【环台情侣】经历3年异地恋　运动员的女朋友vs.港女OL的男朋友

一个是香港单车队运动员，一个是典型香港OL女生，由“隐形同学”到相爱相恋，两人的生活步伐截然不同，却一起牵手走向第9个年头。曾被誉为“下一个黄金宝”的香港单车队前成员蔡其皓（Kyle），与中学女同学Niki相恋初期，本应是情侣间最炽热甜蜜的时间，两人却先来3年异地恋，一年见面的时间不足两、三周，牵一牵手、每一个拥抱都来得很珍贵。
挨过异地恋，Kyle在2014年退役，重返校园攻读学位课程，去年大学毕业后展开新旅程，Niki决定辞职相伴，两人骑着双人单车环游世界，终于可体现同步同行，弥补以往的空白。两人的爱情故事，始于中学的班房......

缘起：“隐形同学”的facebook message

Niki：中学同班有个“隐形同学”，一放学就会消失咗，对佢印象好模糊，后来先知佢系港队运动员。我中学毕业后去咗新西兰留学，直至暑假返嚟香港，突然收到呢位“隐形同学”嘅facebook message，一倾就倾足一个月，畀佢有目标、积极嘅性格吸引，自自然然喺埋一齐。

Kyle：中学已加入港队，每日都系无尽嘅训练，无咩时间留喺学校。中三时认得一位同班女同学，觉得佢活泼好动又多朋友，但始终无太多时间同同学一齐，就无特别去认识佢。

到毕业后，𠮶位女同学去咗新西兰读书，我哋嘅认识都仅限于facebook friend，偶然见到佢更新状态咁啰。但喺18岁𠮶年，睇到佢返咗香港过暑假，心血来潮好想传个message畀佢，然后由fb转到MSN倾计，再到最亲密嘅SMS。

就这样，一个长期在杭州集训，一个回新西兰读书，开始这场每年只见到两、三个礼拜的异地恋。

热恋期：走过异地恋

Niki：头3年绝大部分时间都系同视像镜头后嘅男友谈情，就算几挂住亦只能够期待下次见面，但等待系断年计，甚至期待咗一整年都冇见过。每逢其他人过紧浪漫嘅节日，好似情人节同圣诞节，我哋都唔会一齐过，佢成日要比赛，我又要读书，唯有写信画卡，将自家制手作寄畀对方。

我都知我哋背景完全唔同，所以会努力喺电视同报纸了解男友比赛嘅情况，不过我哋都会透过视像电话同讯息联络，每日花好多个钟头倾大家嘅想法，主动关心佢，问“觉得点啊？有冇咩特别分享？”，尽力做到好似活喺彼此生命里面咁，从来无错过。

Kyle：一开始就要经历3年远距离拍拖，维系方法就只有沟通，当对方不开心或者遇到问题时，虽然唔能够陪伴喺身边，但都会放低所有事先去解决。而家好多人都好易放弃，见到对方心情差就觉得自己处理唔到，宁愿放弃，但我哋唔会咁，反而每次都会一齐谂办法解决，慢慢建立信心，愈来愈相信爱情，结果一齐走就走咗8年。

等到Kyle于2014年退役，重返校园继续学业，Niki毕业后亦回港工作，大家的约会方式终于回到真人见面，异地恋告一段落。直至去年，Kyle毕业后邀请Niki一起追梦，以双人单车环游台湾，弥补以往两人的空白。

一齐追梦：订造双人单车环游台湾

Niki：作为女朋友当然支持佢，如果佢有一个大过我嘅梦想，我可以做嘅就系一齐去做呢件事。与其4年都做住一份唔钟意嘅工作，倒不如试下先，继续留喺香港返工，几年后都可能一样。但我从来都唔系拥抱运动嘅人，由细到大都受湿疹困扰，一流汗就出，好痕，所以唔太钟意做运动，单车环岛系一个极大嘅挑战，我唔敢想像。100公里有多远？真系一啲概念都冇，但去咗先，我相信佢。

去到旅程第二日已经42度，晒伤咗，加上full gear（全套装备）好焗身，有少少中暑嘅感觉。最记得有段路不停上山，攰到要死，我不停喺后面问“落山未？”Kyle一开始好耐心咁话“差唔多”，但咁样一问一答重复咗一个钟，后来我学识咗唔再问啦，反正见唔到落山嘅路，有上就有落，有借就有还。

Kyle：始终做过运动员，一直以为双人单车环台舒服无难度，但原来载住女朋友系另一回事。我哋拖住双人行李加两个人嘅重量，系好重嘅负担，加起嚟有65公斤嘅行李，旅程第二日就决定舍弃十几公斤嘢，然后先至可以继续。

但原来沉重的行李背后，藏着Kyle的细心。

Kyle：以前嘅我好注意成绩、速度同时间，但今次有Niki陪伴，佢拖慢到我睇好多唔同嘅事，有佢我先会留意，好感激佢畀到我呢段好好嘅回忆。

Kyle：以前去比赛，喷一次防晒就出去，但我预唔到同女仔去要带几多嘢，所以就同女友讲：“尽情带啦，无问题，我应该负担得到！”结果Niki带咗8支防晒乳、13套衣服、4对鞋，我哋仲有一支脚架、反光板同更衣帘，好似带咗成队crew（摄制队）去咁，因为想喺荒芜嘅地方影靓相，留啲回忆。当然最后统统都要舍弃，剩返3套便服、相机同最基本嘅单车装备。

路途上畀狗追，或者成条路咩都睇唔到，仲有5公里嘅路一直被啲蚊迎面撞过来，沿途实在遇到太多估唔到嘅事，都唔能够喺出发前同女友交代清楚，最后都系靠佢自己心态应付，我只可以做舒缓角色，同埋太晒嘅时候拎把遮出嚟。但去完之后，我都睇到佢转变咗好多，而家会用“兄弟”嚟称呼佢（哈哈哈哈）。

其实呢段环台路线，曾经系其中一条赛道，但今次同女友一齐踩，感受非常唔同。以前Niki只能够喺电视或看台睇我比赛，赛事完咗先可以讲返当中经历，但坐喺双人单车，前后座位好近，我可以叫佢“望下右边”，佢就可以即刻见到。

Niki：佢系专业运动员，一定唔会好似我哋而家踩紧嘅速度，但佢仍然愿意放慢脚步同我做呢件事，其实系好感动。keep住啦，带领我去其他地方。

Niki：经过呢段比较刻苦嘅旅程，更加了解佢，佢𠮶啲运动员特质出晒嚟，即使喺前面踏得辛苦，但一啲埋怨都冇，踩到连盐分都散出来，佢付出好多，唔需要讲你都睇到，喺后面嘅我都要加把劲。

Kyle专注嘅特质亦都好吸引，订立咗前方目标就不断冲，令我反思自己嘅人生。今次喺呢个强大后盾下勇敢地放手一搏，叫做心理挑战又好，训练下自己EQ（情绪智商）都好，总算完成咗一个从来没想过的目标。

Kyle和Niki骑双人单车拍下的环台靓相：