独家｜尹光亲睇AI尹光《一人之境》爆笑　点评：死咕咕冇感情

大家一向叫开尹光全名或叫他“光哥”，近来因为AI尹光出现，唱红了《Dear My Friend》、《一人之境》，他又多个新花名——光B！今日请光B拍《一人之境》Reaction Cam，他睇到又笑又拍手，但问到觉得AI尹光歌艺如何，他觉得似就几似，但死咕咕、冇感情，至于网民话要推到光B亲口唱《一人之境》，他又点回应？

近月香港有AI陈奕迅、AI黄家驹、AI张国荣，个个天王巨星，但始终冇一个似AI尹光般弹出，至截稿一刻，AI尹光的《一人之境》已有近80万点击。尹光当然冇谂过这个现象，但觉得几得意、几好笑，究竟点解宁宁舍舍尹光AI特别多人睇，他猜测：“佢觉得我得意啰，因为全香港唱搞笑歌嘅人系得我一个，啲人听到又开心。”

点评AI尹光：似似地但始终唔系真人唱

AI尹光唱林家谦，连尾音的“呀～”都做到足，尹光话：“佢特登模仿，就系钟意我啲咿咿呀呀，我嘅口头禅。”他本身唱粤曲出身，连唱粤语时代曲都有粤曲味，是他独有的唱法。讲到AI尹光扮得似唔似，尹光就话：“几好㖞都唱得，都似似地㗎，似似地我啲声啦。（有冇咩不足？）佢始终唔系真人唱，不足嘅地方当然有，如果我唱落去系咪咁嘅声呢？当然唔系啦！”

AI取代唔到歌手：死咕咕冇感情

人们常说，日后AI可以取代各行各业，到时不同职业的人都会被淘汰，不过就算AI点受欢迎，尹光觉得AI歌手无论如何都不能取代真正歌手，“AI始终唔系人，佢系一个机器，人有血有肉，有感情，你Live唱歌开心，个人都好开心，唱到喊嘅时候，眼会湿，机器唔会㗎嘛，机器系梗㗎嘛。舞台上，真人唱歌好听好多，你揾个AI上台唱，有乜好听呢？”他说自己都会模仿别人，譬如唱粤曲都会学新马仔，但至少是真人，似唔似有个谱，不过机器唱出嚟就“死咕咕”，不是太好听。

网民点唱《一人之境》　尹光话……

早在AI尹光出现之前，尹光早已受年轻一辈欢迎，十几年前已同过MC Jin、农夫合唱，还有LMF和24味的Phat、近月出新歌《掂呀》有Rapper阿弗，连张敬轩开Show都翻唱《你阿妈大减价》、《荷里活》，“我都想唱张敬轩啲歌！（会唔会同林家谦合唱《一人之境》？）我暂时唔会唱住，第日如果想听我唱呢，就要去舞台睇喇！佢请我又得，我请佢又得！”尹光即将于下月11在香港文化中心开《尹光闪亮新辉粤曲演唱会2023》，到时会否听到他唱《一人之境》，就要拭目以待。

想听AI林家谦唱《少理阿爸》

至于这段等候期间，尹光提议大家可以听住其他歌先，“我希望大家整埋AI姜涛、AI林家谦，试吓佢哋唱我啲歌又睇吓点。”他更透露自己刚听过AI陈奕迅唱尹光嘅《少理阿爸》，但就觉得不是太似，因为没有他口语化的感觉，看来AI还要再加把劲了！