《都市闲情》教C9收兵　揾博士分析兵法：娘娘一定有贪念！

《都市闲情》令人最有印象应该是安德尊和李锦联的“蝴蝶鸳鸯铲”，其余都是讲师奶炒𩠌，最多揾医师讲妇女病，或者金融专家讲吓股市，但今日《都市闲情》忽然贴地，在“诸事广场”环节上竟然讨论“收兵为咗咩？”4位主持安德尊、朱敏瀚、宋芝龄、姚嘉妮亦煞有介事地讨论，还专程请了一名婚姻及家庭治疗哲学博士屈伟豪到场，讲解女人收兵心态，实事认真做，真系好富娱乐性。

屈伟豪博士大有来头，是香港婚姻及家庭治疗协会副主席，分析亦好贴地，他说：“娘娘有三样嘢，第一要有实力，第二要有手段，足够社交能力，同时处理咁多关系，咁多电话唔可以错，第三是心态，有水兵畀钱，运输兵车我，娘娘一定有贪念，但最重要是佢想俾人围住，俾人崇拜…”真系好到肉。

讲娘娘心态中啦，讲兵仔心态博士都得，他说：“有首歌叫《犯贱》…第一兵仔有个奢望，娘娘真系好吸引，希望有日同娘娘一齐，第二佢冇自信啰，唔会觉得自己有素质，可以吸引人，可以同人建立一个好深入嘅关系，于是要靠畀服务、畀著数，咁咪做兵啰….”博士又好中point㖞。

至于今日两位美女主持姚嘉妮、宋芝龄就希望网友可以继续支持《都市闲情》，姚嘉妮接受《香港01》访问时说：“《都市闲情》我觉得系想年轻化嘅，我哋其实啲内容都好啱后生仔睇，我哋有粉丝㗎？（妳有无收过兵？）我从来唔做呢样嘢，我好反感女仔做呢啲，以前有人追，我如果冇feel，我会即刻落闸、叫佢唔驶浪费时间，我连佢电话都唔听㗎，仲有男仔攞手袋都好核突，有男仔话车我，我都话自己识去，我呢啲咪贱命一条啰，唔识享受…哈哈！（妳老公林祖辉当年系咪兵？）梗系唔系啦！”

而宋芝龄就表示《都市闲情》不再是师奶节目，她说：“我哋班撰稿员好多后生仔，所以我哋啲题目贴地咗好多，有啲Terms我哋都唔识，𠮶教授分析都啱㗎，收兵嘅人心态一系好缺乏爱或者系被宠惯。”