【职场心灵】纠结将来　想砍掉重练？　一句话知你是否活在当下！

各位读者大家好，系呢个无希望的年代，我想借呢个平台分享下自己经历。
小弟今年30岁，本地非三大文科毕业，第一份工月入8K，在传统媒体做。众所周知，传统媒体一早已经系夕阳行业，入到任何一间传统媒体工作，你会体验咩叫“世界末日前夕”的感觉。你会见到，早你10年入行的老前辈，就算识几多嘢，收入都可能不如一个餐厅经理。系里面，成日都有人Last Day，同事坐埋一齐就系倾 “打算做到几时？年底？”系真心Sad的环境：冇高收入、冇前景、冇希望。
如是者，我自己都做咗一两年，走𠮶时人工先刚刚过10k，系社会眼中的废青。

反正唔知做乜好，之后我做咗所有废青都会做的：Working Holiday去澳大利亚。

所谓出国十年，老尽少年心。我出国一年，其实都有唔少体会。其中一个重要体会，就系领略到“事在人为”四个字的意思。

系澳大利亚做过几份散工，到最后系卖雪糕，但系在颇高级的名牌雪糕店卖，由朝到晚整到无停手，永远都有人排紧队，后来我发现原来个老板都好后生，之前试过几次创业都无乜作为，最后做咗呢间雪糕店，结果生意大好，粗略估计系印银纸咁好赚。一个30岁唔到的后生仔，已经赚到好多人十年都未必赚到的收入，同埋请到一大班员工。

第一次体验到，赚唔赚到钱以外，一个人如果坚持做一件事，甚至几件事，只要坚持，最终都好可能做到一点成绩。 与其怨天怨地，不如认真思考如何做得更好，同埋努力将心里订立的目标做出来。

带着呢份信念，我返来香港后做左几份工，都系返去老本行，又转过去Ad Agency，终于辗转转到一间外国媒体巨企，从Sales Assistant做起，日日帮班Sales大帝准备Powerpoint、Pitch Deck，买咖啡买饭订餐厅填Reimbursement form。

曾经，有一排我都好迷茫，经历事业失速期，升职无望，可能呢啲机会真系永远轮唔到我，因为我学历唔够、英文唔够好、冇外国背景、冇Connections，曾经以为自己好醒，但原来出到来点都唔够其他人犀利等等。

心里盘算着各种可能性：“可能我应该去考纪律部队，人工又高又稳定”、“可能我可以去试下报国泰的Cadet Pilot Program，做机师又有得周围飞人工又高”、“可能我应该移民去台湾，砍掉重练，展开新生活。”每日放工时间，只会花好长时间在纠结自己的将来，究竟我适唔适合做我𠵱家做紧的工作？我系咪永远无机会？究竟我应该做乜？究竟我有咩叻？成日都睇好多资料，关于移民，关于其他行业，尝试得到短暂的希望。

身边的朋友，都系比较负面，对所有野都采取一种嫉妒或者愤世嫉俗态度，觉得所有野都唔公平。另外一些人，虽然牌面好好，系十分好的学习对象，则好似好不屑同你做朋友。

有大半年左右真系每日都陷入自我怀疑。

但唔知到边一日，突然又再想起“事在人为”四个字。突然间，内心有把好有力的声音话畀自己知：

你冇退路，你冇其他嘢好做，冇其他地方好去，你应该认真做好你𠵱家做紧的事，系要做到最好。

的确，大家都得24小时，点解有D人Achieve到咁多嘢？点解另外咁多人一事无成？系IQ？定系运气？系自律啊！自律就系，每日大概2至6小时的工余时间，你会点用？

知道自己英文蚀底，我立志要IELTS提升到8分，每日搭车听英文Podcast，系认真听个嘴跟着读，个脑认真思考Podcast内容。知道学历同Connections唔够，报咗某三大的PT Master，学费认真贵，可谓孤注一掷，但个两年真系用尽自己所有时间同精力，顺利毕业而且识到好多好Ambitious志同道合的朋友。

时空流转多几年，终于坐正左做正式Sales，主要针对企业方案，一个一个Package卖畀企业，每日都“on the road”，奔波劳碌，Pitch唔停手。条数原本都好细，公司本身对我冇乜期望，只系咁巧合有人走又未揾到其他人做，所以有个位叫我顶上。但好快条数就慢慢Pick up，总算开始储到自己的客源，而且唔系Hard sell，而系永远多做一步帮人，而且对产品同市场行情俾所有人更加熟悉，将工作化为自己兴趣，时刻有动力做嘢同回答客户问题。

托赖亦有运气眷顾，月收入总算突破10万大关。当然，跑数工肯定唔会稳定，所以唯有更加努力。其实好多事情，确实系“事在人为”的范围里面，谋事在人成事在天，但首先你真系要认真为自己的前路思考同打算，敢想敢做拼命做。

回想自己当初的困窘，想同大家讲，如果连我咁都有可能去到今日呢个位，大家都一定可以，记住要积极乐观，记住凡事事在人为，你都一定得。

SJ结语

好励志，好欣赏呢种“事在人为”的信念，连SJ小编都受启蒙，可能真系要去读个MBA！

【原文转载自StealJobs.com。StealJobs全面透露各行各业人工，工时，晋升前景，以及入行攻略，欢迎匿名提供收入资料。】