死尸死时四十四｜张满源演死尸先生尽见专业精神︰最难系练唔眨眼
若要你说电影《死尸死时四十四》的主角，你会数毛舜筠？郑中基？黄又南？吕爵安？又有冇人会提到连戏名都包含在内，全片由头带到尾的“死尸先生”呢？而在戏中饰演死尸的就是演员张满源。
张满源又名“李先生”
讲到张满源，《PTU》的传令员大家可能有较深印象，更让他入围金像奖最佳新演员，不过更令人记得是来自道路安全议会的宣传广告，“2002年7月9日，李先生超速驾驶引致车祸，令妻子昏迷至今”，广告中的李先生正是张满源，更成功令他有“李先生”这称呼。近年有参与电影《幻爱》、《浊水漂流》及《饭戏攻心》，饰演有福叉烧的爸爸。又拍过多部ViuTV剧集包括《IT狗》饰演笑容识别锁解锁员、《940920》饰家聪爸爸，但多是客串性质，今次是首度“担正”，由头带到尾。虽然话系演死尸，冇对白冇表情，但过程一啲都唔简单，尽显演员的专业精神。
要唔眨眼抵得冷
问到今次拍摄过程，张满源都表示辛苦，因为要演一个死咗嘅人，全程崩直个人是吃力的，但都唔系最辛苦，最辛苦系对眼。“你真系想像唔到点样可以唔眨眼，又唔可以瞌埋双眼，呢个系最大挑战。有时啲口水花或者风吹令你好想眨眼，这是最辛苦。我都有刻意在屋企练，睇下可以唔眨眼几耐。”正所谓一日未嗌一日都要演落去，死尸唔眨眼系好合理。
戏中这位“死尸先生”，一直被大家搬嚟搬去，甚至拖行、拉扯、抛高，经历咁多高危动作，过程又有冇真系受伤？“佢哋好细心，冇整亲我，事前都专诚揾个假人公仔做彩排。最辛苦一幕系要倒吊威也，原来倒吊一阵已经觉头晕，要立即叫同事拉番我上嚟。”又正因为事前彩排过，所有笑料都先听为快，免却张满源在拍摄时，因忍唔到笑到“翻生”的尴尬场面。
“李先生超速驾驶”广告20周年 男主角张满源原来拍过《IT狗》？
角色除了唔眨眼挑战人体极限，另一极限系大部时间都冇衫著，安全措施防走光固然要，点样操fit自己令出镜好睇啲先系重点。张满源︰“监制同我讲千万唔好太fit，太fit就唔似一个普通住客，最紧要唔好太肥又唔好太瘦。所以入剧组前都刻意减4、5KG，大家入场时可以留意，初初开镜拍时会肥少少，尾段会收身一点。不过因为冇衫著，其实都几冻，其他同事都觉得热时，我都觉得冻，但大家好好，通常都迁就咗我先。”
虽然过程辛苦，但张满源都满意自己表现︰“在全程冇对白，又在扮死的状态下都演到戏，这是我几满意的。”