政治审查？　舒琪拒录《香港家书》谈十年：港台的提议我不同意

对方（港台）提出一些建议，我不是很同意，双方最后在很和平、毫无争拗、好ok的情况下，决定取消录音。

演艺学院电影电视学院院长、“香港众志”创党成员舒琪，原定上周为香港电台《香港家书》撰稿，预定录音谈及金像奖最佳电影《十年》，后来却取消录音，文章没有在节目公开。舒琪接受《香港01》访问时表示，港台在审阅有关文章内容后，向他提出一些建议，但他不是很同意，所以取消录音。

他今日凌晨在Facebook个人专页披露事件，部分留言者质疑政治审查，《香港01》曾向港台查询，但至中午仍未获回应。

“港台播唔到唔紧要”

被问及是否涉及政治审查时，舒琪数度重申：“咩原因都唔重要，我唔想针对任何嘢！”但他补充谓，“港台播唔到唔紧要，其他传媒转载就得。”他希望，港人阅读文章过后，会有所共鸣。

舒琪四天前获香港电台的工作人员接洽，邀请他就刚获得《十年》，撰写《香港家书》。舒琪约两日前完成《写给10年后的契仔》一文，并交给港台。他回应指，及后接获同一工作人员来电，就有关家书提出一些建议，“我不是很同意（这些建议），双方最后在很和平、毫无争拗、好ok的情况下，决定取消录音。”

拒谈港台建议内容

究竟港台人员到底提出甚么建议、而建议又是否涉及政治审查？舒琪不愿多谈，只是多次重申，“咩原因都唔重要，我唔想针对任何嘢，对我来说，件事系无关重要，我唔觉得系大问题。”

立法会议员范国威认为，当事人（舒琪）没有交代取消录音的具体原因，故难以判断事件是否涉及政治审查，他今早曾阅读过有关家书，并不认为内文涉及敏感题材，而过去亦未曾听闻有《香港家书》牵涉政治审查的事件。

部分人阅后“眼湿湿”

舒琪在今早凌晨3时半于facebook发表家书内容后，在9个小时内，已经有近千人赞好，并有逾300人分享。有不少人留言指，“睇到眼湿湿”、“呢封系香港人的家书”，亦有网民怀疑事件可能涉及“正字（政治）审查”。

内文提及，香港10年前在特首梁振英治下，变得民怨沸腾，激起年轻一代的抗争运动，甚至爆发一场前所未见的雨伞运动，而在雨伞运动过后，香港人愈来愈受挫，但政府就变得越来越嚣张。2015年底，一套反应时下社会焦虑和恐惧的电影《十年》应运而生，引发大家思考：十年后的香港和香港人会变成甚么样？

舒琪在文中告诉契仔“轩轩”，无论如何，最重要的是他自己，“唯一可以自由咁选择你觉得最适合你、最能够满足你自己嘅追求嘅答案”，只有他才可以决定自己的命运。舒琪又提到，他不相信10年后的社会，可以完全摆脱这个腐朽的政权，但只要下一代有传承的意志，恶魔终有一日会被击倒。（舒琪facebook专页的原文详见下文：写给10年后的契仔。）

港台播唔到都唔紧要，其他传媒转载就得。

写给10年后的契仔

轩轩：

当你收到呢封信嘅时候，你应该系21岁，好快就大学毕业，而契爷如果仲喺度，就已经70岁，离开咗教育嘅岗位啱啱10年，系一个真正嘅老人。

喺呢10年里面，无人知道香港会发生乜嘢事、会变得更好抑或更坏。但系如果你仲记得嘅话，喺10年前，当时香港嘅特首叫做梁振英。喺佢嘅管治下，虽然未至于民不聊生，但系就真系民怨沸腾。政府几乎每一项措施，都以发展为名，消耗或者输送利益为实，更甚嘅，系有好多为咗配合中央对香港同香港人嘅自由、自主逐渐收紧而夹硬推行嘅政策，结果激起咗年轻一代嘅抗争运动。我相信你一定记得，喺你刚刚满9岁𠮶年，香港就发生咗一场从未试过咁大规模嘅雨伞运动，历时足足79日。我记得喺𠮶段漫长嘅占据日子里面，有一个气氛好紧张、好诡异嘅深夜，我喺接近我学校嘅公路上，守住前面嘅雨伞广场。我攞咗部手机出嚟，睇住一段你用牧童笛吹奏小调嘅短片，然后写咗一段咁嘅文字比你。我话：

