【来稿】中大人点解会有“拖鞋病”？ 浸“村味浓”系点嚟？
有人话，港大嘅校服系A&F同Hollister，喺HKU Secrets仲有人问，港大几时收购𠵱两间出校服。同港大有强烈对比嘅，非中大莫属。之前CUHK Secrets出咗个post：“挣脱鞋带社会枷锁，解放脚指展露自我”，列出“拖鞋病”嘅四个阶段同病征，分别系潜服期－宿舍著拖鞋、早期：著拖鞋上堂；中期：著拖鞋出沙田；末期：周末著住拖鞋返去屋企，有人留言补上第五期：“上环返工都系著拖鞋，我试过，我真系试过”。我喺中大读咗三年半undergrad、两年part time master，可谓病入膏肓！我曾经努力挣脱中大味，化妆、著高跟鞋返学，之但系，悉心打扮嘅人，几乎系中大嘅少数族裔。
撰文：五年半山城人
毕咗业都洗唔甩嘅村味
有日，有同事同我讲，佢去中大做嘢，见到中大人真系“村味浓”。佢话，最顶唔顺嘅系中大人著“颓SOC”Tee（编按：即迎新营用的T-shirt），加对人字拖。仲话，人著短裤，我哋著短裤，人哋睇上去系热裤，我哋睇上去似睡裤。
于是，我开始谂，点解以前返学真系可以咁颓？𠮶阵颓气，真系毕咗业都洗唔甩。
其实，开学初期，就算要返八半堂，我都会晨咁早起身化个妆，衬件靓衫。大学生活㖞，向往咗咁多年，一定要好好享受，有个好形象。点知一返学就梦想破灭，个个同学（尤其住宿嘅同学）都系瞓醒咁款，洗完头冇吹头，冇洗头冇梳头；女嘅冇化妆，男嘅冇gel；好多人著住嘅拖鞋，唔系有造型嘅拖鞋，而系喺屋企或去游水著嘅“颓拖”，有啲好少少，就著有一轮好兴嘅“松高拖鞋”。著住拖鞋，上堂时仲可以除鞋翘脚，或者干脆盘膝而坐，或者用脚趾甲抓痕，超爽皮！
98年情人节车祸致瘫 女设计师放弃寻死 高呼：坐轮椅都可以扮靓
扮靓＝出街街？
你试谂吓，当你化哂妆，著条靓靓裙上堂，但身边嘅同学都系落楼下咁款（其实因为好多人都上庄，日日通顶搞庄务，好难唔颓），你就系异类。我试过著短裙、高跟鞋返学，有不下五个人问：“哗！你今晚去边？”、“你约咗人呀？”、“又去老兰？”我想笃笃手指咁答，其实我𠮶日冇约人，甚至𠮶日只系去楼下补习，因为返学见同学，想扮靓啲啫，但我真系开唔到口。
久而久之，我都唔敢太打扮，仲“德成女佣，融入家中”，好快融入中大嘅大家庭，著件紧身T-shirt（我坚持唔著颓Tee！），衬条似返条热裤嘅热裤，配对松高拖鞋，喺中大行走，真系宾至如归，有家的感觉。我仲试过踢到文化中心睇歌剧，但俾个搣飞员赶返出嚟。
毕业之后，去沙田新城市行街，见到险被行李喼辗过嘅拖鞋人，一睇就知系师弟妹，好有亲切感。
山城人自成一角
我都试过脱毒。Year2 𠮶年去咗日本exchange半年，喺日本生活，化少日妆都好似冇礼貌咁。有啲好熟嘅日本朋友，明明已经成日一齐玩，一齐去旅行，但去旅行期间，有一两日宅喺民宿唔出街，佢都会化妆，佢话𠵱个系对人同自己嘅尊重，搞到我即刻无地自容(~_~;)𠮶阵剪咗个齐荫，畀多少少心机化妆，振作咗半年，但返到香港一个月又打回原型。
呀，中大人仲有一个堂堂正正嘅理由著得颓。唔同港大、理大、浸大、城大咁位于市中心，见嘅都系市区人，返工嘅返工，出街嘅出街。但中大校园依山而建，周围都系花木扶疏，同鸟兽虫鱼同处一山，好少外来人，系自成一角嘅小社区。住宿舍嘅人返学，就好似喺屋企开房门，出厅兜一转咁自在。至于好似我冇住宿嘅朋友仔，搭程车就到山城，对住椰林树影，鸟语花香，依然好适合解放脚指展露自我。
山城有个赤脚勇士，赤到出油尖旺？
但查实，对青春奔放嘅灵魂嚟讲，著拖鞋都可以已经系好深重嘅枷锁。中大心脏位置嘅某大属会会室，曾经聚集全香港最讲求批判解放嘅进步分子，中大人口耳相传甚久，未入其房，先闻其味。进步分子嘅进步之处完全体现响佢哋嘅生活作息，晚七朝七赶稿议事打机，会室瞓会室食会室疴，有机垃圾同唐君毅全集相依共生。唔好话佢哋靡烂，𠵱啲叫做对“卫生”、“体面”、“爱自己”等等主流资本主义价值嘅激进抗争，而𠵱啲生活习俗仲会代代相传，在庄友间几乎从未失传过。而𠵱班进步分子之首，要数N年前嘅会长，哲学系出身嘅赤脚勇士。
佢系一头魁梧嘅熊人，入学冇耐，就开始唔洗头、冲凉、梳头、换衫，同埋唔著鞋，唯独系，头上永远要戴住粉紫色嘅头箍。佢赤脚走遍中大大江南北之余，去到你唔会想像到嘅天涯海角，最常去系油尖旺麻雀馆。佢系黑格尔后人，华文世界新世代最有潜力嘅思想家，既系哲学系内儒人哲人教授嘅爱徒，乞衣style滔滔雄辩起来charm尽众生，同庄友议论生命意义政治变局亦无不大杀四方。相信大地尘土深深孕育咗佢，是故，佢继续唔洗头、唔冲凉、唔梳头、唔换衫，唔著鞋，粉紫色头箍，由硕士读到博士，做老鬼做到长驻会室，十几年，始终如一。但道行再高也终有朝山上丧，年前某day佢深受无药可医嘅脚患之苦后就从此要著上一对鞋，无鞋嘅雀仔从此消失。（小消息：𠮶对鞋咁多年又系冇换过）