老嘢时速｜“念旧姐”94岁担正做主角　网民恶搞老版《狂野》

全球口碑劲爆的《玩转脑朋友2》（Inside Out 2），新集一共有四位新的情绪专员，阿焦、阿羡、阿厌、阿尴登场，各有表演各有粉丝，到上画后大家先发现仲有第十位隐藏专员出场，佢就系“念旧姐”，虽然只有两幕，但已经劲抢戏。而负责帮念旧姐作英语配音的94岁的婆婆茱施洁比 (June Squibb)都成为热搜，最近仲有新戏《老嘢时速》（THELMA）上画，仲要担正做主角。（上映日期︰8月15日）

当日由于“念旧姐”太吸引，正所谓念念不忘必有回响，引发不少观众都去揾多啲关于念旧姐的故仔。包括原版负责配音的原来是年届94岁的婆婆June Squibb，最好笑系佢个样，竟然同“念旧姐”撞样。

玩转脑朋友2｜隐藏情绪专员念旧姐　出两幕成焦点配音婆婆劲似样

至于来到新作《老嘢时速》，茱施洁比证明你睇，活到94依然可以活得精彩！故事讲向来精叻嘅花妈婆婆，一日收到诈骗电话：为救乖孙先付一万美元。俾咗“赎金”后方知被揾笨，越谂越唔忿气，决定亲自出马追数追到天脚底，深入虎穴过程又惊又喜，仲有无限窝心时刻。

故事根据编导Josh Margolin祖母真实经历改编，绝对原汁原味，拍成呢个暑假最与众不同嘅“动作”喜剧。 《老嘢时速》不但笑爆辛丹斯电影节全体观众，烂蕃茄网更长期高达99%，影评通通 super like！戏中饰演花妈，系最近喺《玩转脑朋友2》声演念旧姐而爆红嘅资深绿叶王茱施洁比 (June Squibb)。茱姐跟角色年龄一样，拍戏超逾70多年终于首次担正，不少走动场面坚持亲身上阵，相当架势！

与此同时，亦有网民将《狂野时速》恶搞成老人家版，睇睇真正变成《老嘢时速》会系点，连戏名都改做《Too Old to Furious》。事实上，戏中有位七、八十年代凭《豹子胆》系列疯魔全球嘅铁汉偶像李察朗次 (Richard Roundtree) 都有份参演，亦成为佢临终前大银幕遗作。