【新店速递】黄宗泽再开蚝吧 亲身示范炮制纳豆蓝芝士Pizza！
娱乐圈艺人踩过界绝不稀奇，演而优之后，很多人会在另一个领域建立自己事业王国，而饮食业是尤其受欢迎的“副业之选”。黄宗泽（Bosco）2013年升呢做老板，在九龙城创立了自己的西餐厅，日前餐厅更搬到3千呎大舖，进驻尖沙咀中港城。究竟餐厅卖甚么？废话！怎少得生蚝、意粉、海鲜、牛扒、薄饼……？噢，答中一半啦，一向爱整古做怪的Bosco，就连做菜都要试新嘢，亲自设计出他最爱的“野菌纳豆蓝芝士薄饼”，听落好重口味！摄影：龚嘉盛
灵感源自生活，讲到为何会设计“臭味Pizza”，Bosco答得简单：
因为两样嘢都系我钟意食，臭斗臭吖嘛！
到店当日桌上有很多食品，生蚝、三层下午茶、池鱼……Bosco却唯独多番叮嘱在场人士一定要试这个Pizza，“你真系要试呀！呢个我谂出嚟㗎！”他解释说：“纳豆就健康，Blue Cheese我由细到大都钟意食，有日谂谂下，点解唔可以将两样嘢整埋一齐呢？不如研究下啦，初头喺旧舖系做意粉，依家嚟咗新舖，我哋就变下啦，将佢变咗纳豆Blue Cheese Pizza。”
哗……你做老板，当然可以全权话事，但真的不怕赶客吗？Bosco从没担心过，还说：“冇问题㗎，好似臭豆腐同榴梿一样，你只有钟意同唔钟意，冇中间。”本来对纳豆避之则吉的记者，卒之也在Bosco大力游说下试了一块（主人家叫到，礼貌上当然也不得不吃吧？）结果如何？按图就知道了！
各位Bosco粉丝请睇埋落去，既然餐厅是蚝吧，除了这些玩味菜式，岂能缺少了主角生蚝的份儿？Bosco更即场展示他的开蚝英姿，脑中不禁响起一句：“黄宗泽，可能系世界上最靓仔嘅开蚝师傅！”
Bosco自言由细到大都热爱下厨，中餐西餐都钟意，于是几年前开始经营Oystermine，那应该是揾到钱，所以生意能够扩充吧？他笑笑口说：“唔系，做饮食揾唔到钱㗎，同埋辛苦啲，但我钟意嘅。拍剧同开餐厅个满足感好唔同，开餐厅，你见到啲人食到你嘅菜觉得开心，个满足感会好大，因为好多菜式都系我同总厨一齐谂出嚟，或者我喺边个国家食到啲新嘅嘢，又会飞返嚟同佢哋一齐分享、研究下。”
Bosco亲自走访西班牙、日本、台湾、欧洲、东南亚及马来西亚等地，只要品尝到任何特色美食，都会试著跟主厨研究制法，他特别透露：“有个又系用Blue Cheese，系青口嚟！我喺纽西兰食到觉得好特别，返到嚟又叫总厨研究吓整唔整到，我仲好衰咁叫啲纽西兰朋友帮我明查暗访，究竟佢用咩Blue Cheese、大概有咩原材料呢？我哋返嚟又试试先！啲人食完又觉得，OK㖞，唔臭㖞！”
贵为邵氏兄弟国际影业小生，任你有三头六臂都好，要长期中港两边飞，兼顾好演艺事业跟餐厅生意实在不易，因此Bosco言谈间也多番感激身边一班好员工，大赞他们非常帮到手，更谦称：“冇咗佢哋真系搞唔掂！”比起做老板，他认为自己更似是一个打杂，餐厅大小事务都一脚踢，并笑言：“同埋我系员工娱乐部嚟㗎，哈哈！安排活动呀，过时过节同佢哋一齐开Party，各样啦，我同我啲员工都几似朋友。”
为了让新舖有个新开始，全新餐牌作出了不少改动，如新增了午市套餐及下午茶餐等，当中一定要提到这个精选下午茶，认真抵！众所周知港女们假日最爱和闺蜜去High Tea，跟那些几层的英式下午茶来数十张Selfie，然而酒店Tea Set动辄都几百蚊一位，未必人人都负担得来，反之Oystermine这款价格就亲民得多，每位只需$98！
按图即睇更多菜式及新店花絮！
Oystermine地址：尖沙咀广东道33号中港城第三座平台1A号舖电话：2382 8234