【诡探】特技悭皮又飞纸仔　邵仲衡护航：唔好用睇大台标准去睇

ViuTV新剧《诡探》播了一个星期反应唔错，大佬孝邵仲衡饰演的茅山师傅顾问司马至全亦令观众十分受落，不过套剧播出以来口碑好坏参半，观众大赞题材新颖，但又弹制作马虎特技悭皮。

邵仲衡接受《香港01》电话访问时则为制作团队讲好话：“成套剧个tone都唔系想学荷李活或者韩剧，其实韩剧啲特技咪又系咁！《诡探》系做紧一种feel，一种砵兰街、鸭寮街、湿漉漉，好low tech𠮶啲感觉；你留意下连啲衫都甩色一挞挞。开头仲想拍到《如来神掌》咁卡通式飞嚟飞去㗎！而家已经摩登咗好多喇！”有指《诡探》的外判拍摄团队是拍电影出身，邵仲衡代为澄清：“有啲报道话制作团队系电影出身，其实唔系，好似得制片同啲高层系电影出身，佢哋系一间production house，据我所知拍过广告，有冇拍过电视剧就唔知喇！”

他又指拍这套剧有“飞纸仔”情况，但他觉得是好事：“其实只系结局𠮶场戏飞纸仔啫，飞纸仔都有好多种，《诡探》结局系得一场有剧本，其他得分场，因为编剧改嚟改去，都系想改好啲，可能同ViuTV想开拍season 2有关，大家唔好用睇大台𠮶种标准去睇。”大佬孝话《诡探》几日前至煞科，所以仲未正式倾season 2，但佢话好大机会会继续演，大家放心啦！