博评波神揭盅！“01博客陪你估波”一POST睇晒
一个月零两日前，欧国杯未开波，01博评估波大战率先揭开战幕！9位博客、前后38篇球评，比眼光比牙骹，健康过帮衬马会。有人估中牙擦擦，有人一时失手做灯神，有人睇波不忘讲下历史同时事；咦，咁边个系最终波神先？结果出炉，本届博评波神系：马岳！马爷几乎由头带到尾；决赛前，更独排众议，敲中葡萄牙夺冠。博评估波，点止估波咁简单？30几天球评大战之路，一POST睇晒先！
一场估波大战之诞生：淘汰赛前热定身
是咁的，唔觉唔觉，01博评 嘅博客球迷，原来够坐一台！
丹尼尔、波三痴、运动公社 同马岳 就不嬲写开球评；李声扬同廖诗飏 又对足球好有热情；加埋新加盟 01博评嘅撒拉夫同世界波，四年一度欧国杯㖞，揾埋专业无限嘅 01 Sports 体育组，齐人！
咪讲咁多，赛前热身，博客话，讲下故仔先：
分组赛阶段
好喇，牙骹战是咁玩的。第一轮：估分组赛出线的 16 队，每估中 1 队得 1 分。我哋精选咗 5 场赛事，考考班博客嘅眼光，每估中一次主客和可得 1 分。
第一场：开幕战（11/6 法国 vs 罗马尼亚）：当时几乎全部博客都估中法国赢波；波三痴 比较另类，拣罗马尼亚，以致一开闸稍稍落后。
第二场， 14/6 比利时 vs 意大利 ：比利时㖞，世界排名第二㖞，而意大利最红就系钢门保方，难免大部分博客热估比利时赢；马岳同李声扬 虽有先见之明，但都系估和，冇人估意大利赢，于是，估埋第二场，依然未见领先者。
接下来三场： 16/6 英格兰 vs 威尔斯、20/6 瑞士 vs 法国 、22/6 克罗地亚 vs 西班牙，总算开始分到高下。
第一轮估波小结：5 场估中 3 场主客和（估过波都知其实唔易）嘅博客，分别系马岳、李声扬同 01Sports（果然不失体育记者嘅名声！）李声扬仲即刻写咗篇文，同大家分享“估波必胜法”添：《比马会更准的估波必胜法》
又抵李声扬咁牙擦擦嘅，喺十六强出线名单战，佢同马岳都估中最多；以群体方式经营嘅单位运动公社同世界波，表现亦算理想（果然人多好办事）；至于对波衫情有独钟嘅波三痴，就由于 5 场精选赛事仅估中 1 场，加上十六强名单估中最少，暂时包尾，落后榜首足足 5 分，输在起跑线，想扳回，要似巴基之星矣。
分组赛波神：马岳、李声扬
分组赛好文重温：
淘汰赛阶段
估波，唔做灯神，最劲系做咩？梗系做先知。分组赛都打完，我地请一众博客做“先知”，估下边度会夺冠。
于此，榜首双雄开始各行各路。一如所料，德国最多人捧场，包括马岳；李声扬贯彻自己力排众议嘅写文特色，冷敲分组赛表现令人刮目相看嘅克罗地亚；惨在东道主法国只得等做巴基之星嘅波三痴独力支持。
都入到淘汰赛阶段，咪估主客和，必须估晋级。
第一场，黑马意大利对上届冠军西班牙嘅一场（28/6）：马岳 够独特，当大家睇好估西班牙，佢睇好意大利，仲写篇文分析点解意大利“零球星”都值得睇高一线。结果唔使讲啦，于是，榜首清晰左；榜尾嘅波三痴同撒拉夫，同马岳一样具慧眼，估波积分榜距离稍稍拉近。
第二场系“死亡下线”嘅 3/7 德国 vs 意大利。值得注意的是，虽则马岳一早买咗德国攞冠军，但呢场就同李声扬一样，拣咗意大利晋级，有冇策略性考虑？（因为无论赛果如何，佢都可保住榜首位置。）总之结果系榜首双雄一起中伏，反而 01 Sports、丹尼尔、运动公社同廖诗飏都中，叻过榜首双雄都冇用，排行榜冇大转变。
四强战， 德国 vs 法国（8/7），赛果是一地眼镜碎，连累马岳连错两场，而波三痴竟然真系变身巴基之星，凭估中法国，取代马岳，成为估波王！其实喺“先知”赛，佢已经押注落法国。
球坛金句：波是圆的，势估唔到，去到总决赛 葡萄牙 vs 法国（11/7）时，变成马岳与波三痴之争（李声扬无论如何都只能得第二）。呢场马岳同波三痴当然系分别拣咗葡萄牙同法国啦，而最后嘅结果大家都知道，系由 25 分钟失去主力 C 朗嘅葡萄牙，凭住加时艾达卢比斯一球世界波击败东道主法国！
淘汰赛阶段好文重温：
马岳虽然先后受到李声扬同波三痴嘅威胁，最后凭9 场估中 6 场（成功率超66%），勇夺博评估波王！至于李声扬同一直表现稳定嘅 01Sports 分别夺得第二同第三名，同样值得肯定！至于波三痴，虽则最后做唔成巴基之星，之不过由“先知赛”开始睇好法国，算好眼光矣。
P.S. 查实今次“01博客咁睇波”波神博评战，除咗上述 9 个单位，亦有其他博客路过参战，包括有“影子估波王”之称（自称？）嘅蔡子强。波神出炉，蔡子话，马岳要成为“估波王”嘅方法亦好简单，就系“使横手唔畀蔡子强参加”（当然系讲笑……好似系）！计博评组话，今年立法会选情七国咁乱，一系蔡子同马岳转战立法会选举，估下边个做票王啰。