George@P1X3L否认出地球Story爆粗闹环球：系讲气候同环保问题

P1X3L三位成员吴启洋（Phoebus）、欧镇灏（George）和叶振弘（Marco）今日现身《ViuTV年中无休节目发布会》，三位来年都有份拍摄ViuTV的剧集和综艺，而音乐方面则交由环球唱片负责，过往三子已被指暗示过对环球唱片的不满，日前George就在IG Story贴了张地球相，上面写住“FXXK U”字句，被网民怀疑是闹环球，他指自己冇咁大胆，解释地球只是跟气候、环保等有关，自认大意引起网民联想。

ViuTV今日举行《ViuTV年中无休节目发布会》，组合P1X3L的吴启洋（Phoebus）、欧镇灏（George）和叶振弘（Marco）全体现身，其中Phoebus和Marco各自献唱自己的单曲《Bad》和《海岛与少年》。

George指唔够胆出Story闹公司　“XX”唔代表粗口

三位成员中，George是未推出单曲的一位，讲到日前他在IG Story贴了一张“地球”相，上面写上“FXXK”字句，网民认为他是公然表达对所属唱片公司环球唱片的不满，又替P1X3L不获环球重用和力捧而感不值。George否认是借Story闹公司，他说：“我梗系唔会咁大胆闹公司啦，边够胆吖！纯粹系因为𠮶日同朋友一齐倾下气候、环保嘅问题，所以就出一个咁嘅story，冇其他意思。‘XX’大家可以自己加落去，可以系粗口，可以系FUNK。”

他指自己出Post前冇谂过“地球”原来与环球唱片的Logo一样，承认疏忽，“真系大意咗，谂少咗原来地球就系环球呢样嘢，其实系两码子嘅事，希望大家唔好联想埋一齐。（公司有冇因为咁样揾你倾偈？）又真系冇㖞，因为佢哋都唔系咁样谂！”问到未来是否以电视发展多于音乐发展为主，三子表示由始至终很期待开音乐会，但未知几时可以实行，所以目前确实是电视演出较多。

车主数剧组借车四宗罪　Phoebus：冇对任何人态度恶劣

Phoebus于近日播映的剧集《极度俏郎君》饰演年轻版姜皓文（黑哥），但他的肤色明显不够黑，他说拍摄时已早到一两小时去搽黑鬼油，有涂黑自己，但镜头睇起来仍不够黑。George笑言：“黑哥喺入面坐监坐咗20年，晒黑咗啫，本身系白嘅！哈哈！”

日前，借出古董电单车予《极度俏郎君》剧组的YouTuber“Yu Ball鱼波”在IG怒斥剧组四宗罪，包括冇遮车牌、本身应承只由特技人揸车最后却由演员上阵，并撞毁其爱车等，反问：“系咪大公司玩晒？”Phoebus指自己都有留意事件，之前已想亲自回应，他解释冇遮车牌不由他控制，但强调：“我记得拍摄现场系好混乱，但我冇对过任何人，无论工作人员、身边嘅人定系借电单车畀我嘅人态度恶劣，我记得佢话我哋冇跟指示，其实我都系学咗用部车，拍摄𠮶时就揸，都系遵守安全交通规则，我觉得自己冇做啲乜嘢，但系有呢个误会产生，我都要道一个歉。”

对于本来答应车主由特技人揸车，最后却由主演的Phoebus落场，他表示：“我知道冇安排特技人喺现场，如果有就当然畀佢揸，但系今次场戏系要见样，所以就冇得揾替身。我开头试揸电单车，有一个弯位冇畀油嘅情况下系跌咗，但系因为试车，我亦都唔系喺好高速嘅情况下揸，如果唔系我自己都好危险啦，我试嘅时候跌过一次，佢哋都有同我讲返要点样点样做，咁我就keep住试，直至觉得安全先至拍。（有冇受伤？）𠮶次喺平地跌，系烂地停车场，由我知要揸电单车呢样嘢，都系比较赶急嘅事。”