全民造星5｜王锋大热终登场！陈蕾又争输嬲到要check灯
撰文： 林得懿
出版：更新：
《全民造星5》今晚先后有7位参赛者登场：7号Aaron Bosco、93号EX、16号Sam Lam、1号王锋、64号Alex Regis以及27号嘅David，当中有3位跌入复活区，暂时仲未有人被foul。
来至大马嘅Aaron Bosco原来早年曾经出道，可惜星运平平，为咗养家，最后转做剪接师。今次参加《造星》，自弹自唱《初恋》，虽然被评为过份setting，但最后依然获两盏蓝灯，并顺利入蓝组。
16号Sam Lam，面试时被指似古巨基，加上唱功又唔差，所以成功入围，喺三位评审面前自弹自唱《时候不早》，得到伍姑娘一句“可索性高”，获两盏蓝灯，入红组。
自从喺节目公开一众参赛者之后，1号王锋已火速成大热人选之一，擅长跳Locking嘅佢表演项目当然系跳舞，而佢亦不负众望未表演完已经获三盏蓝灯，伍姑娘认为王锋系完全ready晒，亦同时好自己知道做紧咩；Edward Chan亦大赞王锋表现并冇过份卖弄技巧。由于再次抢人失败，陈蕾同On仔嬲到要去录影厂检查到底啲灯系咪正常运作，再睇埋慢镜，虽然最后证实陈蕾手速唔够快，但大热确系有掀动众人情绪嘅本事。今晚继续有18岁小鲜肉出场，来自北美嘅18号参赛者Owen，以一曲《Can't Take My Eyes Off You》，被伍姑娘笑称“仲性感过我”，获两盏蓝灯入红组。
今集最后一位出场嘅参赛者，系27号David，本身系中医嘅佢，原来都几唱得，可惜比赛前夕因重感冒而失声，但佢坚持要唱《浮夸》，而佢嘅解释系“换歌好似有少少缩沙咁”，结果被伍姑娘直斥硬颈，下场当然系跌入复活区。