全民造星V｜钊峰不满指定歌曲赛果　乐乐Mark Chan闹爆Adam态度差

《全民造星5》今晚（14/6）播出的第23集继续第三回合，先来加入指定项目Dance Battle，由红组“蕾安多芬”B组亨仔、Hei、Hayson、Anson Wong、David对蓝组“Fung莎星辰”D组的宇轩、Aaron Bosco、Tomy、Maico、Carson。两组要跳唱超高难度、由冯允谦主唱的《因爱之罪名》，最终由唱将为主的蓝组赢晒5灯。Tomy入后台后笑言：“我冇谂过喺跳舞赢，人生第一次喺个台跳舞俾人睇，要多谢我四位队友。”

红组唱歌魔音大跃进　Stick劲有感情

接着由红组“蕾安多芬”D组James、Kingston、Stick、Tsoul、Owen Lai和Meow演唱指定歌曲，由陈蕾原唱的《穷人的蔷薇》，这队之前连赢两场，但成员大部分都是以跳舞为强项，练习时走音到不堪入耳、疯狂走音，陈蕾听录音听到病埋，陈健安（On仔）听完更深呼吸一口气，叹：“难搞！”唔通真系“Dancer唱歌，注定坎坷”？但On仔仍为组员逐粒音执，结果真系进步唔少，他更被善良Stick的歌声同感情感动到眼湿湿。

而“Fung莎星辰”A组都唱同一首歌，王锋、Adams、Ritchie、Lubia都是队长级人马，最终由Lubia做今次队长，他一度被指唱歌冇感情，并解释自己对好多嘢都冇感觉，唔愿意投放感情。虽然练习进度不理想，但经客席导师梁钊峰大执后，几位都有发挥到水平，尤其有“做工佬”之称的Ritchie飙高音好劲！

蓝组唱歌竟然输　钊峰不满：评判实俾人闹爆

演唱期间，钊峰更听到激动爆喊到猪头咁，而狄易达以外的评判都很满意蓝组的表现，其中少爷占更表示是一个值得收钱的表演，又话睇得出排咗好多次。Ariel亦大赞和音好好、Ritchie高音好靓等，泳儿亦点名赞王锋：“我睇咗咁多演出，唯一一个觉得王锋，第一句开口就好稳，Catch到我耳仔。”

然而，最后赛果却是红组3盏灯胜蓝组2盏灯，包括泳儿都畀红组，落败的蓝组Adams、Ritchie痛哭！钊峰拥抱及安慰组员说：“对唔住，令唔到你哋赢，但你哋赢咗我。我觉得冇问题，摆一世，我哋好Proud of！等其他人评定啦，讲真，出到去个声，大家听到，你哋除咗跳舞，系唱得，我唔觉得有问题，系个Choice。评判因住嚟啦，实俾人闹爆！”

结果真系神预言，网民即洗版丧闹“黑哨”，留言：“连陈蕾都打定输数，点知赢！”“蓝组唔系稳啲咩？”“唔X系啩？”“可唔可以揾返啲正常嘅评判？”另外，由于评判陈咏谦说自己畀分红组是他们了加入Rap元素，因他认为Rapping、绕舌、说唱是大势所趋，有网民就闹：“有Rap就赢，咁以后乜都加Rap落去啦！”

Adam唔愿跳舞　乐乐Mark Chan闹爆态度差

最后一节是Dance Battle练习片段，都几有火药味！阵容是“蕾安多芬”A组的Kim、Nathan、阿霆、Tiger Foo、Hayden跳COLLAR的《OFF/ON》，以及“Fung莎星辰”C组的Mark Chan、Taco、Adam、乐乐、Jason Loi跳肥仔@ERROR的《Lady Killa》，Mark Chan、乐乐等都投诉Adam态度差，因为他跳舞完全跟不上，亦因软骨有伤而处于自暴自弃的状态，组员乐乐灰到自嘲“乐乐变悲悲”说：“一开头𠮶瞬间我真系灰呀其实，个画面突然间由乐乐变咗悲悲啰，唔转弯抹角，首先最重要真系执Adam啲舞。”

Adam解释自己膝头软骨一直有问题，“因为我上半身重，而家后面又酸，膝头哥又痛，脚踝其实都痛，我自己知身体状况，我非常清楚。我如果因为咁样夹硬练习，我觉得有反效果。”Mark Chan听完却大动肝火：“你跳唔到，腰痛唔紧要，可以做少少动作，观感上畀人觉得你尽咗力呀。但你斋呻，我哋又唔系咩物理治疗师，帮唔到你做啲咩，呢啲位佢唔系好识自理，我哋咁样帮佢，佢有冇用返个心对返我哋呢个Passion呢？”

连Rosa老师都说Adam好Hea，指感觉到他放弃，“你自己话想代表马来西亚，想马来西亚有你Adam，Is that the attitude to do it？”之后Adam对镜头激动崩溃痛哭，他说：“我做唔好，我觉得好大压力！我以为我做得好，但我做唔好呀！我觉得好大压力呀！”到底他最后跳唔跳到？就要听日揭晓。