【迷】御用秘书专一23年　何绮云爱男友：分开3年再走埋一齐

被网民称为御用秘书的何绮云，在TVB挨了14年的她，昨日接受《香港01》访问，她除了对工作执著外（【迷】秘书王何绮云硬食白眼侮辱：匿埋喊好平常！），爱情亦然，原来她有一个拍拖20年的男友，她说：“我未结婚㗎，我有一个拍咗20年拖嘅人喺到，但我哋3年前分开咗，我同佢分开咗3年，𠵱家再一齐返，（因咩事分开？）好多嘢，好难解释，问题系日积月累，性格呀….20年前识嘅人，或者同你追求嘅嘢都唔同，要再磨合啰！如果唔分开只会系一池死水，爱情一定会变感情，咁就要衡量你想要咩喇。”

何绮云大约22岁遇到这位男朋友，女人最靓、最黄金的时间给了这个男人，但分手收场，女生一定会为何绮云不值，但她没有这样觉得，她说：“当时我冇咩觉得唔抵，反而系一种解脱。热恋期过咗就系另一种关系，耐咗冇分开，系因为大家一齐咁多年，生活上可能要好多嘢都要大家一齐，冇嘢发生，大家就一池死水咁生活，大家嘅关系懒得走，当一种感情变成一种习惯嘅时候系几唏嘘，但我觉得每个人都要有方法去处理。”

20年恋情谈婚论嫁好正常，但何绮云觉得两个人一齐最重要，其他形式化事情反而其次，“因为一齐太耐，过咗𠮶段想结婚嘅时期，之后都冇谂过，我谂大部份嘅人都系咁，我又冇话想生小朋友，因为生小朋友系一个好大嘅责任嚟，我唔敢，我哋已经一齐生活，唔觉得要用张纸去support我哋嘅感情，最重要系大家爱大家。”

拍拖20年之后分开，三年后再一齐，除了男方的诚意，她觉得一段关系双方都有责任，她说：“20年好多嘅感情状况都出现过，开心、唔开心试过，大家一齐挨又试过，我哋一齐住，但分手前，大家关系好似只系同房住咁，当时我哋冇面对过呢个问题，反而分开咗𠮶三年，大家都有检讨，原来除咗佢之外，我都要负责任，但某啲嘢大家都要改，唔系就会返去之前𠮶状况。我哋分开嘅头一年，真系冇点联络，甚至唔想见佢，但佢都一直keep住揾我，之后第二、三年就愈嚟愈揾得多，令我哋再走埋一齐，系因为佢讲嘅一啲说话令我好感动，佢话：‘….唔惊啦，你唔系一个人㗎，仲有我嘛，不如我哋住返埋一齐，我哋慢慢嚟啦。’我谂佢嘅意思系，我系妳嘅backup啰，真系唔特别，但我听到，有啲感动，因为我觉得佢可以继续enjoy佢嘅single life，会问自己其实我系咪应该返去佢身边呢？佢系一个好明白我嘅人，又能接受我啲古怪性格，我工作唔顺利又好，乜都好，佢总会好支持我，分开咗3年都走返埋一齐，系一件几难得嘅事。”

上年，何绮云和男友复合，二人再同居，大家更互相迁就，令关系好过以前，她说：“我以前成日叫佢食完烟，可唔可以食返粒香口胶呀？佢而家连烟都戒埋，我好钟意佢搽香水，主动买咗好多支畀佢，佢以前特登唔喷激我，但而家都会喷下，佢反而冇咩要求我，剩系叫我开咗嘅盖要“㩒”返好，有啲手尾，佢其实真系好就我，佢只系想我陪多啲佢食饭，倾下计。我唔相信一段感情系永远有爱情火花，你要接受火花会熄咗，之后会变咗另一种光芒，由爱情关系变做另一种关系，大家迁就生活细节好重要，以前你觉得好冇所谓嘅嘢，之后变得好有所谓，因为爱嘅成分好大，但当感情成分多过爱情成份𠮶阵，可能好少嘢都变得好大件事，呢样就要大家攞出嚟讲同大家去改。”