风头人物｜王祖蓝暂别内地市场感无奈：为钱真系唔会返嚟
过往访问王祖蓝，身后总会有一棚人（宣传人员、助手、化妆师、发型师等），毕竟他是艺人兼老板。如今升格做无线的首席创意官（意即高层），身后就算有两棚人也非常合理，但实情是访问当日，他独自一人急急脚走入化妆间，为争取时间打算边化妆边访问，但发现环境不太许可后，随即变成闲话家常。化好妆，带著笔者与摄影师急急脚走回办公室，之不过，由于高层忘记带员工证，所以一行人抵达办公楼层后，只能在门外静候路过的职员来开门。
重返娘家出任首席创意官，短短两个多月就交出《开心大综艺》、《日日妈妈声》、《好声好气》、《死因有可疑》、《识货》多个节目，收视、口碑不一，王祖蓝在访问中多次提到仍有很多不足之处，恳请观众能给予多一点时间、传媒能高擡贵手。“只要定好节目框架之后，我就唔使睇得好紧，《好声》我入过一、两次厂、《识货》我入去睇一阵就大概知道OK，其实系应该放手俾同事搞，唔好所有嘢去晒我呢边，如果所有嘢都要我首肯，个流程会好慢，同埋都想鼓励同事担大旗。就好似《死因》咁，用五集俾大家试，收视唔好系咪同事错？唔系，有时我觉得要畀啲士气大家，你哋卖嘅桥系有机会做，呢个都系公司喺市场同士气之间要取得平衡嘅地方。”
艺员应该被尊重
重量不重质似乎是无线近年的模式，结果造成员工士气低落，难免交行货。而身为台柱嘅阿姐汪明荃，亦多次公开为艺员同事发声争取福利。祖蓝出任首席创意官，在综艺节目起用嘅艺人由幕前到幕后、没有所谓嘅级数之分。“我返嚟先前好多人同我讲唔够工开，我心谂点会唔够工开？公司咁多制作，系未执重咗一边呢？而家有机会俾大家两边走，拍剧可能你系配角，但希望喺综艺直情系有机会等观众听你讲嘢。知人善任其实都系尊重嘅态度，好多时喺香港做艺人俾人感觉如果唔系主角就系地底泥，要出去做地盘、餐厅，所以我希望揾到位，尝试畀啲尊重，虽然每个节目最尽都系10、20个艺人，但都试试啦。”由于疫情关系，加上公司人数众多，祖蓝往往只能趁剧集庆功宴，闲聊间听取艺员同事的意见，又或靠有关人士反映，成效并不显见。“我系艺员出身，所以我都要好关心艺员嘅需要，但公司始终系做生意，要做到平衡系好困难，所以睇吓制度上有咩可以改，同埋……说话或态度唔好令艺员太唔舒服。”
为钱真系唔会返嚟
既要重振员工士气，又要背负公司高层的期望进行改革，仲要随时被网民嫌弃节目老土，这份朝九晚八嘅写字楼工，比起在国内做带货直播、拍综艺，确实不讨好，更甚的是国内竞争力强，多年打下的江山难道不怕被瓜分？祖蓝对此也大感无奈，坦言国内的节目存货已清仓。“以前隔离14日我会当系staycation，而家14分钟喺呢度可以做到好多嘢，我希望可以保持同内地各个电视台嘅关系，借此畀到公司同事机会。揾少几多？哎！周围都传我揾少一亿，我无讲过，我话唔见栋楼啫，我有唔同嘅楼，每栋都唔同价值，哈哈！我同TVB讲心唔讲金！其实我成日都觉得钱唔系最重要，为钱我就唔会返嚟啦。呢段时间学管理层嘅嘢，可能做一世艺人都唔会有机会接触到，亦都系用钱买唔到。”
预咗俾人闹爆
自从成功开拓内地市场后，祖蓝每次现身香港总被网民“派嬲”，连带其功积也不被欣赏，再加上“无咗栋层、无埋国内市场”……心理阴影面积何其大？“我而家百毒不侵，做咗咁多年都惯，最紧要唔好令同事、艺人唔开心，因为要维持士气好唔容易。抨击我系预咗，所以返嚟之前其中一个考虑系预咗吃力不讨好。特别系今时今日嘅网络，大家好需要发泄，同埋有时确实可能系我哋有错。阿姐喺《好声》都有讲，有错你可以闹，但可唔可以都略略赞好？唔好有口水战，最重要系大家啲涵系咪实在，如果你制作真系好，系可以潜移默化慢慢去改。我觉得你点闹都好，我哋而家态度系友谊之手，唔系想同你敌对，呢样嘢系重要。”祖蓝笑言自己因为有信仰关系，所以当敌人打左边脸的同时，他会将右边脸亦留给予对方，亦不会因而感到生气。“如果呢啲我都劳气，我就留唔到喺度。”
Hair：Ted yeung @ i i alchemy salon