【热评】蜑家人的十号风球 茶居免费饮食招待水上人避风
文：蜑家妹出走记
第一次有历史文件记录铜锣湾被台风吹袭，应该系1906年嘅 《The Calamitous Typhoon at Hong Kong, 18th September 1906》。报告记述了这无名风暴喺短短两个钟头为香港带来广泛破坏（翻译）：“平日平静似水磨坊嘅维多利亚港，变成小型船只嘅陷阱。过海渡轮停航，但海港内嘅水上人家就啦啦临将船驶入避风塘⋯⋯卜公码头、皇后码头同天星码头嘅凉棚，好似纸牌屋咁逐个被吹塌。
下载“香港01”App ，即睇城中热话：https://hk01.app.link/l7U1Y7t5LO
沿住西角（西环）至东角（铜锣湾）海傍，都见到好多舢舨被吹埋岸边撞向海堤；被撞散咗嘅舢舨残骸同碎片飞晒上马路。
铜锣湾渣甸货仓完全被摧毁。当时喺铜锣湾嘅欧籍同华籍人士，见到水上人家嘅舢舨抵受唔住狂风巨浪，都奋不顾身落海救人。剩系糖厂经理同佢地嘅员工，起码救咗七八百人上岸。有个叫Stanfield嘅少年，就响Bowrington Canal（鹅颈桥/坚拿道）𠮶度救起咗十四五个人。”
阿妈：缆绳就系生命线
“以前打风，我地好忙㗎！边似得而家有人会希望打风放假。”
“打风𠮶阵我地一般都唔会离开只艇，无人睇住只船仲危险！忙咩？忙睇天色、睇风向、放缆绳兼绑缆绳。铜锣湾避风塘有好多浮泡，由钢炼连住海底石墩。将家艇用绳绑好响浮泡之后，就系考验嘅开始⋯⋯”
“第一系风暴潮。我地要打醒十二分精神睇住水位。由于水位会突然暴涨，见到水位越来越高，就要即刻根据水涨高度放绳，俾只艇仔平稳浮响海面。我亲眼见过有人放唔切绳，因为海水可以暴涨得好快，睇住佢只艇变相被扯落海。”
“第二系风向，一定要俾船头迎风，只艇先唔会翻侧；侧咗只艇咪入水，然后家当跌晒落海，最后沉船啰。所以我地要睇实风向；风向一转，就要解开原本绑好嘅缆绳，将艇迎住风向，换去绑另一个同艇头同风向一致嘅浮泡。”
我：（不识时务）有无响打风期间影低当时情况？
“傻的吗？都话咗好忙，唔够快手做嘢就俾人闹死。”
我：咁你最印象深刻系边场风？
“𠮶次⋯⋯唔记得个风叫咩名㖭！总之当时铜锣湾怡东酒店刚刚开业，呀，𠮶年李琳琳同姜大卫响怡东酒店结婚，之后就打风。酒店有个棚架仲未拆下，暴风中个棚架摇摇欲坠，争啲跌落嚟击中铜锣湾啲艇仔！我好肯定呢场台风个名同李琳琳个女系一样㗎！”
（感谢Google大神，母亲大人讲嘅呢场台风，系1974年嘅强台风伊兰）
舅公：连续24小时玩“海盗船”
“温黛打到嚟𠮶阵，我得十二三岁，啱啱做开始boat boy，帮手打理一艘泊响皇家游艇会、船身超过60呎嘅帆船。”
“打风之前，一定要将船用虾须绳（8字绳）绑好响浮泡。平时大帆船要船头船尾各绑两条绳，天气恶劣就绑双倍；温黛吹袭其间，我地要绑三重绳，即船头船尾共12条绳先勉强拉得住只帆船。”
“由于帆船太长，唔可以好似舢舨咁因应风向调头，只可以睇住水位放绳。不过帆船可以摆动嘅幅度较大，所以都挨得住嘅。反而船与船之间要放足够fender，避免碰撞。”
“𠮶时我地响铜锣湾，可以望到尖沙嘴讯号山，真系见到天文台挂风球㗎！见到有个倒转T字就知系三号风球。呀，仲有风暴讯号灯，系三盏白色或绿色组合嘅灯。一号风球系三盏白色灯、三号风球系三盏绿色灯，不过之后五号、六号、七号（以前有五六七号㗎！）、八号、九号、十号就唔记得系咩白灯绿灯组合。”
我：（又不识时务）点解唔记得？努力啲谂下啦！
“傻妹！之后横风横雨，都望唔到对面海，完全无印象，点会记得？！不过除咗风球同讯号灯，天文台仲有一样秘技——风炮！当挂九号或十号风球𠮶阵，天文台就会点炮，成个维港同维港两岸都听到。”
“讲返头先，咁我就留响帆船上面，暴风不停吹，吹过桅杆帆绳之间，咈咈声劲得人惊。最大风大雨𠮶阵我入船舱避难，成排帆船俾暴风吹到向两边四五十度摇摆。同我讲玩海盗船？你试下咁连续摇24小时再讲啦！”
表伯：风波里的茶居
“我细细个住响婆婆嘅艇。台风打到嚟𠮶阵，我阿姨会带我上岸避风。其实呢个时候，就算喺海堤入面，海面风浪已经好大。阿姨带住我地几个细路，摇艇去岸边，催促我地爬上木梯上岸。呢条木梯系水上人自己搭建，因为响海边，梯上经常有青苔同蚝叔，又跣又𠝹手，而家谂起都惊。”
“安全上岸后，阿姨会带我地去歌顿道一间茶居避风。呢间茶居老板同伙记好有爱心，会免费招待铜锣湾蜑家人避风，仲会俾热茶热食我地，等风暴过咗先返落艇。”
facebook ：蜑家妹出走记 https://www.facebook.com/strollingtanka/
（文章标题由《香港01》编辑所拟。文章纯属作者意见，不代表《香港01》立场。）