全民造星5｜陈彦熹88号“型”到连导师都不为所动　评审回收蓝灯

《全民追星5》今晚（17日）继续进行淘汰，6位参赛者先后登场，包括11号嘅混血儿Born、96号乐庭、88号Philip、5号James、82号Mark Chan同埋63号嘅Bryan，最后有一半跌入复活区。

而相信今集最令观众印象深刻嘅，应该会系88号Philip（陈彦熹），面试时，被问到自觉凭咩入到围，Philip话：“歌声、毅力，仲有可能我个样都OK。（你觉得自己系靓仔?）由细听到大。”被指似MC张天赋嘅Philip，以一曲《小心地滑》令全世界都安静了下来，不过好在都叫顺利入围。

Philip继续以《小心地滑》作为表演项目，并成功得到三盏蓝灯，可惜嘅系四位导师完全冇揿灯抢人嘅举动，咁叫尴尬？未算！事关两位评审都对Philip填写“擅长扮型”十分疑惑，而当Edward Chan问完“你觉得自己好型?”之后，竟然得到“你觉得呢？”嘅答案，就系呢一个反问句子，令Edward Chan即时回收蓝灯，仲语重心长咁同呢位年轻人讲：“系想你明白有啲事情唔系你控制到，要谦虚。”型！

96号乐庭喺跳完《特务肥姜 2.0》后，因为透露自己好惊唱歌，而即席被伍姑娘要求唱几句，呢位18岁嘅小鲜肉喺清唱完Justin Bieber嘅《Love Yourself》之后，成功逆转评审欢心并获三盏蓝灯，顺利入蓝组。而另一位获三盏蓝灯嘅82号Mark Chan，其实喺佢一出场时，花姐已经表明“呢个系我钟意𠮶个，佢会帮到大家”之后又大赞佢有观众缘，佢最后入蓝组。