热评｜海洋公园蚀钱包底如赌仔长贫难顾？ 拨款畀呢两类人仲化算
文：李声扬
海洋公园财困，唔止系因为疫情公司连蚀5年，近乎资不抵债，点玩落去？伸手要钱系必然结局，疫情只系加快呢个过程。
但，众多学者KOL讨论前，搞清楚最根本嘅问题：海洋公园，到底系乜？佢嘅存在意义，系乜？搞坛咁嘅嘢出嚟，想达到乜效果？谂完你就会明好多嘢。
海洋公园最最最初，系马会出钱起，仲有年年拨款。1987年，有咗《海洋公园条例》。
讲个笑话：根据呢个条例，海洋公园，要自负盈亏。
唔使学者都知，个仔烂赌，但你每次都帮佢找数嘅，佢只会不停咁赌。话得最后帮埋佢今次，就真系要最后一次。
冇后果嘅“自负盈亏”，即系废话，佢每隔一排就会嚟拎钱。既然蚀钱冇后果，有乜动力去搞好佢？除非你好似盛智文咁当系跑道。
归根究底，问自己一句：点解香港要由政府出咁多钱搞个主题乐园？你唔觉得有问题？
冇错，最自由资本主义嘅地方，都仲有好多嘢系政府做。有啲可能系有其他效益，例如大型基建，可能对城市有帮助，但规模又太大，加价机会又冇乜，私人机构唔想做唔敢做，就政府做。
亦都有啲系唔打算唔应该牟利嘅嘢，比较似政府服务，例如发护照，社会福利，军队，呢啲东西好多地方都系政府做。
但，主题公园？你咪玩啦！
你话当教育意义，好似博物馆咁，肯定你起个乜乜馆唔使咁多钱。话当提供休憩设施，好似游乐场一样，我肯定你起一堆马骝架滑梯唔使咁嘅钱。
官办主题公园，三四十年前可能呢个需要，但个世界会变㗎！以前你去欧洲7天团都有人送机。而家个个一年去几次日本睇企鹅，请问点解我仲要去海洋公园呢？时代系进步嘅。
至于坊间话海洋公园只靠游客忽视本地人，就错重点。冇内地客嘅，相信海洋公园死得更快。你见全世界嘅主题公园，都十分倚赖游客，靠你年年趁啲仔女生日免费去玩，点维皮？
同样地，坊间咁多大计，甚至讲返盛智文年代点劲点劲，其实都可以休矣。首先，盛智文出身就系商人，借呢个机会拎功绩埋位（唔要加拿大国籍添），系相当特别嘅例子。正常嚟讲，你放咩人落去都系死路一条。因为屁股指挥脑袋，政府走去营运呢啲项目，点会有前途？
另外，固然盛智文在位时海洋公园赚钱，佢走后就年年都输钱，时机一流—但有冇谂过同大环境都有关？就系盛智文走咗之后嘅每一年，对家迪士尼一样都系年年输钱。不过对方系半私营，就唔多关其他人事，况且仲有专利费袋袋平安。
而唔好忘记，迪士尼赚钱嘅年代（其实得几年），正系内地客占最多。最近几年，特别系上海迪士尼开张后，香港迪士尼本地客多过内地客，就年年蚀钱。靠本地客就可以救海洋公园？你话呢？
迪士尼嘅存在，令到海洋公园更尴尬。如果只系得一个亲生仔，政府要帮海洋公园嘅，冇话唔得嘅，用国家机器，补贴又好，禁你去迪士尼又好，咩都好。但，你另外又有档迪士尼㖞，政府落埋场去帮海洋公园，你估迪士尼嘈唔嘈？
即管放长双眼睇下啲乜乜救亡大计有冇用，但我信人性。海洋公园已经成为怪胎，唔会炒人唔使负责嘅“自负盈亏”机构，咪每年嚟要钱就做呢啲嘢去应酬下你，免得尊贵嘅议员觉得，你伸手拎钱两梳蕉都冇。刘德华在《门徒》有讲，啲道友吊起瘾上嚟，有乜讲唔出？
但改革？唔好玩啦，输钱有人包底，点解我会改革？问下合唔合符你嘅常识？政府嘢唔一定要赚钱，但你蚀都唔好蚀咁多嘛。
海洋公园搞到咁嘅田地，神仙难救。一系执咗佢，一系放畀私人做—亦即系执咗佢。执咗佢后点善后，可以另文讨论。但现有嘅模式，冇乜出路。
就当今次拎咗54亿，当救到海洋公园一时。之后又点？长贫难顾，你不停帮佢包底，佢就必然有方法做到你不停要包底。可以谂返赌仔嘅故事。
悭返嘅钱，好多用途。例如话，有人会讲，你啲中产就去日本睇企鹅啫，草根家庭边有钱？正是如此。海洋公园年头仲话要注资100亿，倒不如分晒畀啲草根家庭。20岁以下嘅，应该一人派到一万蚊。最正系，你唔钟意去日本嘅，咪去韩国睇，或者返古兜温泉睇都得。Why not？最紧有得拣。又例如话，海洋公园请紧2000人嘛，你赔旧大钱畀啲员工，赔返一年半年人工，我相信佢地都会OK的。
作者Facebook专页：君子马兰头 - Ivan Li 李声扬
（文章标题由《香港01》编辑所拟。文章纯属作者意见，不代表香港01立场。）