少年犯记录监狱非人生活　被迫袋蟑螂、摵橙断皮要食橙皮

电影《同囚》揭露少年犯狱中不人道待遇。22岁的蔡衡（化名）也曾经历过。他指少年监狱独有的生存法则，食饭要按阿sir要求“饭菜肉汁”，先吃饭、之后才可吃𩠌菜，最后𩠌汁也要喝光。看到其他阿sir入饭堂，要立即致敬。阿sir一声令下，要立即停筷，未吃完的𩠌菜也要倒掉。还有很多规范，都是很“巴”（难挨）的经验。他出狱后撰写《奴教》一书，希望引起社会关注。

本文节录自 《奴教》

作者：为别人

“Good afternoon sir，同sir 报到，我学童325412 蔡衡，因犯藏有儿童色情物品条例，于2014 年11 月27 日于观塘法院被判罪，法官将我判入沙咀惩教所受训一至六个月，good afternoon sir thank you sir ！”

恐惧斗室　袋住曱甴同行

我喺二仓，其实都试过一次几“巴”（难挨）嘅经验。

入了冲凉房，我赫然发觉一只曱甴肆无忌惮停咗喺原本水掣上面。吓得我向后退了几步。地下又湿，我狠狠地向后倒在澡堂地面，顺带溅起一些水花。那些水花溅了去鹫sir 那边。

鹫sir 命令大家捉到曱甴后，就对我作特别的“克服恐惧”方法。

“嗱， 唔好唔认喇， 大家都知道你惊曱甴嘅， 所以依家呢， 阿sir我帮你克服佢啊！”接著， 鹫sir 就拎住个烟盒，摆入我左边心口衫袋入面。

一放入嚟， 我心口立即就feel 到烟盒入面𠮶只生物嘅挣扎。厌恶到我起晒鸡皮，超唔舒服。但鹫sir 似乎好钟意呢一套。“嗱，袋好佢， 唔好被佢走甩啊！唔见咗嘅我要你再捉返只㗎，我收工再检查。”

少年犯：服刑半年减磅20公斤 　惩教：外面生活巴（难挨）过呢到！

曱甴走失　会否有更大惩罚？

我袋住只嘢，随著各种指令开始步操。后颈突然感受到一股痕痒，见到入面个烟盒盒盖打开咗！顶只曱甴真系爬咗上我个身度！我连忙揈头加伸手拍了拍后脑同头发，幸好的是带操阿sir 无见到我这些动作，而那只曱甴立即被我拍咗落地下，然后急爬入附近嘅草丛消失得无影无踪。

呢一刻，我松咗口气之余又担心鹫sir 会唔会有更大惩罚，好在事后鹫sir 已经唔记得咗。

受阿Sir恩惠   寒冬带来暖意

有一次，令我发现二仓入面有啲阿sir 都唔错的。那次，由于厨房要大扫除，所以厨余队伍连我同山猴在内都要帮手。打包好啲好臭嘅垃圾、洗厕所、 扫地， 那时候真系未做饮食业，就已经体验咗饮食业嘅“巴”（痛楚或难以忍受的意思）。

忙咗成个下午后，终于搞掂晒，但个个人身上都已经邋遢兼发臭。我哋就当然希望可以冲个凉换套衫啦，但阿sir 其实无必要畀我哋咁做，佢大有理由直接丢我哋返二仓， 等到第二日先冲。但结果，𠮶个阿sir 系超好人地专登去帮我哋拎冲凉房钥匙，然后开埋热水炉，又畀我哋换新衫。

那时候就入冬，阿sir 安排嘅热水凉十分温暖，最正嘅系𠮶个阿sir 话，我哋可以冲十分钟（平时三分钟都唔知有无），仲抛多支枧液入嚟畀我哋，比起平时的待遇，这简直就系奢侈嘅享受。所以，有一些恩情，真系可以让人记住好耐。虽然我已经唔记得个阿sir 嘅名，但都想系呢度讲声多谢畀佢听。

