【彩妆冠军】编辑精选！2019年度平价开架品牌化妆品大赏 — 上集

2019年即将完结，又系时候嚟总结一下今个年度用过最满意嘅化妆品💗。呢一年来，小编都尝试过大大小小唔同品牌嘅化妆品，当中有唔少产品都系因为被网民、Youtuber、KOL疯狂热捧，导致小编都按捺唔住，决定买嚟试试，果然一试便知龙与凤。喺经历过一次次中伏嘅体验后，小编决定要同各位姊妹们分享一下呢一年来小编用过最满意，使用率最高，甚至已经系无法再离开佢嘅No.1彩妆品。以下全部都系平价又好用嘅开架化妆品，推荐畀一众学生、化妆新手以及小资女。事不宜迟，一齐嚟睇下你哋心目中嘅第一位同小编一唔一样喇😊！

🏆妆前乳冠军🏆

EMBRYOLISSE 恩倍思 保湿妆前隔离霜 HK$149​

EMBRYOLISSE 恩倍思系来自法国嘅品牌，人称“法国大宝”，亦被网民评为去法国必买嘅药妆品之一！而当初会火红嘅原因就系因为范冰冰喺个人小红书帐号上大力推荐过，更自称一年四季都会用佢嚟作为妆前打底。

“法国大宝”其实就系一枝具备保湿、滋润功能嘅乳霜，并无任何调色及遮暇效果，但胜在超级滋润又唔油腻，用佢打底后上妆，妆效会明显贴服好多，唔会卡粉。有时小编懒起上嚟，早上搽完化妆水后就只搽呢枝乳霜就直接开始上粉底，皮肤都可以Keep住全日滋润唔干燥唔起皮。强烈推荐畀​混合偏干及大沙漠肌肤姊妹！

🏆粉底液冠军🏆

EXCEL 净采精萃粉底 Skin Tint Serum SPF 28 PA++ HK$169

当初小编就系被“含有81%美容液成份”呢个卖点深深吸引，反正价钱又唔贵，所以就买嚟试试。点知，一试就即刻爱上，连平时用开嘅专柜粉底液都立即被打入冷官。EXCEL净采精萃粉底主打高成份美容液，含神经醯胺、桑根皮精华与芍药精华。所以质地非常水润，流动性高，即使徒手上妆都非常易推开。而且妆感轻薄又贴服，最值得一赞系可以做到专柜粉底液嘅水光感，搽上脸后会自带自然嘅光泽感。

可能因为含有高保湿美容成份嘅关系，所以基本上全日都唔会溶妆、浮粉、卡粉，即使返咗一日工，到咗夜晚妆容都依然Keep到好完整。小编好有几次搽完呢个粉底液都会有朋友称赞小编皮肤好咗，又或者会问点解今日个妆咁贴服。若果你系混合偏干或干肌姊妹，同时又追求自然轻薄又水润嘅妆感，EXCEL净采精萃粉底一定会令你觉得惊艳。相对地，呢枝粉底液遮暇力比较弱，大约只有6成遮暇力。黑眼圈、痘痘印等需要另外再用遮暇膏。适合混合偏干及大沙漠肌肤姊妹！

🏆遮暇产品冠军🏆

MAYBELLINE FIT ME！柔滑遮瑕膏 HK$79

“MAYBELLINE FIT ME！柔滑遮瑕膏”相信姊妹们对佢都不陌生，早两年前已经非常火红，喺小编目前为止用过开架品牌当中最好用嘅一款遮暇膏，亦已经回购再回购咗好几枝，一般都会用嚟遮黑眼圈、嘴角、鼻翼等肤色暗沉部位。FIT ME遮瑕膏属于轻度遮暇，搽上脸后基本上会自然融入粉底，并唔会有一层厚厚嘅粉感，唔会突兀。而且只要妆前打底做得足够，基本上一天下来，眼底都唔会起干纹或浮粉，持久度非常好。

🏆定妆产品冠军🏆

RCMA MAKEUP No Color Powder 坊间代购价$100-$150内

RCMA Powder又称“胡椒散粉”，皆因佢嘅包装同樽装胡椒粉非常相似😂。价钱平价，坊间大部份都系卖$150内，但一枝容量竟然有足足3oz咁多，小编用咗差不多一年都未用完一枝。所以最大优点就系平！平！平！

撇开价格优势以外，粉质都系无可挑剔，粉质非常细致，颜色透明，上脸后毫无负担感，而且修饰毛孔效果非常好，鼻翼两颊两边嘅粗大毛孔都可以遮到仿佛开咗美肌模式一样，上妆后效果系哑光妆感。不过，如果你系大油田肌肤，可能控油能力就未能够应付到夏天季节，比较推荐畀混合肌或偏干肌肤姊妹。

🏆眉笔冠军🏆

Excel 3合1持久造型眉笔 HK$129

Excel眉笔都系长胜将军，事关佢又再次蝉联小编心目中排行榜嘅第一位，回购次数已经起码超过十次以上。集“眉笔、眉粉、眉扫”三大功能于一身，只需要一枝眉笔就可以KO整个眉妆！最大优点在于眉笔笔芯属于椭圆形，用多几次会变成“砍刀形”，方便描绘眉尾形状。而且笔芯软硬适中，非常出色，但颜色自然，唔使怕会变蜡笔小新眉😂。推荐畀一众画眉新手，基本上唔会失手。

🏆眼影冠军🏆

Etude House 伊蒂之屋 - Play Color Eyes BAKE HOUSE HK$ 134.81

韩国品牌嘅眼影盘，小编都试过唔少，而普遍通病就系相较欧美品牌眼影冇咁显色。不过，Etude House呢款Play Color Eyes BAKE HOUSE眼影盘竟然冇呢个问题！眼影显色度高、饱和度高，而且颜色全部都系大地暖色系，唔会过份浮夸，适合日常返工返学用，因此都系小编日常使用率最高嘅一盘眼影。一盘总共有十只颜色，无论系眼皮打底色、眼窝阴影色、卧蚕提亮色都有齐，即使出国旅行都只需要带呢一盘眼影就搞掂喇！

🔻点击下图睇年度化妆品冠军总结图🔻

胭脂、唇妆、眼线、睫毛膏、打亮、修容嘅第一位产品将会喺下一集公布，姊妹们记得锁定《网购攻略》，密切留意住下一集喇！💗

(产品资料以官方最新发布为准)

唔想错过任何网购限时优惠？立即 Like 《一网打尽》Facebook专页同加入Telegram Group啦！你仲可以拎到独家优惠码及礼品𠻹！

👉按此赞好《一网打尽》Facebook专页👈 
👉按此进入Telegram优惠码发放区👈