【真香港人】马鞍山人8件共鸣事 于美食沙漠争取牛肉饭！
马鞍山，一个喺区外人眼中好远好远嘅地方，搭马铁要转嚟转去，搭巴士？点解到咗沙田仲要咁耐先到？究竟，住喺马鞍山同乌溪沙，呢啲区外人视为学校秋季旅行或者去camp地点嘅地方，每日生活系点过？
1. 曾经，马鞍山不是美食沙漠
一讲“马鞍山”，关连词必定会有“美食沙漠”，马鞍山人（统称马友）对美食的渴求，在争取牛肉饭店一事上可完美体现。
想当年，马鞍山有哈迪斯、元绿寿司，又有仙迹岩，街市有打冷，系夜晚食宵夜之选。
一个二个学生哥，聚在仙迹岩内吹水，叫个萝卜糕，是一种属于中学生的写意。
可惜，哈迪斯、元绿寿司和仙迹岩都已经和马友say goodbye，现时在马鞍山大商场开业的，有网民形容“好多都系懒高级嘅食肆”，想落街食个便饭都难。
而大家朝思暮想的牛肉饭，仍在马友ff的脑海里。
2. 麦仔、牛肉饭与饼主
讲明先，唔系要喺度卖政治广告，但麦仔确系好多马友所认识，或者系非马友认识马鞍山时会听到嘅名。
一个“牛肉饭议员”的诞生，源于他2013年应网民要求，去信牛肉饭专门店吉野家，希望吉野家在马鞍山开业。（可惜到而家马鞍山都仲未有牛肉饭食，同志继续努力呀喂！）
至于饼主，你可以叫佢做Eric Chan，亦可以叫佢Rick Yuen。点解咁多马友会识佢？
因为佢就系facebook group“马鞍山之友”嘅版主，“饼主”一名，就是源于“版主”的谐音。饼主除了营运facebook群组外，亦会跳出虚拟世界，当有马友反映马鞍山问题时，饼主亦会协助去信予不同机构，改善马鞍山环境。
3. 陪住大家成长的旋转木马
马鞍山人主要娱乐，基本上均集中于新港城和马鞍山广场。
小时候会觉得，马鞍山广场是为儿童而设的商场，广场内的旋转木马，个人感觉比海洋公园更靓！
旋转木马的座位亦非100%马，还有长颈鹿、斑马、老虎、兔和鹿仔，当中以兔仔和鹿仔最受欢迎，小时候，常常“眼甘甘”望著兔子在快乐旋转；亦有不少中学生会著校服玩旋转木马！
4. 新港城音乐喷泉
相信有睇过商场音乐喷泉嘅马友，现在旧地重游，不多不少也会有点失落。因为你同我，都一齐睇住音乐喷泉喷水、停止表演、到拆卸，直至消失。
近十年，喷水池无再响起音乐、水流亦无再随住音乐舞动。
曾经，有好多人夹定时间，围喺音乐喷泉旁边睇表演；百厌啲嘅，就行近水池掂一掂啲水。
可惜音乐喷泉挨到2017年，亦要黯然离去。
5. 马鞍山戏院
2016年一套《十年》，令上映这套电影的马鞍山戏院突然爆红，区外人被平价戏飞吸引睇早场3D电影亦只需$55，超值。
但区内人就会知道，马鞍山戏院除戏票价格廉宜外，戏院可让顾客自携食物饮品入戏院，唔赚到尽逼你买热狗入场食。
呢种胸襟，得马鞍山戏院嘅老板先做到，大家去马鞍山戏院睇戏，就好似喺屋企睇戏咁。
呢种feel，喺大型连锁戏院一定感受唔到。
6. 马鞍山的屋邨人屋邨事
马鞍山不少住宅的名称均有“安”字，与鞍字同音，食字嘛！由富安花园开始，欣安、恒安、颂安、耀安、福安花园和利安，一个个“安”字都是马鞍山的印记。
想当年马鞍山人口未及现时多，沿海私楼还未兴建时，利安居民唔使出街就可以睇到好靓日出日落，可惜由00年代起，一幢又一幢私楼建于海边，过去景象已不复再。
以前，马鞍山不少屋邨内均有文具店和报纸档，不过现时已折得七七八八。
7. 消失的百货超市
喺马鞍山呢个去边都要搭好耐车嘅地方，一间大嘅百货公司，都可以为大家提供一个消闲好去处。提到这一点，相信唔少马友都好怀念昔日嘅八佰伴，八佰伴一到马鞍山，马友们都可以悭返唔少搭车时间。而另外，大型超市家乐福亦一度想进驻马鞍山新港城中心，但最终因为租金等问题而告吹。
8. 乌溪沙沙滩
乌溪沙沙滩，可算系马鞍山人嘅“另类后花园”，虽然沙滩久唔久都会好多垃圾、又有砌心型石与否嘅争议、
亦无石澳、长洲等沙滩的幼沙，但难得一个小小区域也有属于她的沙滩，其实亦是美事。
除此之外，海滨长廊亦马友的宠儿。黄昏时份望著落日、迎著海风跑步，是人生一大乐事。想挑战自我者，更可由乌溪沙沙滩跑至大埔！
其他地区文章：
【真香港人】荃湾人必有共鸣十件事-踏上那震震下的天桥【真香港人】自认地道屯门人？ 10件事测试你系咪真【真香港人】自认地道观塘人？ 一定答得出边间是“新旧老麦”【真香港人】7件事知你系黄大仙人 一定去过摩士煲蜡、狮子山BBQ【真香港人】只有将军澳人才懂7件事 商场围城 康城轮回【真香港人】元朗人才懂9件事 永年合益与饼叔
你都想成为开笔一份子，稿件可电邮至opener@hk01.com；文章纯属作者意见，不代表开罐立场。