【诡探】只播半个钟观众唔够喉　邵仲衡同意：顾客永远是对的

近期网民讲得热血沸腾的ViuTV都市灵异剧《诡探》，昨晚终于首播。为了睇街知巷闻的九广铁路闹鬼事件，不少人特意转台收睇ViuTV，“半放弃”《兰花劫》。不过每集得半小时，网民觉得到喉唔到肺，直头上ViuTV的Facebook page投诉，强烈要求加时间！需求很大！仲话睇唔到九广铁路鬼故，未入到戏肉，有啲失望。其实第一集就咁多人讲，系好事嘅。

《香港01》就问到《诡探》男主角邵仲衡，他听到如此多网民嫌太短，坦言：“其实我㖊晚返到屋企都有睇嘅，都有咁嘅感觉。一开始个flow都好流畅，但到最尾就冇啦啦...咦？好似一个盖吸住咗咁，都有打咗个突㗎。”他后来解释拍摄与后期制作团队有两班人，ViuTV安排播半个钟有他要考虑的地方，“或者片源唔充足都系一个因素啦，始终而家佢哋有好多嘢拍紧，就算《诡探》都未拍完㗎！但我都有同佢哋反映下个问题㗎，始终唔同安排对剧情都有影响，我自己觉得咁样会有影响嘅。”后来“大佬孝”商人上身说道：“Personal嚟讲我系觉得要长啲，最好20集冚冚声做完，同埋呢一个系市场导向，观众有要求嘅，最好调整下，顾客永远是对的。”

不过，大佬孝都有叫大家畀啲空间ViuTV，有时候都要适应另一种新模式，“之前观众都会话唔想再睇传统嘅电视做法，话唔想再睇无线或者亚视啲旧有模式，但系因为呢套剧，大家都讲播得太短，又好似用返旧有嘅模式去睇呢件事。始终ViuTV先得一岁咁多，好多嘢都仲摸索紧，做每一个决定都有考虑嘅点。”他笑言有《诡探》总好过只睇韩剧啦！

都有网民认为，《诡探》播得半个钟，做完观众最终都会转台睇TVB，对ViuTV来说，有点蚀章。大佬孝就话：“呢个谂法系啱嘅，不过可能佢哋（ViuTV）未谂到呢一点，或者有其他考虑因素。不过而家有Facebook𠮶啲都好啦，睇到啲feedback。”难得对家放软手脚，ViuTV应该好好把握机会，邵仲衡最后就话：“有人话TVB贪得意轻敌，有人话无货卖。其实咩都好，最好都系做大个饼，令人想睇返电视，唔系要离弃电视，其实所有嘢都系百货应百客啫。”