【转工须知】掌握市价免蚀底　即睇4大行业入行及中层薪酬水平

每个打工仔都会想知自己老板有冇“待薄”自己，又或者想知自己究竟值几钱。笔者近排有朋友（下称L）做完salary review，一路讲就一路喊……同大家讲吓佢嘅经历。

畀少少L嘅背景资料大家先：美国读mechanical engineering回流，发觉香港冇乜呢类工作，而家喺某大公司做紧operations，发觉自己比平均人工低咗一截。于是佢早几日就谂住探一探老板口风，想知人工大概会加几多，佢老板冇直接答佢，反而话：

老板：其实你先入咗嚟4个月，你觉得你为公司贡献咗啲咩？再讲，你由一开始做嘅嘢如果冇人教你，你会唔会识做先？

L ：由入职到而家，我做到嘅我都会做好畀你，你都知我冇hea过你。

老板：其实你系帮人问定自己问呀？我都知你帮得手，但我都要企喺公司立场谂，同埋你嘅人工已经比一般嘅fresh grad高，你心目中系想加几多？

喺呢个moment，L就知道佢老板根本就唔系想知佢个“价”系几多。

L：我啱啱先出嚟做嘢，加几多人工对我真系唔太重要，我其实会想学多啲嘢，尤其是同“mechan”有关嘅，而唔系而家乜都要做啲咁。

老板：呢方面我会帮你争取吓，后生仔上进有野心系好事，我同你讲嘢都唔会转弯抹角；至于人工𠮶边我尽量帮你同HR倾啦，加就一定会，但至于加几多我真系话唔到事。

讲到人工加几多，最近嘅一个薪酬调查就话今年大家份粮实际上只会加1.9%，假设一个月揾万五，即系一个月会多咗大约300蚊，连一张“都会票”都买唔到。而L亦都系其中一个“受害者”。但如果大家有谂住转工嘅话，成件事就唔同讲法啦㖞。国际招聘公司Robert Walters就话如果今年“跳槽”，人工可以加成10-20%，最高仲可以去到30%，你都咪话唔“和味”。

既然系咁，等笔者同大家约略分析吓某几个工种而家嘅人工啦：

1) Software Engineering

而家乜嘢都要digitalized，就连买嘢基本上都可以连楼都唔使落，呢行梗系“吃香”啦，新仔入职中位数去到成20,000；如果已经做咗几年嘅话，仲上到去成35,000左右，其实IT狗都几幸福吖。

2) Digital Marketing

大家有几耐冇听过“时兴隆与你”？梗系啦，今时今日嘅marketing已经好多都变哂online，所以好多公司都不断请紧呢班人，无论你落ad又好，做content都好，都一样大把人争住请。刚入职嘅中位数已经上到20,000；捞多几年就已经35,000一个月，做中产真系不是梦。

3) Operations

虽然而家好多工作都自动化，就连“无人超市”都已经面世，但好多公司都仲需要一班staff喺背后“mon”住个system，确保所有程序都畅通无阻，好似“高铁”一样。所以就算你系新仔都好，人工中位数已经有15k，啱做嘅咪做多几年，因为做做吓就变咗25,000㗎啦～

4) Customer Service

同operations一样，而家嘅AI又未聪明到可以帮你“凑客”，所以就算有“大妈”喺机场“碌地”讲普通话嗌到“拆天”都好，都要有CS去处理嘅，辛苦就梗㗎啦，有边份工唔辛苦㗎？但头3年人工最高已经可以去到30,000，做多几年仲唔fat fat？

以上畀大家嘅资料都系等大家参考吓，叫做有个谱。

笔者认为返工嚟讲，钱系重要，但有更多嘢比钱更重要，就好似系你学到几多嘢、识到一班点嘅同事、返工返得开唔开心……所以喺揾工或者转工嘅时候，希望大家除咗向钱看之余，仲会揾到一间好公司，一班好同事。

【本文获“Wantedly Hong Kong”授权转载。】