装束衣著方面：上衣一件深蓝短袖底衫、一件深蓝长袖卫衣、一件棕色心口有袋嘅开胸外套注：如果天气再变冻会再加配一件棕色棉褛（俗称太空褛），或一件棕色毛衣

下身一条灰白直间嘅孖烟通、一条左边patpat 位有袋嘅棕色长裤。

至于啲衫既尺寸，当然有洗衣的人帮手分配和量度的。只是对肥仔而言，裤头的尺寸永远都令人头痛“哇……同学你38 寸腰㖞！”我听从一个洗衣前辈的说话，著上一条37 寸的裤，只是裤管过长，而且我觉得好紧，腰围唔啱。“咩事啊呢度？”这时有一个斯文样嘅阿sir由洗衣房内行出嚟。“Good afternoon sir ！张sir，佢裤头38 寸。”“哇，你咁L 肥嘅！”想不到斯文样，但嘴上不饶人。我连忙踎低举手回应：“Sorry sir ！”“起身畀我度下！”到张sir 帮我量身。“哇……37.5 寸腰，紧唔紧啊裤头？屎忽同JJ 位紧唔紧啊？”张sir 扯起我著紧嘅裤问。“同sir 报，下面唔紧，系裤头仲有啲紧。”我坦诚说道。“你缩下个肚腩。”“Yes sir ！”我吸口气开始缩肚。“仲紧唔紧啊？”“Yes sir ！”我回应道，但讲完后，肚上立即挨了一拳。“再缩多啲啦！”我吃痛后加大力度缩起自己的肚腩，不安开始在心内浮现。“哎，就咁啦，你个仆街快啲减肥啊！”张sir 帮我度完尺寸后向身后的洗衣房吩咐：“喂排版，呢条裤裤管改短3 寸改窄1 寸！”

说罢张sir便将裤抛入洗衣房内，还听到一声yes sir 传了出来。“跟我入嚟！”张sir 随后对我说。“Yes sir ！”洗衣房内，右边墙有部大型工业干衣机，左边墙有两部洗衣机，中间系通道，而路的尽头则是一个工作台，配有洗手盆同埋下面有一个铁笼，锁住一堆洗衣用品，但这不是参观的时候，因为张sir 就站在我面前，开始向我问话：“衰啲咩入嚟㗎？”

监狱内独有的吃饭规矩　摆盘方向都要跟足指示

先放下手上的东西，然后拎起羹匙在台边量度出半只羹匙的位置，那个位置打上就系摆放你的饭碟。白饭要向住自己；再喺饭碟的右边放上羹匙，之后拎出裤入面袋住嘅白色手巾，折成一个正方形盒仔放喺羹匙上方。盒仔嘅开口必须向住自己，同埋有折痕嘅𠮶面唔可以向住中间条通道，再将茶唛放喺盒仔嘅上方，耳仔向住自己。橙就要放喺饭碟左上方，橙顶向天。每个人的饭碟之间，必须系啱啱好一对筷子的距离。而坐喺台两边嘅人嘅饭碟，必须距离台边两只半羹匙距离。度好晒之后，筷子就可以摆喺饭碟同右边物品的空隙之中，但筷子的尾部必须贴住台边。

子蓝sir 便走了过来查看。

“李武杰！”“Yes sir ！”武杰举手回应。位置紧逼，我们膊头掂膊头，就连举手的空间都所剩无几。“你个橙想点啊？碌嚟碌去！”“Sorry sir ！”“蔡衡！”

“Yes sir ！”我早已进入作战状态，反应迅速举手。

“你个茶唛又点L 样啊？个柄系要点㗎？”

“Sorry sir ！”我低头一望，果然有点异样，我将茶唛柄转返向自己。

系唔系觉得好L 烦？无错，的确系好L 烦。但当时的我们，并没有时间和资格去质疑、去埋怨。直到成台嘅人整理好晒餐具。

“跟住要做嘅，就系坐低食饭，大家听住啦，当我嗌到个‘低’字嘅时候，全部人同我迅速坐低。”呢下同壁屋鹫sir 教嘅一样。“全部同我坐……低！”我哋像机器人一般，屁股整齐地落在长凳上。“跟住落嚟系对脚啊，我嗌完‘对脚’，你哋就要将双脚揼落地面，我要快！留心啊！！”

我哋仿佛正要开跑的田径运动员，等待著那声号令。“对脚！”“砰！”奇迹一般，这一下真的只有一声，而且响亮清晰，完美得我都觉得不可置信。

子蓝sir 亦十分满意，让我们一 take 过。“之后就系拉凳啦，当阿sir 讲拉凳嘅时候，两边嘅人就要将长凳两边脚位，拉去对住个台脚位，拉凳！”“咁好啦，移碟！”我们迅速伸出手向对面虚晃。“移碟！”通常呢个动作会做两次。“好啦，等阵食饭嘅时候，由于你哋系新人组，所以全部都要‘𠝹饭’先，只可以食饭嘅一半。

