【金像奖2018】黄秋生亲回应自嘲演说差：一话有香港电影全场呆晒

前日（15日）晚上在尖沙咀文化中心举行的第三十七届香港电影金像奖颁奖礼虽然已经圆满落幕，不过，黄秋生担任最佳编剧奖项颁奖嘉宾时所讲的一番言论却一直在网上发酵，甚至被不同传媒误报成港独。今日他就亲身回应《香港01》，更自嘲演说技巧差。

昨晚秋生在个人facebook上罕有地以长文对事件作出回应，内容提及有网媒以讹传讹，将其言论扭曲。今日秋生接受《香港01》访问时说：“我谂系我今次好需要回应，你哋睇到嘅只系香港嘅报导，我睇到嘅唔单止系香港，台湾、内地，所有加加埋埋大概有50个媒体报导，已经传到乱晒大龙，仲传到去港独，传到已经系‘呢条友你又港独啦！’所以我一定要回应。”

秋生笑言，今次由神戏剧场主办的舞台剧《夕阳战士》，亦因为提及钓鱼台等与政治语带相关的字眼而影响赞助，更笑言：“我讲句豆腐火腩饭，啲人都好惊㗎㖞！”昨晚秋生为被传提倡港独的报导而在facebook作出回应，他直言：“有间网媒话我拉到去港独，根本完全系将一啲我冇讲过嘅说话加诸我口，然之后将呢啲说话拉到去港独，同埋佢𠮶个理据系好荒谬，我（喺篇文度）都已经冇引用出嚟！好讽刺，佢话㖞，唔通话有河北电影啊？梗系得中国电影啦，咁我就心谂，咁武夷山乌龙系武独？唔得！要中国乌龙！苏州刺绣？咁就苏独！唔得！根本就夹硬扭曲香港电影四只字，夹硬入罪，成件事系夹硬扣帽子，好得人惊。所以我一定要写返啲嘢！”他更指今次“被屈事件”是澄清的最好时机，“因为有晒片喺度，有晒人证，现场千几人，系最好嘅时机话俾你听，我就系咁样被人抹黑，千几人见证，天助我也。”

秋生指，今次他为金像奖准备的讲稿，内容主要讨论香港还有没有香港电影，“好多人而家都话冇香港电影，出年仲有冇香港电影，冇人估到，但系我哋年年都仲有，即系你话死啦，香港电影死啦！唔系㖞，仲未死㖞！我嘅意思就系咁简单啰！不过我一讲话，仲有香港电影㖞，全场木晒口面，咁系我讲得唔好啰，表达得唔够清楚，咁紧系我嘅问题啦，我又唔系演说家，再加上个剧本（讲稿）系我自己写，紧系做得好差啦，表演又表演得唔好啦，呢个完全系我嘅问题。”他笑言同类事件已非首次发生，更直言自己是位传奇人物，“我觉得我无论系命好命唔好，行运定踩屎，咩都好啦，但我肯定I am a Legend！我系一个传奇人物啊！传奇唔系因为能力，因为传到你传奇，好似传周润发拍戏唔驶瞓，传刘德华唔驶食饭一样，传咗就当系。”

化妆: Jolinn Ng (Anthony), Betty Wen
发型: Ray Mork & Taky Chung (Anthony)@Fifth Salon 
服装统筹: Claman Chu@神戏剧场
服装: Bauhaus 
统筹: Ling Lo
场地提供: 高兴 happinesssss
特别鸣谢：Frank Chan