玩转脑朋友2｜隐藏情绪专员念旧姐　出两幕成焦点配音婆婆劲似样

全球口碑劲爆的《玩转脑朋友2》（Inside Out 2），早前香港连续数日放映优先场，轻易取得全日票房冠军，气势一时无两。今集一共有四位新的情绪专员，阿焦、阿羡、阿厌、阿尴登场，各有表演各有粉丝，不过原来仲有第十位隐藏专员出场，佢就系“念旧姐”，虽然只有两幕，但已经劲抢戏，大家已经对佢念念不忘，猛话想睇多啲。（电影于7月11日正式上画）

筹备9年的《玩转脑朋友2》，至今全球累计票房已打破上一集高达8.58亿美元（约66.9亿港元），即系打后的每一蚊都破紧纪录，迪士尼更预计《玩转脑朋友2》可望全球票房冲破10亿美元（约78亿港元）。

电影在香港上映优先场后，反应热烈，但其中以闪现两场，第十个情绪专员“念旧姐”最有话题。这位专员英文名叫nostalgia。虽然呢位婆婆可爱又有趣，但对于只有13岁的韦莉嚟讲，真系怀旧得太早，所以一出场，阿焦便急急叫佢返去先，仲话叫佢等多十年，等韦莉经历两次毕业礼，和一个好朋友婚礼后，先再出场。

由于念旧姐太吸引，正所谓念念不忘必有回响，引发不少观众都去揾多啲关于念旧姐的故仔。包括原版负责配音的原来是年届94岁的婆婆June Squibb，最好笑系佢个样，竟然同“念旧姐”撞样。

而当大家以为“念旧姐”这角色，一定要有番咁上下阅历的朋友先谂到，但其原创原来是一位加入Pixar只有3年的华籍少女Crystal Kung。在其IG更有大量画作分享，风格一啲都唔怀旧，仲几有型添。