“最索丫鬟”陈婉婷离巢仲风光　做直播主收入几级跳人气更强

有“最索丫鬟”之称的陈婉婷（Hebe）于2019年9月宣布离巢，结束8年TVB生涯。日前（13/10）她和一班网上直播平台的主播们一起为直播平台拍摄宣传硬照，更遇上了八号风球，到场时陈婉婷更头湿到落脚，笑指充满“出水芙蓉”的美感：“其实大会都帮我Call定车接我，但行去上车都搞到我湿晒，摄一摄冷气即刻头痛！嚟到现场摄影师都话我似‘癫婆’咁，由内到外都湿到滴出水，湿身影相真系好辛苦，好在大家都够专业好快收工。”

幸好陈婉婷早已习惯打风开工，笑称被父母闹“唔够锡身”：“以前试过拍厂景由挂风球到落波都未拍晒，今次广告期都好赶，如果delay都唔知几时可以集齐咁多人再影，所以都要开工！加上呢排我忙紧电影同电视剧，系开心嘅忙碌，所以唔想浪费呢一日档期。今朝我都把握时间开Live同网友见见面先出门口，突然多咗好多唔同国籍嘅Fans，特别系英美、东南亚嘅朋友，原来之前拍嘅广告喺当地刊登咗，所以努力系有回报嘅，更加唔可以比自己停落嚟。”

其实陈婉婷离巢后发展比以往更好，除了做直播主“猪笼入水”令收入几级跳外，她亦接拍过不少广告，接拍了《地产仔》之外也曾在ViuTV的《家务战场》、《七救星》，人气更胜以往。

同场的香珮汶Monique就话出门时横风横雨，全港交通近乎停顿，幸好遇上窝心司机接送：“其实出门时都冇咩车㗎喇，咁好彩遇到个好安全嘅司机，全程都小心揸车。到影完相收工，都半夜一点钟，真系call极都冇的士，加几百蚊都冇人应机，最终试吓打比日头𠮶司机，佢肯出嚟车我返屋企，呢啲真系‘人间有情’！”

另一KOL小豆为妈咪买外卖时巧遇直播Fans，间接举办Fans见面会：“出门口前我都帮妈咪打点好一切先开工，好求其著件Tee落街就算，去到茶餐厅等食物期间，有个伙计问我系咪小豆，原来佢都有follow我直播，仲免费请我食外卖添，我梗系同佢影合照做回礼啦！”