【每逢大事讲故事】朝核、贸易 安倍站着如喽啰 跟错大佬点算好
最近好多人去扑飞，首先有五月天、跟住有久石让、再嚟子华神。不过飞云最想睇嘅骚，系飞都冇得买嘅，就系之前韩国艺术团去朝鲜平壤嘅表演。嗱嗱嗱飞云唔系想去睇徐玄或者Red Velvet，其实只系想了解两韩艺术交流，关注东亚地缘政局，推动两韩和平统一……唔好话飞云毒，日本首相安倍晋三应该都好想睇。
▲想要飞？发吓梦先~
睇见韩国总统文在寅百忍成“金”，用冬奥做饵，氹氹吓朝鲜领导人金仔就整咗韩朝交流表演，再加个文金会。唔止咁，全世界都赞文在寅够忍让，先成就习金会，之后可能仲有特金会、普金会，文在寅攞晒彩啦。
安倍呢？咩都冇！日本明明搞咗两次冬奥，韩国先第一次搞，点解金仔只肯去平昌𠮶个？明明朝鲜啲导弹全部对住日本海，最受威胁嘅系日本，点解金仔话见中、美、韩领导，都冇提安倍？仲有徐玄同Red Velvet（及其他）表演，点解日本AKB48冇得出场？最重要系安倍冇得睇！公平咩？！
▲睇下Red Velvet几正！我系讲紧佢哋为两韩和平努力实在系好正呀！
估唔到韩国用K-POP抢咗日本个J-POP市场，仲用冬奥抢埋日本个镜头。
一切都要归咎于安倍跟错大佬，仲要跟车太贴，大佬一转軚，真系跟藤原拓海学识飘移都炒车。
▲藤原拓海唔系日本人咩？都系亚洲人不用分那么细啦！
2012年安倍再出任首相一职，上任后第一个出访嘅地方就系美国，强调日美同盟非常重要；2017年侵侵上任美国总统，安倍亦第一时间去俾只手侵侵揸一揸，虽然之后反哂白眼又抖哂大气，相信安倍都觉得值得嘅，又侵侵打番场友谊波，向世界展示两国深厚情谊。
▲来自侵侵嘅热情，透过握手传递到安倍嘅手中。
唔好以为美日关系系理所当然，其实前几任日本首相都唔系咁㗎。例如安倍嘅前任野田佳彦2011年上任后系先访华、后访美；菅直人2010年上任后，就中、美都未赶得切去访问就落咗台；鸠山由纪夫亦首次外访就系访华，之后更因为未能按照竞选承诺，将美国海军陆战队迁出冲绳基地，而辞任首相，与美国关系都唔慌好。
相反安倍就唔单止姿态上向美国示好，连行动上都系显示出对美国嘅一片丹心。啲人成日讲中国买咗几多美国国债，系美国最大债权人，留意返呀，截至今年1月，中国揸住1.17万亿美元美债，但日本都有1.07万亿美元美债，系美国第二债权人。
▲叫得美国一声大佬，买美债梗日本当然系OK！
咁侵侵点回应安倍嘅爱？首先，特朗普上任后即刻签署行政命令退出《跨太平洋伙伴协定》（TPP）。Er......只能够讲，有一种爱叫虐爱。歌仔都有得唱啦，♪ ♩ ♫“喜欢你让我下沉，喜欢你让哭”， 更紧要系下一句“能持续获得糟蹋亦满足～”♬ ♩ ♫ ♯
讲返少少历史，日本防卫上靠美国，就算同美国喺贸易方面有摩擦，都要“大和抚子”上身咁忍让。不过TPP因为唔止美日，仲包括其他国家，所以日本就唔需要忌讳美国。
谁不知安倍同美国前总统奥巴马倾好晒上马，侵侵一个屈尾十就推翻咗。而且分手就分手啦，侵侵又硬系要人研究下系咪要重新加入TPP，搅到安倍以为佢想食回头草，然后又突然批评TPP不合乎美国利益。呢啲一时一样嘅态度，令安倍患得患失。
