婚宴姊妹、兄弟毒舌互数 “太肥大汗好臭”“终于摆脱班极品”
话说婚宴散席，姊妹一上的士，便七咀八舌批评一众兄弟，由兄弟在接新娘游戏中“唔玩得”，到直接批评“太肥又大汗好臭”，句句毒舌毫不留情。那边厢，兄弟也批评姊妹“港女”挂住自拍带漏东西，以至“样貌同身材都系超流”⋯⋯的士司机“剥花生”听故仔，决定公诸同好，让大家评评。
姊妹篇：
“班兄弟真系唔系路㗎，你知唔知⋯⋯”
明明得三个人讲，两个人听，不过三个人讲嘢声叠声，你一言我一语咁，依然有七嘴八舌嘅气势。
总括嚟讲，我听到约莫有八大罪状。
负责揸花车嘅新郎表弟成日唔见人。由接新娘到开席，失踪咗两次，每次都成个钟。
“成日唔见人，系咪去咗叫鸡呀。”
“系咪以为无叫佢就唔使做嘢呀？侧侧膊就走咗去。”
“喺度又点，喺度都系唔做嘢㗎啦。”
玩游戏时唔肯就范，就范完又扮病。
“戴（笠？）下底裤都唔制，完全唔玩得！”
“饮下白醋、食下辣嘢都又疴又呕，都唔知真定假。”
“我上次做姊妹呀，班兄弟逐个咬住M巾玩游戏㗎。”
食完早餐先接新娘。
“黐线㗎，食完早餐先嚟，又唔买多份，完全唔识做嘅。”
“我上昼食咗个包咋。”
负责做MC嘅兄弟Marcus唔肯畀新娘妈咪朋友影相先。
“Auntie咁多Friend，梗系要逐张影晒先得啦，男家亲戚咁熟咪等下啰。”
“佢哋都无脑嘅，死都要每边轮流影，完全都唔就女家嘅。”
食烟。
“一得闲就同新郎去煲烟，有无搞错呀。”
“每两个钟就轮住消失，好麻烦。”
帮姊妹拎嘢时黑面。
“佢个细佬真系好无风度啰，叫佢拎𠮶少少嘢就黑晒面。”
“帮我哋抽下个袋啫，好似攞佢命咁。”
望都无望啲姊妹。
“你觉得Paul同Marcus系咪Gay㗎呢，望都无望我哋。”
“咪系，可能扮Gay扮Cool引我哋睬佢。”
开门利是太少。
“班兄弟又车又楼，开门利是畀得𠮶几千蚊。”
“都Cover唔到我哋啲人情。”
“最蚀系今次。”
除咗八大罪状，问罪过程中仲穿插住唔少人身攻击，除咗上述嘅Paul同Marcus疑似扮Gay引姐妹，仲有Andrew副LV眼镜好浮夸，Paul太肥又大汗好臭，新郎细佬做伴郎柒下柒下等等。成程车嘈杂到不得了，听佢哋讲嘢𠮶种咬牙切齿，会觉得班兄弟真系罪大恶极。我都识时务者为俊杰，连声附和话班兄弟真系无鬼用又无责任感，偏偏心底里嘅声音不停喺度大叫：“呢班系港女嚟㗎，港女呀，你嘅良知去咗边？”，虽然系咁，对专业司机嚟讲系应该做戏做全套，落车仲要叫佢哋小心啲，讲完我都觉得有啲良心不安（良心有啲过意唔去）。
司机送了一众姊妹后，辗转回到同一酒楼门外，接到另一群散席后的兄弟。
兄弟篇：
“头先你表哥做咩要出去唔睇注册嘅？”
“咪班极品啰，明明讲好咗佢哋负责花球，临走都已经三番四次问佢哋有无带漏嘢，去到注册处我哋准备好戒指、身分证，先发现无花球。𠮶阵班姊妹仲懵盛盛喺海边自拍紧，睬佢哋都费事啦，表哥咪即刻飞车返金狮攞啰。”新郎细佬讲。
其中一个兄弟就话：“负责揸车都几麻烦，咁佢今日都Miss咗好多嘢㖞，又要睇车无得接新娘，又要攞花球无得睇注册。”
Paul搭嘴：“Marcus实话佢宁愿睇车都唔想接新娘，系咪呀哈哈哈。”
Marcus似乎好感触：“唉，真系唔好提，佢哋杯嘢搞到我连夜晚碗燕窝都食唔落，而家仲顶住顶住，我谂紧如果听日仲系咁，可能要睇下医生。”
“辛苦你喇”、“好兄弟系咁㗎”安慰声此起彼落。
安慰完后，Marcus忽然充满惊恐咁问：“死啦，我啲烟食晒㖭，Andrew你有无净？”
“你成日抢我啲烟，会唔会惭愧㗎？”
话虽如此，Andrew依然伸手递出香烟一枝，淡淡嘅薄荷味弥漫喺车厢内。
“唔好意思呀，的士唔食得烟㗎。”喺佢哋点烟前，我先出言制止。
“知道喇师傅，揸住喺手顶住档咋，一落车就要点烟㗎喇，唔系点搬嘢。”Marcus轻轻松松咁讲，令我可以放下心头大石。
“乜你哋今日真系好大压力咩？”我问。
Andrew反问我：“压力？师傅你做过兄弟未？”
“做过啦，我专做花车司机同司仪嘅。”我答。
“咁你明啦，”Andrew继续讲：“多嘢做唔在讲，做得兄弟无计咁多，但系要同班极品合作，都算，仲要畀说话你听暗示你唔做嘢，都算，做咗嘢又话做得唔好，都算，你知唔知最大压力来源系咩呀，师傅？”
“开估啦，边估到啫？”
“最大压力嘅系班极品唔单止人品一流，样貌同身材都系超流㗎，睇见都反胃啦。”Andrew似乎尽力抑压，可惜最后都系忍唔住。
Marcus讲：“你份人真系厚道，𠮶班八婆点止反胃，仲难顶过我饮𠮶杯嘢呀，Sorry呀下细佬，咁讲你大嫂啲Friend。”
“惊鬼，我见细佬有几次仲不满过我哋啦。”肥Paul插嘴讲，睇嚟胖胖嘅身躯并无影响佢嘅观察力。
“黐线，你哋知唔知佢哋叫我做咩？帮佢哋拎袋㖞，都Short Short地嘅，我大佬我都未帮佢拎嘢啦，我条女出街咪又系自己拎嘢，班八婆以为自己系公主，其实公猪都不如。我梗系黑佢哋面啦，唔通仲搭嘴咩？”人哋细佬忽然怨气大爆发。
落低人落低货之后，佢哋果然每人手持一枝烟，唔知系压力太大，烟瘾太大，定车资太大呢？好在我无经历过咁极品嘅姊妹啫，或者我多数做司机，所以唔知兄弟姊妹之间，可能发生过第三次世界大战。
本文节录自 《我的你的红的》
作者：白告 ，80后中文系毕业生，身兼的士司机及网络作家。
出版社：点子出版
《香港01》 获出版社授权转载，大小标题为香港01编辑所拟。