【韩国．釜山】KPOP迷注意！十月必去三大庆典 睇完烟花追OPPA
一年容易又秋天！话咁快又到咗红叶季，相信釜山都会系唔少人赏红叶嘅选择。而十月嘅釜山除咗有红叶睇之外，仲有三大国际节日盛事会举行～如果你嚟紧十月都计划去釜山嘅话，咁你就绝对唔可以错过国际烟火节、BOF同电影节呢三大釜山国际庆典啦！
1. 釜山十月必去！釜山国际烟火节
每逢十月，釜山就会开始热闹起嚟，世界各地嘅旅客都会涌去釜山，为嘅就系一年一度嘅釜山盛事—国际烟花节！釜山国际烟花节嘅起源系为咗庆祝2005年APEC高峰会议，于是就喺附近嘅广安里放烟花，结果大受好评，所以就决定每年10月尾都会举办烟花表演～去到今年已经系第13年啦！成个表演历时一粒钟，表演总共分为多媒体烟花表演、华丽音乐镭射灯光表演、海上表演等等多个部份，一定会令你目不暇给。
烟花会喺广安里海水浴场附近施放，璀璨嘅烟花喺釜山夜景嘅衬托下，特别夺目吸引！当地韩国人甚至会带埋炸鸡同啤酒，一路睇烟花一路叹～试幻想下一啖冻冰冰嘅啤酒，一啖热辣辣嘅炸鸡，再加埋璀璨嘅烟花，个feel真系超正！如果错过咗就要等一年先再有得睇㗎啦～
小贴士：虽然大多数嘅游客都会拣喺广安里嘅海滩上面欣赏烟花，不过小编更加推荐你去附近嘅荒领山、二技台公园，除咗唔洗同人迫之外，视野仲更加广阔！
活动日期：2018年10月27日
地址：釜山广域市水营区广安海边路219 (广安洞)
活动地点：广安里海水浴场及广安大桥一带
交通：搭乘40、41、42、139、1001、1003号市区巴士，到达广安里后落车。或者可以搭地铁去金莲站（3或5号出口）或广安站（3或5号出口）。
2. One Asia Festival 同一个亚洲文化节（BOF）
各位韩迷注意！2016年首次举办嘅釜山同一个亚洲文化节，系亚洲最大嘅韩流庆典，吸引世界各地嘅KPOP Fans去釜山朝圣。今年One Asia Festival会喺10月20日再度袭卷釜山！
为期8日嘅庆典除咗可以睇到依家最红嘅KPOP明星演出，仲有多种风格嘅户外音乐会，并会喺最后一日举行颁奖典礼。身为KPOP迷嘅你心动不如马上行动，如果唔系会后悔莫及㗎～
▼▼韩国男团EXO▼▼
▼▼Wanna One▼▼
▼▼SEVENTEEN▼▼
▼▼NCT127▼▼
开幕演唱会嘅出演名单小编依家就嚟话你知！EXO、WANNAONE、SEVENTEEN、NCT127、CELEBFIVE 等都会喺釜山亚运会主体育场嘅舞台表演！近距离睇到佢地唔再系梦，快啲准备出发啦！
【开幕演唱会】
活动日期：2018年10月20日至10月28日
地址：釜山广域市莲堤区世界杯大路344（座标：35.190107, 129.058209）
活动地点：釜山亚运会主体育场
交通：搭乘釜山地铁3号线至综合运动场站9号出口或社稷站1号出口落车。
3. 釜山电影节
釜山国际电影节由1996年起开始举办，依家已经发展成为韩国规模最大嘅国际电影节，亦系世界瞩目嘅电影盛会之一。每年釜山电影节都会邀请到重量级嘅韩国明星，例如上年就有张东健同润娥做司仪！如果十月计划去釜山嘅朋友，不妨试下嚟电影节举办嘅场地碰下运气，话唔定可以遇到你嘅男神／女神！而且影展期间都会播放各国嘅精彩电影，钟意电影嘅你就一定唔可以错过啦！
唔讲唔知，釜山国际电影节就连举办嘅地方都系釜山嘅知名建筑，场馆有世界最大规模嘅屋顶建筑设计，每当夜晚灯光亮起再同附近江边、公园嘅夜景交织埋一齐，形成无比梦幻嘅场景～
活动时间：2018.10.4 ~ 2018.10.13
地址：釜山广域市海云台区
交通：撘釜山地铁2号线，到Centum City站，再转5-1、36、39、40、63、115、139、141、155、181、307、1001、1002号巴士，喺新世界百货公司前落车后，行5分钟
记得十月份去釜山嘅话千祈唔好错过呢三大盛典啦！
【本文获“KKday”授权转载。】