唔止咁，之前中美贸易战，大家只顾住睇中美，但留意返其实日本都同样受美国钢铝关税影响。虽然日本成日话系美国一大盟友，但欧盟、巴西、澳大利亚、阿根廷、加拿大、甚至连韩国，以及要起墙围住嘅墨西哥，都有得豁免，日本又系冇份。
就算系咁，安倍冇放弃“美日同盟”嘅概念。安倍对美国嘅态度好明显，要知道喺东亚地区里面，安倍真系冇咩知心友。一方面忌讳中国成为区内大佬；另方面与韩国关系，则因为慰安妇问题，若即若离。2015年安倍同时任韩国总统朴槿惠政府就慰安妇达成协议，日本拨款10亿日圆成立基金协助受害者；点知文在寅上场后一下子就改变主义，由韩国政府出资协助受害者，唔用日本𠮶10亿日圆，但笔钱又唔系即刻还返俾日本㖞……
安倍付出咁多，只系希望侵侵回头时，关照一下细佬。喺安倍嘅想像中，东亚政局就算唔系由日本主导，但由侵侵驾驶嘅汽车上，安倍起码都可以坐副驾。不过，幻想虽美好，现实却残酷，安倍计嚟计去计漏咗东亚地区有个朝鲜。
▲“那年十八，母校舞会，站着如喽啰”
唔系话之前当金仔冇到，而系冇谂过金仔会突然扮乖仔。首先同韩国扮friend，借冬奥之名做咗场“友谊第一，比赛第二”嘅戏，之后仲借啲依去咗中国同习大大打招呼。
最爆系，年初仲同金仔battle紧个核武按钮边个大啲嘅侵侵，突然就讲句：“好期待5月或者6月同金仔会面。”即系侵侵揸住架车，兜咗文在寅同习大大去同金仔倾计，安倍就连车尾箱都冇得匿。呢几句夭心夭肺歌词，好似度身定造比安倍同侵侵讲咁：♪ ♩ ♫“喜欢你待我薄情、喜欢你为人冷酷～若是你也发现，你也喜欢亏待我，我就让你永远痛爱著我～～～”♬♩ ♫ ♩ ♫
▲安倍真系要听下成龙大哥讲，跟车最好保持番两秒距离喇！
▲两位突然friend咗，难为跟车嘅安倍㖞！
讲返转头呀，以前安倍唔系咁冇存在感㗎。2002年当时仲系官房长官嘅安倍，跟住当时嘅首相小泉纯一郎，去朝鲜同当时仍然健在嘅朝鲜领导人金正日会谈，但喺会谈前30分钟，朝鲜方面突然通知8名遭朝方绑架嘅日本人质死亡，但朝方冇用“绑架”字眼，只系话失踪者，当然亦冇道歉。
上午会谈结束，安倍就同小泉讲：“老细，如果阵间个肥仔唔肯承认绑架同埋道歉，我哋就拍台走，理鬼咩‘朝日平壤宣言’！”日本代表团啲人吓一吓，大佬，而家唔系晌你屋企后花园，喺系朝鲜呀！度度都有人监听㗎嘛！
嚟之前佢哋就商量过，重要嘢唔系要讲三次，而系要用纸笔沟通，以免隔墙有耳。因此当安倍大大声讲要反金正日台时，大家第一下系吓亲嘅，以为就此成为第九、十、十一……个遭绑架日本人。
但系后来佢哋就明白安倍嘅用意，因为下半场一开始，金正日就承认失踪嘅8个日本人系朝方绑架，甚至肯道歉。而逼到金正日也道歉嘅，当然就系安倍大大声咁话唔理“朝日平壤宣言”嘅举动。
“朝日平壤宣言”实现朝日关系正常化、清算日本对朝鲜实行殖民统治历史和解决两国间悬而未决的问题等达成共识，系为东北亚地区的和平与稳定而相互合作……一句讲晒即系两国关系“淡淡定、淡淡定，有钱剩”，咁金正日梗系想日本唔好走咗去啦。
呢件事成为都市传闻，安倍足智多谋嘅形象亦深入民心。边个谂到而家对住金正日个仔，安倍连同对方远远见个面嘅机会都冇呀阴功，想喺朝鲜半岛事件上发声？想讲绑架日本人？安倍仲要靠侵侵把口咋。
呢个故事教训大家，做人都系信自己好，跟大佬如果跟错边就好似安倍咁，偷鸡唔到蚀渣米。
振作呀安倍！