坏事，但同时亦要明白，只有把各式各样的现实问题处理妥当，才可以造到“梦想成真”。
且看《拍广告其实唔难》一书作者斗零的分享，以更了解从事广告行业的辛酸与挑战！
以下内容节录自《拍广告其实唔难》：
有屎边个执？
每一份工都有佢嘅辛酸，而广告制作呢行嘅“血与汗”就更加唔讲得笑，笔者咁多年嘅特殊经历就由呢篇开始，慢慢同大家分享。
入行初期，经常会因周围去唔同地方拍嘢而高兴，不过𠮶次就高兴唔嚟。当时去到飞鹅山，天朗气清，风景优美，众人拍得兴起之际，突然有只牛喺大家面前行过，然后施施然咁喺路中心放低“几両金”。由于嚿“金”好大笃，所以大家都觉得好好笑。不过大家你眼望我眼笑完一轮之后，就好自然咁一齐望住我。
相关文章：做广告难有“安乐茶饭”？ 香港只得饭冰冰外国却有…｜行业百态
当然啦，呢啲咁粗重嘅嘢，梗系新嚟新猪肉去负责啦。咁多位读者，你哋人生执过最大嘅屎系咩屎呢？当年眼前呢一笃好似砧板咁大嘅牛屎，我系点样执嘅呢？
由于执屎嚟讲我都系新手，而且出发前根本都冇预备要执屎，所以连架生都冇。前辈就教我喺现场揾一啲小工具帮手，好彩喺现场揾到一块大木板，然后我就逐下逐下咁，将堆好fresh嘅牛屎，由路中心向住山边挑走喇。
多年过去，呢个咁有味道嘅画面依然历历在目—应该系挥之不去先啱。
男人心．熨M巾
以前每次去同广告学生sharing 都会讲呢个故事：
广告制作同电影制作嘅最大分别喺边度？就系产品镜头（Product Shot）嘅处理。依家电脑特效普遍，而且后期弹性大好多，好多时产品都会用CG呈现。但喺以前CG 冇咁流行嘅年代，每次拍Product Shot 都好考制作组功夫。
正常情况下，边种产品系男性制作同事最少接触呢？就系女性生理用品喇，例如卫生巾。M 巾嚟讲，好多时广告都系想带出佢贴服嘅一面，咁点样先可以拍得佢贴贴服服呢？
答案就系熨喇！因为喺包装袋拆出嚟嘅M 巾，大部分都鬈埋咗同埋好皱，所以就需要将佢熨番平，令佢冇晒折痕。图中𠮶位男同事，啱啱入行无耐，喺一日内熨左成百条M巾，𠮶日应该系佢人生入面接触最多M巾嘅一日…… 。依家呢啲经历应该买少见少喇。
喺街飘花瓣
正所谓天有不测之风云，导演要求就烦死人！除咗要好天落雨，导演有时仲会想个天落其他嘢，例如花瓣。
喺依家电脑特技咁普遍嘅年代，呢啲镜头只需要后制同事坐喺电脑前做几日几夜就ok；以前呢？就需要一班同事整花瓣道具，例如用绉纸剪好一堆，然后拍𠮶时分几边喺唔同角度掉出嚟，咁先可以好均匀咁遍布画面每一处。跟住先系重点，就系拍完每个take，第一时间冲出嚟扫走晒佢。如果拍摄场景干净都仲好啲，啲花瓣道具可以回收重用；相反，如果地下唔干净，或者好大尘等等，就要预备好多花瓣先得。
我就曾经试过喺草地抛绉纸花瓣，拍完之后摄晒喺啲草堆入面，几乎要逐块用手执咁滞。最惨仲要拍完嘅时候差唔多天黑，有灯光手足好心帮我打盏灯照明，点知吸引大堆飞虫过嚟，我要一边拨走佢哋一边执……Btw，依家其实就算唔做CG，都可以上网买花瓣道具，唔使再叫手足困喺公司系咁剪。
▼▼▼【相关文章．按图放大率先预览】▼▼▼
书名：《拍广告其实唔难》
作者：斗零，英文名Penny
2000年毕业于香港浸会大学传理学院。毕业后加入offlohi制作公司前身Such Partners，先由制作助理开始，慢慢在不同岗位学习，后来成为广告导演。先后执导八达通、利宾纳、百老汇电器、Canon、Wechat等不同品牌超过200个广告。其中与韩国演员李光洙合作的能得利广告更在一星期达到100万YouTube点击；而Priligy JJ-man广告亦曾得过国际奖项。除拍摄广告外，2016年更成立“拍广告其实唔难”Facebook 专页，与喜爱广告制作的同路人一同分享专业资讯。
【本文获“非凡出版”授权转载。】
立即下载《香港01》，紧贴公务员职位空缺、劳工处笋工推介，了解CV、面试致胜技巧！下载网址：https://hk01.app.link/bkbJyY5t4O