七线人弃王．专访｜底薪3、4千连囍帖都唔敢收：最惨系要作借口

无线不断创新求变、提升节目的投入和品质，但要变真系咁易？全新综艺节目《七线人弃王》找来“见到样都未必噏得出名”嘅陈俊坚、郑隽熹、程浩骏、林浩文以及姚宏远孭飞，为的就是可以冇包袱、冇框架去做。可惜原来大家对“冇框”的定义有所差距，再加上经验不足，最后超资6位数收场。为做一个有负责任的人，“人弃王”虽然每月都银包干塘，但依然打算孭起条数……

简单科普一下5位“人弃王”的背景：角色死亡率高达100%嘅陈俊坚加入无线 15年，每月底薪3千多元；无论古装抑或时装都难逃一脱的命运嘅姚宏远，加入无线8年，底薪约4千。“古惑仔专员”程浩骏、“御用礼仪先生”林浩文、“对白永不超过100字”郑隽熹同期艺训班毕业，入行3年多，底薪略胜两位“前辈”，但亦只有4位数。而《七线人弃王》的出现，缘于他们无聊认真做的YouTube频度影片有日被公司发现了，继而被召唤。郑隽熹说：“一入房就话比个节目我哋，问我哋有无信心，我哋当然话有，但唔知原来会牵涉咁多嘢。之后两个月开始度桥，每日都度到零晨，而𠮶时应该系太沉醉，未知有几赖嘢。”

话冇框架但又限制多多

制作新手加上大谂头最终换来高层曾志伟一句“唔得”，郑隽熹说：“佢觉得唔使玩咁多游戏，认为我哋拿捏条线唔够尽。冯盈盈𠮶Part系佢完全唔可以接受，佢话观众想睇真嘢，但我哋拍得好造作，咁边有人想睇？”节目中，五子攞正牌追求冯盈盈，有人扮天使、有人打大赤肋，最后齐齐喺尖沙咀码头自弹自唱《分分钟需要你》，桥段与过往无线的综艺无异，说好的无框框？“我哋都唔系想咁做，但因为一啲原因所以先会咁拍。”至于超资原因，除了是经验不足之外，亦可以视为连个天都唔帮佢哋：“Camping𠮶集本身系三日两夜，但因为遇上风浪所以变成四日三夜，之后又发现唔够shot，要再出crew拍，呢啲都系成本。同埋我哋第一日开工，明明觉得唔对路，但都冇出声，直到好后期先提出，最后𠮶日拍嘅嘢全部冇用，可以话系浪费，但系有价值，因为如果继续咁话去，只会浪费更多。加埋应该超资6位数，因为系我哋安排失档，无班由其他人去受，所以预咗自己畀，准备众筹架啦。”程浩骏笑言。

饭局避得就避

节目中，底薪3200元的陈俊坚胆粗粗要求加人工，最后成功过关，但他笑言依然是过著干塘生活。“所以你话到底有几钟意呢个行业先会做？”虽说五位都未试过连100元都揿唔出，但朋友的生日饭局基本上可免则免。程浩骏记得入行初期，因为收到朋友的囍帖而十分纠结。“户口系有8百元，但揿出嚟之后𠮶半个月就唔知点算，朋友结婚一生人一次，喺呢啲位会有啲难受，最惨系要作借口，明明𠮶日真系唔使开工，但都会同对方讲开工去唔到。”避得过朋友，又如何面对家人呢？程浩骏说屋企人对艺人的理解是“赚好多”，令他在家用方面十分有压力。“亦都有试过见女朋友嘅屋企人时，说话唔系难听，但意思系我一年之后红唔到就去转行，咁我都唔想一世都系咁，但呢行真系好被动。”在旁的陈俊坚问到如果将来女儿的另一半是七线艺人，身为家长的程浩骏会否有同样的举动，程浩骏说：“我会理解好多，其实唔应该系睇佢状态，而系睇心态。当时我觉得冇咩问题，但佢屋企人亦都有道理，会担心个女要养埋我，所以我系冇得嬲，只系好无奈。”

与港姐女友相处冇压力

比起程浩骏，女友系港姐冠军邵珮诗的林浩文似乎幸福得多。“我地相处同认识唔系建基于金钱，所以唔会有压力。我哋生活上系比较简单，可能睇戏、出街就过到一日，当然有想比更好嘅生活佢，所以不断努力工作。”林浩文加入无线前，曾是郭富城、刘德华演唱会dancer，收入不俗，但他认为跳舞生涯不会长久，于是2017年报读艺员训练班。他说当时由于较少留意娱乐新闻，所以一开始并不知道邵珮诗是港姐冠军，4位“人弃王”听到后反应甚大，其中更有人笑指：“所以有冇压力呢个问题要问返邵珮诗，因为佢平时系跟天王巨星。”