武神李嘉向徐晓冬下战书　2分钟解决嚣张王：佢一啲都唔好打！

徐晓冬十秒KO太极师传，震惊整个网络和武林，以为赢了世界拳王的他，连日来在微博相当嚣张，又话接受中国武当掌门人挑战、还说李小龙不是格斗高手，充其量只是个业余高手，周围点火头、撩交打。不过讲到武术就一定找TVB武神—李嘉，评一评这位沙尘徐晓冬，他接受《香港01》访问时说：“𠮶段片两个都唔系打得好到位，你问我佢好唔好打，佢一啲都唔好打….非常之唔好打，佢出拳呢，大家可以睇playback，啲拳全部都系浮嘅，跑过去只脚都冇跟上去，佢点会好打呢？如果你系好打嘅，唔好话一拳，中两、三拳对手都瞓喺度啦，你仲要冇戴拳套㖞，打对方十几拳，对手仲可以施施然企返起身，抺下血，仲可以同观众交待事件，咁你话佢有几好打呢？”

李嘉亦表示如果和徐晓冬决斗，亦好有信心，他说：“ 信心绝对有，其实我寻日喺fb都写咗一篇文，呢个都算系我对佢嘅一封挑战书，如果佢肯跟住我规则打嘅，我唔驶你包我机票、住宿、或者咩120万奖金，钱我唔系冇，𠮶啲10分钟call哂传媒嚟，大肆宣传呀、有埋奖金，呢啲唔系武术家嘅挑战，真正嘅挑战系唔会有声有色，佢唔接受嘅话，佢只不过做紧一场MMA嘅骚，如果两个人嘅恩怨，攞嚟当骚咁做，同斗鸡斗狗有咩分别，佢只不过喺度炒人气，如果我真系同佢打，我系唔会留手，大家冇得留手，好似佢咁样“中”𠮶条友几拳，都只系擦损𠮶额头，我同佢打，如果我㩒住你个头，我真系当你榴梿、椰子咁打（李嘉试过一拳打爆榴梿）。”

李嘉还表示徐晓冬可以在三年内随时找他，他说，“你可以三年之内随时揾我解决，我又可以，咁先打得爽。我约战规例都写明，除咗徒手拳脚之外，当时身边你用得嘅“架餐”都可以用，当然我都可以用啦，因为功夫就系生死嘅事！（用几耐时间解决佢？）应该系两分钟之内，一系佢解决我、一系我解决佢，冇可能同佢打一个round，我练咁多嘢，都系随时stand by，我打人或者人打我啫，中国功夫攞嚟强身健体系浪漫废话，功夫从来都系“冧”友，或者防止俾人“冧”，我都想传媒写呢件事，中国功夫系咪佢所讲咁不济呢？我觉得真系唔系！”

李嘉讲明如果同徐师傅打就唔会留手，亦唔怕对方致佢死地，原来这几年李嘉每天都视死如归，他说：“我有一段文删咗、冇讲过出嚟，近呢5、6年，除咗拍嘢之外，我都系著黑衫黑裤㗎，唔系因为要型，系想话俾人听，我系随时接受挑战，如果我打死咗你，我呢套黑衫黑裤就系即时送你殡嘅礼服，我输咗呢套衫亦系送自己一程。练功夫嘅人，系有呢个觉悟，你问佢有无啦。”哗！大家应该feel到李嘉的决心啦……

李嘉除了不满徐晓冬侮辱中国武术、更觉得他没有资格批评李小龙，他说：“佢话李小龙唔系格斗高手，简直痴人说梦，第一你冇同李小龙面对面接触过，你唔系佢𠮶个年代出世，你有咩资格讲一个先人？第二，李小龙做到嘅嘢，你做唔做呀？李小龙一只手指可以队爆一个汽水罐，你（徐晓冬）得唔得呀？如果李小龙做到嘅嘢，你都做唔到，你凭咩话佢唔打得？”正所谓拳脚无眼，如果李嘉同徐晓东冬真系打起上嚟，希望是点到即止啦，始终边个受伤都唔好，其实椰子、石砖、石春都几硬㗎，李嘉都打得烂.......佢拳力有几多？真系不敢想像。