【周末午夜场】《大闹天宫》阿凡达班底 荷里活价钱拍出本土风味
撰文： 许育民
出版：更新：
明日（11/2）下午，翡翠台会播出郑保瑞执导，甄子丹、周润发、郭富城主演的《西游记之大闹天宫》（2014年1月30日上映）。该系列来到今年仲有第三部曲《西游记女儿国》，据闻会系最终回。其实首部曲上画时都系威系势，唔单止卡士强劲，就连幕后制作团队都号称揾到制作《阿凡达》的特技公司参与，你睇唔睇出先？
识睇要睇特技
《西游记》剧情都唔使多讲，大家都耳熟能详，除非你好似星爷当年咁玩前世今生，不过你又唔系星爷，再者星爷去到近年亲自执导的《西游》系到，都已经变唔出咩花样。所以郑保瑞执导呢系列，重点都不在剧情，系卖电脑特技。
当日《阿凡达》系特技嘅一个重要指标，揾到佢哋做都唔会差得去边啦（个心谂）！点知就出奇地令人惊讶，特技画面粗糙够地赢亲切，而且真实感欠奉就够晒港式科幻，能够以荷里活价钱，整出木地土炮级的贴地制作，心思可取。亦可能系咁，在内地大收10亿人民币票房，愈拍愈有。
真心推介东海龙王一节
就以东海龙王个皇宫为例，除咗张龙椅同几只大贝壳系实物外，其他都系绿幕加CG炮制，假到有种虚幻飘渺感觉。成个皇宫画面又单调得只有一片蓝，应该系想大家感受蓝色的层次有几多种，亦可以专心番留意剧情发展。至于本来要模仿在水中动作的演员们，扮咗几下后就变番活动自如，呢个设定相信系要展现孙悟空可以快速熟习水压的能耐。
不过全场最好睇系饰演刘桦的东海龙王，唔系呢位内地演员演得好，系负责配音的谷德昭配得妙。佢将东海龙王演绎成一个虚伪、无句真、做事求求其其嘅人，结果就俾孙悟空无意中整蛊咗，仲拎走埋佢支定海神针。其实剧情嚟讲真系唔知做紧乜，单凭谷德昭将角色配到有番啲性格俾佢，靠把口吹水吹赢荷里活特技。