《诡探》骆振伟夺07年新秀金咪　踎英皇3年零收入：要问阿妈借钱

近日ViuTV剧集《诡探》话题性十足，当中饰演邵仲衡的手下“梳打”的骆振伟（Thor）都好抢镜。你以为佢系新人，咁就错啦，其实Thor已经入行10年，2007年参加《英皇新秀歌唱大赛》，仲勇夺金咪大奖，顺理成章同英皇签约！可惜工作量不似如期，在英皇3年未有太多工作，更试过要做part time帮补生计。

新秀冠军做part time帮补

其实今年32岁的Thor都算好醒，因为参加新秀之前，曾在国泰做空少储一笔五位数字嘅钱，“因为好钟意演艺工作，所以决定试下博一铺。而且读大学期间曾到港台工作，识好多行内人，佢地同我讲：‘呢行唔易做同机会不多，好多时间都要挨。’”Thor直言在英皇期间有几个月“身无分文”要做part time,，“暑假嘅时候行晒成条弥敦道逐间铺换EPS啲广告牌，当时完全唔敢同英皇讲，惊影响佢地形象，但我真系冇钱!！”始终“炒散”唔系话有就有，Thor甚至要“摊大手板”问阿妈借钱，为报答阿妈救急扶危，他决定要同妈咪开联名户口，“我同佢讲‘我唔会畀家用㗎啦，以后赚嘅钱放落去你地自己去拎啦。’”

歌星梦碎，连做演员都欠机会

虽然Thor在英皇机会唔多，又无得唱歌，幸好他还有与以前港台同事联络，“佢地问我有有无兴趣返去做，所以我就用partime身份返去，英皇都同意。刚巧港台有监制见到我，就俾机会我去Casting。”其后Thor都演出了港台多部剧集，反而在英皇只出演了一部电影。2010年，英皇主动与Thor解约，“经理人好坦白同我讲：‘你可以留系度，我唔介意嘅。但我地唔会比钱你地做歌。’”他直认当时心情好争扎，“之后我有再问佢地，如果拍戏呢，佢地话：‘你都唔会有好多机会。’个刻先死心。”

Thor直言当时的心情觉得自己有怀才不遇感觉，“𠮶阵自己成分日转牛角尖，自己好少讲野，私下唔系善谈嘅人，其实公司俾好多机会我都好感激，走左先知自己嘅不足，可能唱歌唔够叻。”其后Thor透露辞左国泰份工之后，都有去演艺学院学唱歌同做戏。他特别感谢当时的教佢唱歌梁月玲老师，“当时系佢提名我去比赛，赢左比赛好似对自己同佢一个交代。”至于系咪梦想做歌手？Thor坦言当时嘅想法系参加新秀系最容易入行，“其实我系钟意表演，唯有用我当时强项唱歌，所以就试下。”

家人女友支持继续走演艺路

Thor非常感激当时家人和女友的支持，“当时我唔太识处理情绪，觉得自己好寂寞，放自己埋一边。女朋友觉得我好似有情绪病，因为𠮶阵我好似癫左，好想证明自己系识做戏，无端端系屋企会同自己试戏，变得情绪好唔稳定。”幸好女友好体谅Thor，“始终呢行同其他行业好唔同，唔开心同辛酸十都唔知点表达，佢听完可能同我讲一句加油，已经系最大安慰。”

2011年，Thor就加入Now做主持，去年更过到ViuTV继续工作，除了主持工作还有在节目中唱歌，“自己都会玩下音乐，但唔会系呢方面花太多时间。”Thor透露前几年有同朋友夹band，弹下吉他拍下唱歌片，突然就好感概咁话，“好唔好彩去到今年就开始散，个个band友去结婚生仔，又无时间又唔夹租，所以就放弃左。”