武神李嘉教你点分真高手：倒三角身形上唔到战场㗎！
42吋胸肌、8嚿腹肌，倒三角、男人完美身形，但原来大只不等于好打，习武多年的李嘉表示，武术家和健美先生对身体要求是不同的。李嘉称武术家身型是为战斗而不是为好睇，他说：“功夫唔系要求练到肌肉好靓，唔系要练靓身型，佢系练身体饱满嘅状态，呢只我哋叫浑圆嘅状态，唔系话有肚腩㖞，系要虎背熊腰，条腰要够扎实，背脊要够厚，咁佢出拳劲度先可以好似棵大树咁，由树干传到枝叶，如果佢瘦猛猛，倒三角，条腰好窄，佢条腰根本承受唔到佢对脚传去腰嘅力度。你见古代战将留低嘅画像，全部都虎背熊腰，健美倒三角身型上唔到战场㗎，一打起上嚟，两边膊头左fing右fing，中间条腰断开，佢劲力亦断开，跟住容易失重心，拳王泰臣都粗腰啦，功夫好嘅全部都粗腰，摸落去实净，第二你要有粗颈，条颈食得住，人哋一嘢打埋嚟，条颈幼啲你就俾人knock低咗。”
自从《激战》后，各男星都去练大只，大家斗低脂肪比率，但李嘉表示武术家为实战，不会追求零脂肪，好睇同好打系两回事，他说：“包括李小龙都好啦，佢最癫峰嘅时候，唔系拍《龙争虎斗》《死亡游戏》𠮶时，佢𠮶时系最弱嘅时候，因为佢身体脂肪跌到太低喇，佢拍戏都晕，佢点会好打呢？佢最好打𠮶阵应该系有段黑白片，佢用英文casting𠮶时，你见佢块面有少少脂肪饱满嘅，佢𠮶阵仲同长堤空手道𠮶班人系到打。”听完李嘉这么说，真的放心吃东西，但记着李嘉说的粗腰是实净的，不是大肚腩。
李嘉讲完身形，就讲出拳，他表示打人不是用死力，而系要懂得用气，他说：“打人气唔可以上浮，气永远下沉，西方𠮶只转腰出拳𠮶种，佢哋啲气系上浮㗎，因为佢哋靠嘅系肌力，系会越打越攰，中国功夫唔系只靠腰转动，佢系靠肋骨同脊椎嘅稳固，然后做一种叫油压式嘅打法，就系我哋话嘅‘气聚丹田’，沉落去，将自己劲力一嘢灌落对方，就好似你见我打砖、打咩都好，动作唔驶好大，就系咁。”