专访｜葛民辉觉香港变态但冇移民打算：冇贡献又攞人福利有啲茅

葛民辉（阿葛）近年参与不少本土的小品制作，如：《阴目侦信》、《夜校》、《填词L》等，常常与年轻班底合作，近日又主演了关注虐老主题的短片《垃圾》。他笑说自己根本不是刻意为之，只是《九龙城寨之围城》制作人不会想起他，但冇预算的导演、监制却常常找他拍膊头。阿葛接受访问时谈到自己绝少拍合拍片的原因，更分享自己对移民的看法，除了为菠萝油、奶茶外，也直言：“你从来冇喺𠮶个国家冇贡献过，但系又无啦啦想去人哋国家享受人哋嘅福利，我又觉得茅咗啲。”
场地：美乐照相馆

扬威海外夺男配角奖：有冇奖金㗎？

访问前几日，阿葛正正凭《垃圾》获得了“美国洛杉矶独立短片奖最佳男配角银奖”，他说：“你有冇帮我查吓，呢个独立短片奖参赛入面𠮶啲，可能有昆虫交配纪录片、狮子捕猎野豹嘅情况，同埋有㓥车场、环保污染、气候暖化，南极啲海狮浮喺水，然后得我系人嚟嘅，终于我就得咗呢个奖项，但系有冇奖金㗎？”导演麦婉欣表示只得奖状、奖杯，他闻言即笑说：“唔系啩？即系又系亚加力𠮶啲，畀啲诚意，美金我都收㗎！”阿葛对虚名睇得好通透，认为短片攞奖纯粹是因为故事、导演和女主角冯素波（波姐）的功劳，谦称：“人哋LA鬼识我咩！我个人得，一早几十年前攞咗啦。”

近20年屡拍冇Budget制作　怀疑自己时运低

上次访问波姐时，她说导演交出剧本后，还未等她答应就已离去，自己半推半就下便答应演出，而阿葛竟谓：“我剧本都冇呀！”与麦婉欣相识多年的他，称对方为“江湖大家姐”，一听到对方话“有单嘢”已经知对方想怎样，“由识佢到现在，冇一单嘢系有Budget㗎嘛，个命系咁坎坷㗎佢，还是佢硬系要搞到自己咁坎坷先创出个未来呢？麦导演就话，你有冇听闻过有啲NGO组织，系会关注虐待老人家嘅事件。我话系㖞，一个唔觉意，到我哋㗎喇㖞，俾人虐待向边个寻求庇护，求助呢？心里面打个底，点都要应㗎喇呢个机。”基本上他听到一句“冇Budget”后，已什么都听不入耳，怀疑自己是不是时运低，或是迟了摄太岁，无奈表示：“乜嘢《九龙城寨之围城》又唔关我事，围剿𠮶啲就关我事！”

阿葛表示幸好与这个团队合作很高兴，整个片场的风气都跟过往不同，今次合作的班底居然尽是文青、哈比人、“塞豆窿”，个子小小已在片场内搬搬擡擡，他问：“发育完未㗎你哋？”他说上一代片场的工作人员常常似要“开片”，但如今却是文青，他与团队互相感染，“成班围威喂，有时好似足球员，我假设我系朗拿度，踢开英超，突然间去到非洲，冇著鞋嘅小朋友，成班塞豆窿一齐踢，个感觉又唔同。”讲到阿葛近年接拍的《阴目侦信》、《夜校》、《填词L》都是低成本的小品，与年轻班底合作，原来只是神推鬼㧬？他谓：“我怀疑近来系濑咗啲嘢，中咗啲降头，冇理由2000年之后，第一次由谷德昭开始，‘拍硬档呀！’唔知点解有Budget就唔见谂起我，冇Budget就谂起我，我呢20几年嘅星运好似开善堂咁。”

老汉夏夜推梳化　剧组贴心安排导具竟弄巧反拙

阿葛说，很多人以为他已息影，但明明自己日日在家里练习喜怒哀乐表情，还钻研反眼、扮死尸、呕血的演技，结果却派不上用场，就连拍《垃圾》时导演都叫他收起这些演技，他说：“佢话我约你嚟推嘢㗎咋，你系一个老汉推梳化，OK，明，就系咁㗎咋。好唏嘘㗎我哋嘅人生，反而咁样会得到一个奖啰。”讲到与波姐在炎夏晚上拍摄推梳化上斜的戏码是否很辛苦，他说虽然剧组为了方便演员，在梳化底装了几个辘，但反而弄巧反拙，“落紧斜又好，上斜路又好，佢会跣。我又要畀波姐做戏，我要扮推，其实系煞停佢，𠮶吓好易内伤㗎！”

为人父母采取朋友心态　忌摆款八卦

《垃圾》中，岑珈其饰演阿葛的儿子，婚后移居英国落地生根，而他自己就在香港孤苦伶仃继续揸巴士，临近退休年龄，又没什么细艺。现实生活中育有一子的阿葛，坦言现时宇宙不同了，社会有很多恐怖血案，自己都不敢做个太八卦的老窦，“郁啲无啦啦批咗个头落嚟，掉落海，几恐怖，做老窦老母好惊！所以唔认做老窦，唔认做老母，一个唔觉意佢Short起条筋批你个头藏尸，无啦啦摆咗喺汤煲里面，何苦呢？”因此他对儿子都采取朋友心态，“Yeah！Yo！Give me Five！尽量啦唔好‘敦’起个款，亦都唔应该‘敦’起个款，朋友咁就最好。（你同个仔都系咁？）最好啦，你管得佢咩？我细个嘅时候我都唔想个老窦管，我听到都扮听唔到，转头已经同Peter打茄轮，叫你圣诞节唔好去咩Party，咁咪话‘我去Mary屋企过夜， Merry Christmas咋嘛！’转个头咪去咗东涌、度假屋𠮶啲啰。”

