78岁冯素波于法国影展获奖　自嘲是冇奖长者：旧时抽奖永远冇我份

冯素波（波姐）她去年参演麦婉欣执导的短片《垃圾》，以“关注虐老”为主题，而短片日前在法国康城世界影展（World Film Festival in Canne）获得三个大奖，包括最佳银发影片、最佳人道主义影片，以及最佳女演员（短片）。这个影展自2020年才开始举办，不过波姐早前都表示，虽然不是大影展，但对于作品能受到关注，她觉得很荣幸，且意义非凡。

而今日（6日）波姐出席短片的分享会，再进一步讲到获奖感受，她感谢监制和导演，大赞新一代很厉害，讲到得知获奖的第一个反应，她说：“我冇乜反应咋㖞，我都唔知获乜嘢奖，我第一个谂到就系‘吓？使唔使去外国㗎？’要我出门呀？好攰㖞。（你想唔想去？）如果有人请我又带埋我去，我梗系想去见识吓，就算唔攞奖我都想去。”波姐由童星入行，年近80终于获得影坛肯定，被问会否感到吐气扬眉，她说以前父亲冯峰常常说“拉住条鸡尾回乡”，但自己在香港不需回乡，“总结一句说话嚟讲，我都冇辜负父母对我嘅期望，亦都冇辜负呢个制作嘅欣欣（麦婉欣）导演同埋监制Aaron对我嘅信任，希望佢哋下一套戏可以攞到更加大嘅奖，带我去边度玩，唔系我攞奖都唔紧要，带埋我去玩。”

当问到如果冇奖攞，对她而言会否是个遗撼，波姐自嘲一向是“冇奖长者”，谓：“我从来都冇谂过会攞奖，我系一个‘冇奖长者’，旧时抽奖都永远抽唔到我，我冇去奢求呢样嘢，我做每一样嘢都系尽力而为，唔系因为个目标系想攞奖而去尽力做，呢啲系利息嚟嘅啫，系奖励，攞到返嚟梗系好，大家都有一种兴奋，大家为呢一件事情出过力，有种鼓励，对于我个人嚟讲，我好似委屈咗佢，冇乜地方摆个奖，我四围住吖嘛，成日好似揾个袋要包住个奖，所以我将个奖放喺我契仔嘅写字楼，因为佢系开艺员公司。”

原来波姐目前自疫情加上儿子移民后，就冇固定居所，四围去不同地方住，她说：“你知香港租金又咁贵，我哋咁老，银行唔接受我哋买屋，咁我咪喺朋友度住吓，好彩我亲戚多，契仔啲地方又抖吓，都几好，当成日去咗旅行，我真系日日都旅行。（之后会唔会去外国同个仔住？）唔知呀，有冇咁长命都唔知，冇谂咁远，一齐生活要去到英国咁远。”

波姐透露最初未有应承接拍《垃圾》，说导演透过契仔表示想见波姐，约她饮下午茶，“但系我觉得欣欣导演已经拎住个剧本，唔系畀我过目咁简单，直情摆低咗就讲咗好多嘢，希望我做到。我未应承，佢已经赶时间走咗，我拎住个剧本，系咪即系要做呢？我返去睇个剧本，亦都冇正式话要点样做，不过我契仔话如果体力支持到嘅，好值得做呢样嘢，因为可以带到啲讯息出嚟。”她希望大家睇完短片后，社会不会再有虐老事件，亦想长者睇完之后，学习如何放下心头大石。

拍摄时是夏天，波姐更要通宵拍摄，她说自己饰演被儿子虐待的长者，在室内拍摄空间狭窄、又室外更要搬张很重的梳化，当时她膝头神经有伤，但没有告诉剧组，因为若对方知道就会不敢叫她粗劳，但波姐还是想做到最好效果。她指：“要我由斜路拖住张梳化行咗三晚，推到去个垃圾站，有平路有斜路，都几重，呢班制作人谂到方便我，就安咗几个辘喺底下，虽则安咗几个辘，都歪歪斜斜，都要大家帮助我点样校好张梳化、点样推，推咗几晚。”波姐庆幸冇受伤，又笑言：“人力系一种贱力，贱力得人敬，我妈妈成日都讲贱力得人敬，成班人出咗贱力，而家终于攞到个奖。”

波姐公布得奖消息后，很多人留言问短片何时上映，有哪里睇得到，不过由于此片非商业片，暂时只有免费放映，而6月15日的“世界虐老关注日”，就会在艺术中心首映。监制说波姐的奖座其实正从法国运送来港，原本打算当日颁发给她、送她惊喜，但现在藏不住，波姐笑言：“唔紧要啦，我老人家唔吓得㗎，我成日都喺屋企静修，最惊就系要做啲惊喜表情。”波姐说今年有很多个人大计，7月将会推出自传《峰波情未了》、《原来的我》；10月去新加坡与米雪演折子戏；11月又会开骚，是她的《峰波情未了2.0演唱会》，更会帮慈善单位筹款。