宝宝大过天｜叶蒨文转签经理人合约　望挑战做主持：我好吹得水

凭着TVB处境剧《爱·回家之开心速递》中“岛大女神”Candy一角而为人熟悉的叶蒨文（Sophie），在剧集《使徒行者3》、《大步走》、《爱美丽狂想曲》中的演出都令人眼前一亮，近日她在《宝宝大过天》中饰演秘书Tammy，虽然戏份不多，但其实Sophie已经与公司签了经理人合约，正式成为“亲生女”，相信未来的机会会愈来愈多！

剧中Sophie饰演的Tammy对悠悠（岑丽香饰）这位职场妈妈态度一点都不友善，但她在接受《香港01》访问时就笑言拍摄过程都几顺利：“香香有经验又好人，完全唔惊佢会介意，我觉得佢都知道只系拍戏先会咁。而且我个人都好少会介意人哋嘅谂法而搞到自己怯，我都算系唔系好理人哋讲咩个种人，我个人最大嘅敌人系自己，我好多时拍戏怯系因为我觉得会怕做唔到自己嘅要求，而畀自己太大压力，不过都努力改善紧自己嘅心理质素。”

现年28岁的Sophie在2016年参选港姐后入行，由路人甲做起，之后凭着《爱·回家之开心速递》中“岛大女神”一角弹出，成功吸引不少粉丝关注。虽然Sophie入行四年几以来参演过不少剧集，但直至去年在台庆剧《使徒行者3》中才首度孭重戏份，饰演保安局副局长千金苏淼淼，同袁伟豪（Ben）有不少亲热戏。而在《大步走》中，Sophie出场只有短短几分钟，但就凭着一幕大骚白滑长腿的戏份成功抢镜！

Sophie有样有身材，一直被外界睇好有潜力上位，今年终于转签经理人合约，她更表示是公司主动提出：“未知公司点样安排，但收入方面都系多劳多得，都系睇吓做咗几多个show。（做亲生女机会多啲？）我都系咁谂呀，所以其实我冇睇清楚合约都签咗啦，应该话有睇清楚，但系冇同公司去计较啲细节。我觉得做人应该要有底线，但系唔使成日怕蚀底，始终系大公司，我做好自己就得啦，冇得计较咁多，但我有根据自己嘅本钱争取一下嘅。至于工作机会，因为我系路人甲开始做起，其实一路都系循序渐进，所以工作一路都系慢慢愈来愈多，期待公司有更多嘅安排畀我。”

Sophie一直以来都以拍剧为主，她透露目前有四套剧在手，但之后都想尝试参与更多综艺节目：“身边啲同事都话我个性格同外表好唔同，估唔到我咁多嘢讲同埋咁钟意搞gag，都几适合综艺节目。（想试边类型嘅节目？）我好吹得水嘅，试吓带货都几好玩，配音同埋侦探都可以试，同埋想试吓做大骚司仪。（觉得自己口才如何？）我觉得自己都唔差，好叻唔敢讲，绝对可以试吓栽培。有时都系想要一个机会啫，我都未试过点知自己程度呢？”