儿子工作四围飞　相隔两地反而见多咗

现实生活中，阿葛的儿子曾出国留学，现时已出来工作，问到可有像戏中儿子般移民，他透露对方不是返一般文职写字楼工作，但要在亚洲区各地飞来飞去。不过对他而言，现在全球一体化，搭程机去美国三藩市，就仿如80年代搭程车入新界探亲戚一样。他表示：“好多时啲人两地相隔唔会再觉得咁阴公猪，反而你喺第二度仲见佢多咗，成晚就喺度FaceTime，好似CCTV，以前同屋住，楼上楼下都冇见佢咁多，而家Zoom，长期开住个Cam，反而仲见得密咗。”

与家人相处忌畀意见　一味附和配合：千祈咪支配

讲到曾否跟家人商量过移民问题，他即说：“千祈唔好商量！你又犯规喇！你第时做人老婆，千祈唔好，唔系商量，乜都扤头，‘喂好㖞！Yeah！Brillant！畀两个like你！你谂咗㗎啦嘛，你嘅作用只系需唔需要有啲咩配合？佢要几多钱过去，机场送机𠮶朝使唔使揸车，你要配合佢。”他认为莫说父与子，就连两夫妻之间的想法都可以差天共地，最紧要识交戏：“相处之道你记住，系扮𠮶台戏，过到就得㗎喇！因为佢一定系谂咗好多嘢，想你支持佢。”除非对方要杀人放火，否则若然只是选什么颜色等等的琐碎事，只需附和就够，“佢开心，冇事㗎，你咪过到啰，佢唔开心，一阵间又话觉得绿色唔系几好，话‘都系你啦！’咁你咪无啦啦做咗衰人？”所以作为人父、人夫，阿葛尽量只是配合、支援，而绝非支配。

国语程度与郑伊健相若　两原因抗拒北上工作

阿葛坦言工作上都有点抗拒离开香港，近年尽管很多合拍片，但自己都喜欢留港工作，“合拍片点都要有一段日子喺上面，唔知横店、杭州、陕西定乌鲁木齐，踎喺度唔知做乜，但系我好钟意喺香港，即使以前几套戏同一时间开紧都好，我都可以摄个罅返自己公司做自己嘢。”第二个不想离港工作的原因，阿葛直认自己国语不灵光，2000年代曾跟张卫健去敦煌拍《齐天大圣孙悟空》，“冚嘭唥都唔系南方，都系卷脷卷到随时有旧槟榔飞出嚟咁，唔知佢讲乜㗎，我永远都扤头。可惜我公司啲同事，个个话识国语𠮶啲，都系同郑伊健差唔多质素，我哋两个被困，完全沟通不到。”他说若对方轻轻松松讲句笑，自己都尚算听得明，但一发恶连珠炮发他就一只字都听不清楚，乱答又惊死，所以对离港工作比较却步。

香港变态物价高　但嫌移民太茅：局砌啰，我哋做鸡㗎嘛

连离港工作都不考虑的话，那阿葛想必也不会移民，他直言移民是很复杂的问题，又说：“你从来喺𠮶个国家冇贡献过，但系又无啦啦想去人哋国家享受人哋嘅福利，我又觉得茅咗啲。假设系投资移民，你对𠮶度有几熟呢？连香港你都未投资成功，谂埋啲嘢咁得意嘅。”他觉得若然移民不是求取得一个国籍，反而几赞成旅居的生活方式。

香港出名楼价冠绝全球、物价又愈来愈高，阿葛都觉得这个地方很变态，“唔系呀？呢个车位几百万，冇墙冇剩，白色线画一个框，一架车咁大，咁贵？但系喺某度某度，你用呢个价钱系有个山、有果园、前面有条河、有House，仲可以隔篱有马场㖭。”在其他地方生活，无疑是比较舒服，但阿葛笑说：“局砌啰！我哋做鸡㗎嘛！我哋做鸡，所以个身体要喺香港。”他以通渠为喻，笑言自己做苦力，必须留在香港，无法遥距开工，所以没想过去别处生活，“去第二度做乜鬼呢？扫枫叶或者望住啲雪？仲有咩做呢？试吓睇吓啲柴有冇发霉啦，望吓个窗啦，我又未至于想咁。”

冇移民打算：行落街已经有正宗菠萝油

思索一轮后，想想与其去到别处都是不停碌电话睇香港新闻，既然还顶得住，那便一动不如一静，“不如我就喺呢度饮𠮶杯奶茶，唔使话好挂住你个菠萝油呀，你行落去已经攞住两个啦，唔使喺第二个国家，仲要扮港式茶餐厅里面有个怪菠萝油，菠萝唔似菠萝，油唔似油，咩嚟㗎？”他觉得如果是因为下一代、教育等问题，想仔女到别处读书，那就另作别论，幸好自己的父亲当年都是咬著树皮游水来港，连想食个番薯都冇，大家一早惯了离乡别井，即使长居香港，也有不少人每年去几次日本当“返乡下”，“大家惯咗件事，只不过落脚屙笃‘茄’嘅地方喺边度，就系你平时放低垃圾嘅地方。你个根喺边度？个根就系咁，你嫁咗出去，试吓返老家，啲垃圾就摆喺阿妈屋企，唔会搬喺自己屋企，个根爱嚟放垃圾，爱嚟囤积啲嘢，自己住𠮶个地方就嘻嘻嘻嘻，系咁㗎。”