DSE放榜｜因社会事件入狱青年考获18分：学习令人变得更好

DSE中学文凭试上周三（20日）放榜，每年都有一批“铁窗”下的考生。将于今年底出狱的小杰（化名），因2019年社会事件被判入壁屋惩教所，有中六学历的他在狱中决定重读DSE课程，除主修科外，选修经济和旅游与款待两科。

上周放榜，他考获六科共18分，拿到入读大学学士课程成绩要求。他希望未来投入科研帮助受疾病困扰的人，亦相信知识改变命运。

院舍无法上网　靠看参考书字典学习

“喺院所最大嘅分别就系冇得上网，冇得用电脑电话。”小杰本来习惯不懂的问题便上网查阅，但入狱之后就只能找参考书和字典，结果却出乎意料地有效。“初头以为咁样会好嘥时间，但系时间耐咗发觉效果更好，因为用电脑揾资料会分心睇娱乐嘅嘢，咁样可以令我集中精神准备考DSE。”除此之外，老师亦准备充足教材，重点培训他较差的中文科，令他成功达标。

狱中囚友“大家都系普通人”

小杰说，囚友们都是普普通通的年轻人，“就如同我哋普通喺街上面见到嘅一样，冇乜分别。”班上有七至八个人一起读书，考文凭试可以住同一间房，互相鼓励。大家除了上学还要接受纪律训练，例如步操等等。

惩教所职员讲人生道理：屋企人比你更加伤心

“特别难忘嘅经历系，刚入嚟嘅时候职员见到我比较沮丧，可能已经见过好多好似我咁嘅青少年入嚟，同我讲咗啲人生道理，例如你而家自己伤心，其实屋企人更加伤心，大家都唔好受，所以都明白到要关心多啲屋企人。”

小杰强调家人“无条件锡我”，出狱后会好好珍惜与家人相处的时光，报答他们。“入院舍之后先至更加放开坦诚咁同屋企人相处，因为一个月先见得几次，好多心入边嘅话都容易咗讲出嚟，因为大家都挂住大家。出到去会生生性性唔会再令佢哋担心。多谢一直以来嘅支持，同埋爱。”他多谢院所和老师的支持和鼓励，驱使他努力考好成绩。

“学习会令一个人变得更加好”，他相信知识改变命运，更呼吁下一年考DSE的囚友，“想叫佢哋好好加油，珍惜自己学到嘅知识。”

疫情间看到人们因病受苦 冀做科研回馈社会

小杰从小到大的兴趣都是生物科，年幼时会看国家地理杂志。被问到以后的发展，他表示想做科学研究，“因为喺疫情之中我见到好多人因为疾病而受苦，想喺科学度做啲研究帮助到社会，做到回馈社会，反而赚钱系次要。”

狱中遇疫情考试更困难　班主任：考生专注力更集中

“坊间系由中四读到中六，有三年时间，呢度10个月就要教哂。”壁屋惩教所中文科老师丶班主任及助理教育主任陈翔表示，他须在短时间内教授整个DSE课程，时间仓卒。

而在疫情期间，院舍内需减少接触，陈翔会穿保护衣见学生。有时一位老师进监仓，其他老师就委托这位老师把资料或笔记“搭单”递到学生手上，学生做完功课又递给职员转交老师。对付疫情，陈翔觉得心态是致胜因素。“有啲同学上紧堂都未必咁有精神，反而知道疫情可能上唔到堂，又知道考试临近，专注力反而更集中。好睇考生当时心态。”而且狱中同侪之间朝夕相对，互相学习，效果亦佳。

读廉颇蔺相如教做人道理　喻社运勿冲动

“一般青少年都喜欢钻牛角尖，特别呢几年佢地睇到网上不实资讯，受到朋辈影响。呢个时候除咗教书之外，仲要教佢点样去做人。”陈翔指学生“犯咩事喺我哋眼中唔系咁重要”。

陈翔表示，因应小杰因社会事件入狱，老师亦于会花时间教导小杰做人道理，“会尽量连系课文，例如课文读到廉颇蔺相如列传，讲到蔺相如处处忍让。好多学生初初都唔明，觉得‘咪同佢死过啰，反正佢为国家立咗咁多功！’直到讲到后面𠮶句，‘先国家之急而后私仇也’，佢哋先至明白国家嘅稳定系咁重要。所以品德情意方面嘅教育都要讲多少少。”

盼小杰日后“忆苦思甜”　不忘惩教所教导

陈翔指坊间可以用三年去陪伴学生成长，但相对而言这里人数较外面少，反而可以专注个别教导，因材施教。“杰仔好钟意睇文学小说或剧集，好多时候都互相分享。当中有啲主角都身处逆境，但都可能用较温和嘅方法去面对逆境，令佢思想上面唔使再钻牛角尖，唔会谂住有不满就用好激烈嘅方法去表达。”

他引用已故国家领导人邓小平讲话，希望小杰日后“忆苦思甜”，不要忘记在惩教所发生过的事，“之前就算有啲咩地方行差踏错，以后做事小心，三思而后行，唔好忘记喺呢度嘅一段时间。对好多人眼中，喺呢度嘅时间可能系黑历史，但亦有宝贵嘅经验与得着。”

身为中文老师，陈翔亦经常拿到学生作文，“佢哋啲作文，好多时都讲关于屋企人嘅嘢，失去咗自由固然系好唔开心，但系最唔开心系令屋企人失望，或者担心。（家人）难得有一日放假，都要山长水远入嚟探监，觉得好愧对家人。”呼吁其他青少年，做任何事之前都都要顾虑身边屋企人的感受。