“轩轩，呢几日，我一直挂住你。我想话畀你听，好多好多哥哥姐姐正o系度用佢地嘅血、力气同智慧，为你争取一个美好嘅将来。契爷都喺度帮手。有时，契爷攰嘞，就会攞呢条片出嚟睇，或者畀朋友睇。每次，佢地都会话: 哗，咁大个啦？佢地好多都系睇住你大嘅。佢地赞你，契爷都会好骄傲。今晚，出面𠮶班邪恶嘅壊人，将好多哥哥姐姐都打到受伤。我但愿呢个世界真系有一个你好钟意嘅 Iron Man，可以我帮我地打低𠮶个可恶嘅特首。契爷有啲攰，所以又将短片睇咗一次，但系个画面就越嚟越模糊……”

雨伞运动嘅结束，带畀香港人好大嘅挫折感，政府变得越嚟越嚣张，警权不断扩大。2015年年底，喺毫无预示嘅情况下，突然出现咗一部用5部、而每部大约长20分钟嘅短片组成嘅电影，最初佢喺一间小型戏院近乎无声无息咁上映。5部短片嘅导演都好后生，古仔都唔一样，但系都有同一个主题，就系想像香港喺10年之后——亦即系话你而家身处嘅香港——会变成点样。有人拍政府自编自导咗一场政治暗杀，作为佢通过国安法嘅借口；有人拍保育，最后连个主角都要将自己变成埋标本。有一段拍广东话已经逐渐畀普通话取缔。有一段拍一个年轻嘅抗争者死喺监狱里面，同时就有人为咗抗争而选择自焚。最后一段讲政府成立咗少年军，周围收集违抗政府命令嘅“犯罪”证据。部电影用咗好少钱拍，但系估唔到观众反应好好，一开始就场场满座，由一间戏院到六间，然后所有戏院又突然都唔肯再安排畀佢上映。佢喺唔同嘅院校、社区搞放映，放一场满一场，，结果连香港电影金像奖最佳电影都攞埋。套电影，就叫《十年》。

你应该记得，契爷有放过呢部电影畀你睇。睇完后你问咗好多问题，我尽量尝试解释畀你听。你问我电影里面讲嘅嘢会唔会真系发生。我话𠮶几个导演哥哥想讲嘅，其实就系提醒我地，要我地谂下，如果我地唔想𠮶啲嘢发生，我地应该点样做。你好似有啲明，但系又有啲唔明。而家，就轮到契爷问番你，十年后嘅香港到底变成点？中国到底变成点？世界到底变成点？你自由吗？有冇好似我而家认识嘅好多年轻人咁，你从佢地嘅手上，接替咗佢地嘅棒，继续反抗呢个不公不义嘅政权？定抑或，你选择咗离开呢个城市，做一个移民？

无论答案系边个，有一样嘢系最重要嘅：就系你自己，先至系唯一可以自由咁选择你觉得最适合你、最能够满足你自己嘅追求嘅答案。换句话讲，即系你先至系决定自己命运嘅人。喺你过去10年，我肯定上面讲过𠮶班哥哥姐姐，好多都冇放弃到，而且系用咗唔同嘅方法，包括通过合法嘅选举、通过教育同文化艺术、甚至有可能通过激烈嘅武装袭击，为香港、为香港人、为佢地自己、亦都为你抗争，。呢啲做法，肯定会喺唔同程度影响住你嘅成长、你嘅思想。但系唔好忘记嘅，系你作出你未来10年嘅选择嘅时候，你对比你年轻10年嘅下一代都有一份无可推卸嘅责任。我唔相信10年后嘅你面对紧嘅社会，可以完全摆脱或者推翻呢个腐朽嘅政权，但系只要你有上面我所讲嘅一代传一代嘅意识，恶魔系终于会有倒下嘅一日的。

我希望你记住《十年》呢套戏，同走喺你10年前嘅哥哥姐姐，然后勇敢咁踏上你10年后要走嘅路。𠮶阵时，就算契爷再唔喺度，契爷都会好放心……

祝你拥有属于你嘅幸福，

契爷，舒琪。
2016年4月9日。