【亲亲我好妈】何广沛劲冧江嘉敏　最佳CP想继续：佢笑容好sweet

无线剧《亲亲我好妈》虽然已经大结局，但剧中一对最佳CP何广沛及江嘉敏，恋情只是简单的以Long D告终，留下了许多悬念，到喉唔到肺。网民对“亮瑜恋”显得依依不舍，希望他们有一个美丽的结局，纷纷在网上留言“开拍续集啦”、“好挂住佢哋”、“乜套剧咁短？”，观众投入程度可说是近年无线剧集中相当罕见。

其实何广沛跟江嘉敏外形上确是天生一对，男的俊朗有型，女仔亦清纯俏丽，不少观众将自己代入其中，缅怀读书时代的青涩恋情。何广沛接受《香港01》访问，知悉网民支持开拍续集，他表现得甚为高兴雀跃，“我梗系想开续集啦，始终我哋个故事未完，依家系long d啦，啱啱完咗中学，如果真系拍续集，我觉得有得谂㗎，讲吓大学呀，好多嘢可以讲，熊子逸佢哋又中学呢。”

对于观众不舍得二人分隔两地，希望二人可以大团圆结局，何广沛表示：“好开心大家咁想睇落去，我同江嘉敏恋情啱啱开始咗，重心又去咗讲其他嘢，有少少吊大家瘾嘅。15集之后我嘅戏分少咗好多，大家谂住16集之后会讲吓我哋拍拖，但跟住又去咗讲妈妈嘅嘢，对观众真系唔好意思。”

何广沛继《亲亲我好妈》后，正忙于拍摄《天命》及《超时空男臣》，忙得喘不过气，但提起拍档江嘉敏，何广沛语气仍然是甜丝丝，“其实佢真人同剧嘅角色好大出入，角色系比较乖，班长嚟㗎嘛。佢其实好活泼，真人好可爱，喺片场同啲工作人员都打成一片，有佢喺度拍摄场口都欢乐好多，氹到大家都嘻嘻哈哈，佢系开心果嚟嘅。”(你自己对她的感觉呢？)“拍剧就唔多唔少都会投入感情嘅，我觉得佢嘅笑容好灿烂，好sweet。其实佢戏分多过我，但佢好挨得，日以继夜咁拍，而且转数快，适应能力好强，呢啲我都好欣赏佢。”

二人会否戏假情真，至今仍言之尚早，但何广沛却笑言可以情侣档吸金，“都要睇吓商户揾唔揾我哋，同埋公司点样安排。或者揾我哋拍套微电影都好吖，甚至拍MV都可以，等我哋可以有少少延续都好，亦俾观众睇到我同江嘉敏嘅合作。”何广沛希望能跟江嘉敏有下文，至于江嘉敏近日在Instagram上载拍摄《都市闲情》的花絮，看来新工作仍未有着落，既然网民如此喜欢何广沛和江嘉敏这一对，无线不妨考虑让他们继续合作，满足观众的幻想空间。