前天堂鸟Gordon荣升准爸爸　与陈乐榣生意拍档变情侣：挡都挡唔住

前天堂鸟成员叶泓声（Gordon）和前Freeze成员陈乐榣（Ally）日前公开恋情及宣布有BB，今日（31/5）两人本来一同现身公开活动，但Ally临时不舒服缺席，单拖的Gordon仍然春风满面分享荣升人父的喜悦，透露两人是由生意拍档日久生情变情侣，自己一向喜欢小朋友，好想B女快点出世，而他跟Ally和前夫的囡囡亦相处超融洽，表示：“妈咪唔喺度佢就乜都听我话，好嗲我。”

前男团天堂鸟成员叶泓声（Gordon）现身健身店新张活动，日前他刚宣布喜讯，前女团Freeze成员陈乐榣（Ally）正怀有他的骨肉。两人本来一齐出席今次活动，但Ally个肚临时不舒服，Gordon为BB安全，唯有叫Ally先回家休息，有机会再一齐见记者，他说：“可能BB开始大，开始识郁，成日刮佢个肚，佢话好唔舒服，我话系咪因为听到我唱歌，所以先喺肚入面跳下舞。”

现时Ally肚内的BB约6个月大，已知是女仔，Gordon直言“濑嘢”，希望B女会好冧自己，又笑说：“希望佢冧到我傻，因为我本身都好锡小朋友，无论男同女我都好锡，就算以前啲姨甥仔唔系我亲生，我都纵到佢哋咩咁，而家自己生一个，我都唔敢谂，希望佢快啲出世见我！”

讲到两人相识及拍拖经过，Gordon坦言是由生意拍档变情侣，自己都冇谂过，他透露：“我哋识咗一段时间，大家讨论工作上面嘅嘢先，都冇谂过突然间挞着咗。（日久生情？）可以话系，因为大家理念好一致，人生目标好相似，我又好钟意家庭，好想组织个家庭，啲嘢话嚟就嚟，挡都挡唔住，不如尝试吓，尝试吓又觉得真系舒服，咁又一齐开舖头，开舖头之前已经Plan咗大半年，之后先一齐，但系我哋经历咗好多唔同嘅嘢，令我哋更加了解对方。”Gordon很感恩有Ally出现，说自己以前都有很多好与不好的经历，但今次经历令他好开心，觉得是时候要成熟，要有一个自己的家庭。

两人现时仍未结婚，Gordon指自己都想尽快，但大住肚搞婚礼不容易，所以会等Ally“卸货”后连百日宴等一齐搞，自己希望是Party形式，跟一班朋友相聚，不会太正统。Ally与前夫育有一个女儿Aria，继父Gordon绝对不介意，亦指和Aria相处好融洽，他表示：“非常好！你睇到我笑容都知唔系假，佢有时好似全世界争咗佢咁，佢成日虾我，我又成日整蛊佢，但系个相处系几得意。佢妈咪喺度嘅时候，佢就会成日No No No，但系妈咪唔喺度佢就乜都听我话，好嗲我，又叫我买嘢，开心嘅。（佢知自己做家姐未？）佢知道喇，开头真系会有少少呷醋，但系慢慢同佢讲解，佢开始大，会谂妹妹改咩名好，问几时出世，仲紧张过我哋。”