点‘𠝹饭’啊？用筷子同羹匙由上而下将个饭喺中间𠝹出一条直线，由于今日系我右班带喇，所以只可以食饭嘅右边𠮶part。最后，食饭都要有规有矩，有次序㗎！

依家次序系饭菜肉汁，意思即系你要先食完饭，然后再食菜，再食肉，最后再饮埋啲汁，饭菜肉汁。至于橙就等我指示再开始食。

“七分钟食饭，开始！”子蓝sir 说完后走进了厨房。我见其他人开始起筷，终于有时间可以好好检视面前的一切。

蓝色胶碟内，装住了子蓝sir 头先说的饭菜肉汁， 三条小唐菜、两只略细嘅鸡中翼、一堆黑椒汁淋在鸡翼面头，但让人困惑的是，白饭分量实在太多了，大概有三大碗。我依照指示，先在白饭上𠝹出了一条由上而下的直线缝隙，但即使只系一半嘅饭我都觉得食唔落，因为真系太多了，而且压力让人没有食欲。

我勉强自己开始吞下眼前的白饭，但白饭旁边的黑椒汁和鸡翼飘来的肉香真系让人觉得很为难。点解无得畀我哋捞汁啊？只是次序，我无得唔跟。又或者我几时有谂过，原来食一餐饭，都需要遵循严格且毫无意思的规矩？

晚餐忙于致敬　够钟停筷逼著倒掉食物

突然，志豪无端端停下狼吞虎咽，慌忙地吐出口中的饭菜，站了起来然后大嗌：“Good evening sir ！”这一下惊动了整个饭堂的人。有好多人迅速停下食饭动作， 然后开始嗌起good evening sir；我有样学样，摆低碗筷，吐出口中咀嚼紧嘅白饭泥，加入声浪当中。这时子蓝sir 亦走了回来。“停低啦，系唔系好L 好食啊？听唔到同学仔嗌good evening sir 咩！？”子蓝sir 从后扯著停慢咗嘅阿壮嘅头发。“Sorry sir ！ Sorry sir ！”阿壮立即叫痛。“听住啦，教多你哋一件事，依家志豪坐嘅位置，叫致敬位。”我望向志豪，佢坐在饭台角落，而且面向饭堂门口。

   晚餐忙于致敬　够钟停筷逼著倒掉食物

“当坐致敬位嘅同学见到有任何一个阿sir 行入饭堂，就要企起身问好，同台嘅人都要立刻停低动作，吐出口入面所有嘅嘢。然后一起问好，知唔知道啊？袁家壮？”子蓝sir 扯住阿壮嘅头发揈了几下问道。

一声令下要停筷

“清埋杯茶佢，嗱饮茶唔可以饮晒㗎，饮到个水位啱啱好喺茶唛耳仔最下面嘅位就要停！”阿sir说。又一个细节位。“全部停啦，唔好再饮啦！全部缩脚，立正起！开始执台！”Recall 亦行了过来帮忙指点。我哋收好餐巾后，将所有餐具揸喺手上，并且保持在胸口位置。“倒嘢！”“Yes sir ！ Thank you sir ！”我们用一步行路法逐个逐个行出去。当然，每次的转向仍然要嗌good evening sir thank you sir。这时，饭堂右边的通道已经摆放了收集厨余同餐具的蓝色大桶，跟住Recall 指示。

我哋轻轻放低手上的餐具，并且倒掉我未食到嘅菜肉汁。估唔到，沙咀会强逼你浪费食物。

伸延阅读：

  在囚人士的配置物品

两个有盖胶盒仔一条白色“祝君安好”仓布一条白色正方手巾四张毛毡一张蓝单一个枕头加枕套一块凉席一套摆房衫（棕色外套加裤）一套摆房睡衣一套著嘅睡衣（蓝白直间嘅长袖睡衣和睡裤）一条PE 短裤一对泥黄色白饭鱼一对长袜每一个受训生所配置嘅个人物品。一对已经用砂纸磨花咗表面嘅黑色皮鞋一罐鞋油一细块黑色嘅磨鞋布牙刷牙膏一卷厕纸加绿色厕纸筒

本文节录自《奴教》

作者：为别人 ，曾经，我为自己而活；但现在，我只想为别人的欢笑而努力。跌过碰过后，我才发现原来为别人做的事，会转变为为自己做的事。

出版社：天窗出版社

《香港01》 获出版社授权转载，大小标题为香港01编辑所拟。