临时劫案｜郭富城逼人“讲多谢” 导演麦启光︰时下啲人唔讲唔该
电影《临时劫案》由郭富城、林家栋、任贤齐主演，是今年贺岁奇葩，票房愈映愈有，最新数字已去到1300万，后劲凌厉。《香港01》找来导演麦启光以及其中一位编剧陈伟斌接受访问。虽然电影名叫“临时”，但一切都非即兴而生，故事早在2016、17年已有雏型，而两位虽为银河出身，但今次是首度有完整剧本才开拍的作品，绝对是一次不一样的经历。
电影《临时劫案》由上画一刻，已展开了一场神奇之旅。农历新年假期场次甚少，未能带动票房，但电影口碑不绝，反令映期愈映愈旺，逆市加场，至今香港票房已达1300万，跟第二位的《盗月者》2100万，距离收窄。电影在内地1月19日上画同样有奇迹。麦启光︰“呢个系行内称死期，元旦后贺岁前，大家使晒钱又挂住搞春运，但结果一直仲上紧，贺岁期间仲加场次。”截止24/2，上映37日，票房已录得2.3亿人民币，成绩算不错，起码冇撤档。
一个中佬的考试
导演麦启光与编剧陈伟斌，早在拍摄《单身男女2》时已合作，由于银河映像奉行飞纸仔创作，所以编剧与执行导演关系密切。陈伟斌︰“一直都知佢想做导演，之前有揾过我，当时我搞紧《神探大战》差不多尾声，于是一口应承。佢都系时候再做导演，作为一个中年男人，点都想做一啲嘢证明自己仲得唔得，佢揾得我即系心中仲有团火。”
59岁的麦启光，对观众而言是颇陌生，但绝非新导演，早在2000年已首次执导，最多人认识的是与马伟豪合导的《玉女添丁》，而张家辉主演的《流氓师表》就是在网上最多人广传之作。可惜打后的作品口碑和票房都表现不济，继而只是零星地有执导作。
麦启光︰“我觉得自己唔够班，最简单自己拍完嘅戏都唔想睇，我系技术型出身，画面上懂得处理，但剧本点写，对白点解咁讲完全冇钻研。过去都系老板有个剧本问我拍唔拍，咁我见到剧本上有‘三角形’（对画面的描述）就拍啦，唔会大错，最多拍出嚟冇力，唔够好睇，但拍拍下，觉得电影唔应该系咁，只系自己又未掌握到，于是暂且放低，索性跟人学下。咁好彩跟到杜琪峰、尔冬升，从而又识到林岭东、徐克，大把嘢你学啦，学到咁上下，就为自己搞个考试啰。”
三个角色都是导演分身
要考试，当然要揾埋死党拍住上，麦启光︰“你要去死，都要揾个肯陪你去死嘅。”编剧陈伟斌就是这个死侍，而事实上三大角色的性格原型，其实都源于导演自身。陈伟斌︰“我最了解麦启光个人，其实慕容辉（任贤齐 饰）同笠水（林家栋 饰）就系佢性格分裂出嚟。正如佢好想拍套戏，有个好劲嘅概念，但转头又变咗慕容辉，质疑自己到底得唔得？成日自我反雏。”
至于郭富城的打劫决定，其实麦启光都有一刻闪过。“2016、17已经想到这个故事，一直未遇到老板就再谂下先，直至有一轮冇嘢做，自己都嗅到这股味，担心之后仲可以点呢？于是开始著手去搞呢个故事，揾编剧副导埋班，但未开拍啲积蓄都花到七七八八，个人都开怯。谂下有咩方法可以突然有一大笔钱，甚至幻想系咪打劫呢？贪成效快嘛！得唔得好快就知，衰咗入狱都有饭食，睇医生唔使排队，糖尿病都快啲好。”当然一切都是戏言，但渐渐就变成郭富城饰演的梅蓝天雏型。
《如珠如宝》成了契机
到2019年，林敏骢邀请他参与《如珠如宝》拍摄，继而认识了无限动力的两位老板，合作完对方问我有冇故仔想拍，此时这个剧本才露出曙光。陈伟斌︰“原定故事都要走黑色幽默，所以度一个好跳掣的主角，郭富城在戏中一直坚持的事，可能是大家早已不太遵守的原则，例如受他恩惠要‘讲多谢’，对你不义时佢会同你讲‘Sorry’，现代人可能觉得好老套，但其实是基本礼貌。”
有看过《临时劫案》，完场时脑内都会泛起一句“讲多谢”，一句“Sorry”，其实这是麦启光最想大家带走的。“你有冇留意而家喺商场帮人开住道门，啲人会照行照过，冇人会同你讲︰‘唔该’，我仲以为自己做咗Bell Boy。同埋你睇下网上好多嗌交片，其实只要其中一方肯讲句Sorry，就可以化解，但就系唔肯讲，所以今次想借郭富城把口，提醒番大家做人系要有嘅礼貌。”