曼联忠粉孔德贤觉得要炒苏斯克查：佢冇做错不过系未够实力

无线于周日（31日）举行“爱心曲奇暖万家”慈善义卖活动，艺人孔德贤（Danny）亦有出席支持。虽然是万圣节，但Danny就表示自己明天好早要开工，所以也没有什么节目。不讲不知道，原来Danny是忠实球迷，更是曼联的忠粉，他接受《香港01》访问时，一讲曼联就讲到“停唔到”。现年24岁的他，原来自2007、08年开始就已经喜欢曼联，因为受爸爸的影响喜欢，至今已14年时间！他说︰“见证住王朝嘅崛起，见证住衰退嘅时期，去到而家，唉！我都唔知讲咩好啊！而家呢个好尴尬嘅时期。”

被问到Danny会否觉得曼联领队苏斯克查应该被炒，他直呼︰“系啦！我觉得佢要被炒，其实佢冇做错嘅，只不过系佢未够实力，因为其实曼联每一个球员佢哋嘅质素都已经系世界顶尖，即系位对位嚟讲，佢同其他国家（球队）嘅人排，其实佢哋都系top 5实力水平，但系苏斯克查嘅战术，就好似维持咗佢师傅费格逊，之前打过‘4-4-2’嘅阵式，咁佢个阵式其实都系冇乜组织，都系‘高Q大棍’一嘢掘上去，揾C朗揾卡云尼咁去顶波啦，其实佢冇一个好中间配合到嘅章法，即系好多时候都要靠球员嘅天才波。”

另外，Danny觉得除了苏斯克查在进攻方面有责任，麦佳亚在防守方面也有不足，“虽然佢系（有）好高嘅转会费，亦都系英格兰嘅一个中坚，但系喺个表现唔得嘅情况之下，反而试吓连迪路夫去搭华拉尼可能会好啲，同埋琴日赢咗热刺3:0，𠮶场试咗个3中坚，其实我觉得曼联可以试吓喺呢个低潮嘅时期做多啲防守先。”曼联早前赢热刺3:0的一场赛事，Danny当然亦有看，“基本上5后卫，前面两个中锋，虽然两个中锋畀人笑加埋70岁，两个都35岁，足球上面嚟讲系比较老嘅一个前锋组合，但系我觉得以佢哋嘅经验，同埋佢哋可以趁60分钟前左右去用尽佢哋嘅体力去踢，同埋要做好防守先。”

Danny又讲到上场曼联大败给利物浦0:5，“完全系俾人羞辱咁样，虽然俾人大炒之后，第日我都着件波衫出街，我都冇乜所谓，但系我觉得真系要好好咁样去执咗个防守先，同埋换教练（领队）我觉得系必须！（有冇睇到想喊？）唉！我一路睇一路笑，冇嘢好讲！因为我觉得俾人大炒固然系一个好耻辱嘅嘢啦，仲要系主场，望住啲球迷提早走。本来今季系好大期望，后面又买咗华拉尼，咁贵，前面又有英格兰新星辛祖，再加埋C朗。”Danny总括觉得最大问题是领队，而今年曼联都是靠“符碌”，踢不出实力，希望之后他们会“踢好啲”！

同场加映︰多图︱梁凯宁换秋装骚美腿　感性发文反思︰希望可以爱自己多一点